Jɛremaya 29 - EBƆRƐ BE KAWƆL

Jɛremaya ka sibɛ kawɔl n sa Juwebi nɛ b wɔ Babilɔn be efuli so be asheŋ

¹ N daŋ sibɛ kawɔl n sa bɔrɛmatapoana nɛ anebiana nɛ bejuŋkparpoana nɛ basa kama nɛ ewura Nebukadneeza daŋ pɛ n shi Jerusalɛm n yɔ Babilɔn be efuli so na kikɛ nna.

² B ka pɛ ewura Jehowachin nɛ mo nio nɛ ewurkpa be ekrachiana nɛ Jerusalɛm to nɛ Juda be efuli so be benimuana nɛ basa nɛ b nyi enɔ to be ashuŋ kikɛ n yɔ kenyaya to na be kaman, nɛ n sibɛ kawɔl na.

³ Juda be ewura Zɛdikaya e daŋ shuŋi Shafan pibinyɛn Elasa nɛ Hilkiya pibinyɛn Gemariya ewura Nebukadneeza kutɔ nɛ n ta kawɔl na n chise bumo fanɛ b ta n yɔ. Kusɔ nɛ n sibɛ kawɔl na to nde:

⁴ “Kusɔ nɛ Enyɛnpetale, Israɛl be Ebɔrɛ na bee kaŋɛ basa nɛ e sa ekpa nɛ ewura Nebukadneeza pɛ bumo anya n shi Jerusalɛm n yɔ Babilɔn be efuli so na kikɛ nde:

⁵ ‘Men pɔr nwu n chena ndoŋ nseŋ dɔ adɔbi a ji menyi gbagba be amu so.

⁶ Men ta beche ŋ kurge mbia nseŋ shin nɛ menyi be mbia malɛ gba e ta beche ŋ kurge mbia. A daga fanɛ men salga to n wora keshi nsaa maŋ duga so.

⁷ Men baa kule Ebɔrɛ a fin kayurwushi a sa Babilɔn be efuli na nsaa shuŋ ga ashi ndeana na to nɛ asheŋ e baa nite nɛnɛ amo to. Nɛ asheŋ bee nite nɛnɛ ndeana na to, asheŋ beeŋ nyalɛ n sa menyi alɛ gba.

⁸ Ma, Enyɛnpe, Israɛl be Ebɔrɛ na bee kpele menyi kusoe nna fanɛ men sa maŋ shin nɛ anebiana nɛ b wɔ menyi to na ŋko bekama nɛ baa kpal a wu asheŋ na e fule menyi. Men sa maŋ kaa nu a sa bumo.

⁹ Baa ku efɛ nna a kaŋɛ fanɛ ma e shuŋi bumo, nɛ ma alɛ maŋ shuŋi bumo. Ma, Enyɛnpe Ebɔrɛ e kaŋɛ na.’ ”

¹⁰ Kede be kaman nɛ Enyɛnpe Ebɔrɛ naŋ kaŋɛ le: “Babilɔn be efuli na kaŋ ji eleŋ nfɛ adushunu be kaman, meeŋ wu menyi kuwɔr nseŋ bɛta menyi m ba epe ashi Juda be efuli so nɛ ma kɔnɔ naseso na e bɔlɔ so.

¹¹ N nawule e nyi ŋkre nɛ ŋ kɔ a sa menyi. K la ŋkre nɛ k beeŋ shin nɛ asheŋ e nyalɛ nsaa nite nɛnɛ a sa menyi nna, mannɛ ŋkre nɛ k beeŋ shin nɛ men ji jɛrbi. K la ŋkre nɛ k beeŋ sa menyi echefoso be kebaawɔtɔ lela nɛ menyee tama na nna.

¹² Saŋɛ na so menyeeŋ bɛta m ba ma kutɔ m ba shu n tre ma a fin kechɛto nɛ n nu menyi be kekule na.

¹³ Menyeeŋ fin ma kenishipereso nseŋ wu ma, nɛ ma nɛ menyi e baa wɔtɔ.

¹⁴ Kashenteŋ nɛ mee kaŋɛ na fanɛ menyeeŋ fin ma nseŋ wu ma nɛ ma alɛ e bɛta menyi m ba menyi be kasawule so. Meeŋ chala menyi abar so ashi efuli kama nɛ kaplɛkama nɛ men pesaŋ to n yɔ na, nseŋ bɛta menyi m ba kasawule nɛ n daŋ shin nɛ b pɛ menyi anya kumo so n yɔ efuli pɔtɛ so na so. Ma, Enyɛnpe Ebɔrɛ e kaŋɛ na.”

¹⁵ Menyee kaŋɛ fanɛ Enyɛnpe Ebɔrɛ na sa menyi anebiana ashi Babilɔn be efuli so nna.

¹⁶ Ama men nu kusɔ nɛ Enyɛnpe Ebɔrɛ na bee kaŋɛ a laŋɛ ewura nɛ e bee ji kuwura nɛ ewura Deevid daŋ ji na nɛ men kurgepoana nɛ b maŋ pɛ n yɔ kenyaya to nɛ b ka e wɔ Jerusalɛm be kadegboŋ to na be kaplɛa so.

¹⁷ E yɛ: “Meeŋ shin nɛ kena nɛ akoŋgboŋ nɛ alɔ e ba bumo so nseŋ shin nɛ b ki fanɛ figidibi be asɔrso bɛso nɛ a maŋ daga keji.

¹⁸ Meeŋ ta kena nɛ akoŋgboŋ nɛ alɔ m bɛ bumo so nɛ efuli pɔtɛana be basa e wu loŋ nɛ k chinchiŋ bumo n ta kufu n lɛ bumo so. Kusɔ nɛ k beeŋ nya bumo kaplɛkama nɛ meeŋ pesaŋ bumo to n yɔ na beeŋ chinchiŋ ndoŋebi n ta kufu n lɛ bumo so. Kumo be kaman basa beeŋ wora bumo eyurto nseŋ ta Juda nɛ Jerusalɛm be atre a shoduu basa.

¹⁹ B ka kini kenu n sa ma abɔya nɛ m bɔla anebiana nɛ b la ma anya so m bɔ n sa bumo na so nɛ le beeŋ wora bumo na.

²⁰ Menyi kikɛ nɛ n shin nɛ b pɛ n yɔ Babilɔn be efuli so n ya ki anya na e nu kusɔ nɛ ma, Enyɛnpe Ebɔrɛ na kaŋɛ.

^21-23 Menyee fɛ fanɛ Kolaya pibinyɛn Ahab nɛ Maaseia pibinyɛn Zɛdikaya la anebiana nna ŋkpal b ka bee kaŋɛ fanɛ ma abɔya nɛ baa bɔ na so. Ama baa ku efɛ nna! Ma ere maŋ sa bumo kubɔya kikɛ. Baa di bumo teriana be beche gba nna. Amoso meeŋ ta bumo m bɔɔ ewura Nebukadneeza enɔ nɛ e mɔ bumo nɛ men baa yil a keni. Saŋɛ na so echefoso nɛ menyi be ekama bee shin nɛ e shoduu esa, e beeŋ kaŋɛ le: ‘Ebɔrɛ e shin nɛ fo wu fanɛ kananɛ Babilɔn be ewura daŋ chɔɔ Zɛdikaya nɛ Ahab m mɔ na.’ ”

Kawɔl nɛ Shemayaya sibɛ na be asheŋ

^24-25 Ade kikɛ be kaman, nɛ Enyɛnpetale, Israɛl be Ebɔrɛ na kaŋɛ ma kusɔ nɛ k beeŋ wora anebi Shemayaya nɛ e shi kade nɛ baa tre Nehelam nseŋ daŋ ti anyi be basa nɛ b daa wɔ Babilɔn be efuli so na so na. Ma kawɔl nɛ n sibɛ n chise bumo ashi Babilɔn na be kaman nɛ Shemayaya malɛ sibɛ nwɔl n chise Maasaiya pibinyɛn Zefanaiya nɛ e daa la bɔrɛmatapo, nɛ bɔrɛmatapoana nɛ b ka na nɛ basa nɛ b daa wɔ Jerusalɛm to na kikɛ. Kusɔ nɛ e daŋ kaŋɛ Zefanaiya ashi kawɔl na to nde:

²⁶ “Bɔrɛmatapo Jehowada ka wu, fo nɛ Enyɛnpe Ebɔrɛ na lara nɛ fo ki bɔrɛmatapowura a keni bɔrɛlambu na to be bekumpo so. Fo kushuŋ e la fanɛ fo ka beeŋ shin nɛ b pɛ esa kama nɛ mbe kumu maa shuŋ nɛ e ta mbe kumu fanɛ anebi nseŋ wɔtɔ mo ŋgbɛlɛbi mbe enɔana nɛ aya nɛ kubɔ to.

²⁷ Manɛ nna nɛ fo maŋ shin nɛ b wora Jɛremaya nɛ e shi Anatɔf be kade to nseŋ ta mbe kumu fanɛ anebi a malga a sa basa na bre loŋ?

²⁸ E daŋ sibɛ kawɔl gba nna n chise basa na ashi Babilɔn be efuli so nfe, a kaŋɛ anyi fanɛ anyeeŋ baa wɔ nfe n chɛr. E daŋ kaŋɛ anyi nna fanɛ an pɔr nwu nseŋ dɔ adɔbi n duu anyi gbagba be ajibi jiso.”

²⁹ Kawɔl na ka ba Zefanaiya kutɔ nɛ e kraŋ kumo n sa ma.

³⁰ Kumo be kaman nɛ Enyɛnpe Ebɔrɛ na naŋ kaŋɛ ma kusɔ nɛ meeŋ sibɛ kawɔl nyɔsopo to

^31-32 n chise Juda be basa nɛ b wɔ kenyaya to ashi Babilɔn be efuli so na. E yɛ: “Ma, Enyɛnpe Ebɔrɛ na e naaŋ gberge Shemaya nɛ mbe kaman to ebi kusoe. M maŋ shuŋi mo, ama mo alɛ malga menyi kutɔ fanɛ anebi n shin nɛ men yirda mbe efɛ na. E maaŋ nya kaman to ebi ashi menyi to kikɛ. E maaŋ baa wɔ ŋkpa to n wu asheŋ lela nɛ mee sha kewora n sa ma basa na, ŋkpal manɛ so, e daŋ kaŋɛ bumo nna fanɛ b kini ma nseŋ lar ma kaman. Ma, Enyɛnpe Ebɔrɛ e kaŋɛ na.”