Jɛremaya 28 - EBƆRƐ BE KAWƆL

Jɛremaya nɛ Anebi Hananiya be asheŋ

¹ Zɛdikaya ka ji Juda be efuli so be kuwura be kafɛ nasopo to be kufɔl nusopo to nɛ anebi Hananiya nɛ e la kanyɛn nɛ baa tre Azzu nɛ e shi kade nɛ baa tre Gibiɔn na pibinyɛn ba ma kutɔ ashi bɔrɛlambu na to. Bɔrɛmatapoana na nɛ basa nɛ b wɔ ndoŋ kikɛ be anishito nɛ e kaŋɛ ma fanɛ

² Enyɛnpetale, Israɛl be Ebɔrɛ na yɛ: “Meeŋ jija Babilɔn be ewura be eleŋgboŋ nɛ e kɔ na.

³ Ta a ba nfɛ nyɔ be kefɛato, meeŋ bɛta bɔrɛlambu ere to be shuwa nɛ gbiti be asɔ lela nɛ ewura Nebukadneeza ta ashi Jerusalɛm n yɔ Babilɔn be efuli so na m ba nfe.

⁴ Ma alɛ beeŋ naŋ bɛta Juda be ewura Jehowachin nɛ e sɔ mo tuto ewura Jehowakim so na nɛ Juda be basa nɛ b pɛ n yɔ Babilɔn be efuli so na kikɛ m ba. Kashenteŋto, meeŋ jija Babilɔn be ewura be eleŋgboŋ nɛ e kɔ na. Ma, Enyɛnpe Ebɔrɛ na e kaŋɛ.”

⁵ Kumo be kaman nɛ ma alɛ kaŋɛ anebi Hananiya ashi bɔrɛmatapoana na nɛ basa nɛ b daa yil bɔrɛlambu na to na be anishito le:

⁶ “Enyɛnpe Ebɔrɛ na e shin nɛ kusɔ nɛ fo kaŋɛ ere gbagba e wora m bɔlɔ so loŋ. Mee tama fanɛ e daŋ bɛta asɔ kama nɛ Babilɔnebi na ta ashi bɔrɛlambu ere to nɛ anyi be basa nɛ b daŋ pɛ n yɔ Babilɔn be efuli so na m ba, k beeŋ par ma.

⁷ Ama shin nɛ n nyiŋi fo nɛ basa ere kikɛ fanɛ,

⁸ dra dra pɔɛŋ nɛ b kurge anyi na nɛ anebiana na bee kaŋɛ fanɛ kena nɛ jɛrbi nɛ alɔ beeŋ ba efuli damtaana nɛ kuwurjiana nɛ e kɔ eleŋ ga na so.

⁹ Ama anebi nɛ e bee malga kayurwushi be asheŋ nɛ loŋ malɛ wora m bɔlɔ so nawule nɛ baa wu fanɛ mo e la anebi nɛ Enyɛnpe Ebɔrɛ na shuŋi kashenteŋto.”

¹⁰ Ndoŋ nna nɛ anebi Hananiya lara kubɔ to be kebarga na ashi ma kubɔ to nseŋ buri m buri kumo to.

¹¹ Kumo be kaman nɛ e kaŋɛ le: “Enyɛnpe Ebɔrɛ na kaŋɛ fanɛ ta a ba nfɛ nyɔ be kefɛato, kananɛ e beeŋ jija eleŋgboŋ nɛ ewura Nebukadneeza bee ji efuliana so na nna na.” Ndoŋ nna nɛ n lar bɔrɛlambu na n yɔ.

¹² K maŋ chɛr ko nɛ Enyɛnpe Ebɔrɛ na naŋ kaŋɛ fanɛ

¹³ n ya kaŋɛ anebi Hananiya le: “Enyɛnpe Ebɔrɛ na yɛ feeŋ tiŋ m buri kedibi bre be kubɔ to be kebarga na to, ama e beeŋ ta kebɛlso be kubɔ to be kebarga n tal kumo to.

¹⁴ Enyɛnpetale, Israɛl be Ebɔrɛ, na kaŋɛ fanɛ e beeŋ ta kebɛlso be kubɔ to be kebarga n wɔtɔ efuliana ere kikɛ be basa be abɔ to nɛ b baa shuŋ Babilɔn be ewura Nebukadneeza. E yɛ, e beeŋ shin nɛ ewura Nebukadneeza e ji eleŋ kupuŋ to be asɔbɔya gba so.”

¹⁵ Kumo be kaman nɛ n naŋ kaŋɛ anebi Hananiya le n ti so: “Enyɛnpe Ebɔrɛ na maŋ shuŋi fo, ama fo alɛ bee shin nɛ basa ere bee yirda efɛ nɛ fee ku na.

¹⁶ Amoso kusɔ nɛ Enyɛnpe Ebɔrɛ na bee kaŋɛ e la fanɛ e beeŋ lara fo ashi durnya to. Pɔɛŋ nɛ kafɛ ere e fo ekar feeŋ wu, ŋkpal fo ka ku efɛ n sa basa ere nɛ b lar Enyɛnpe Ebɔrɛ na kaman nseŋ kini mo so.”

¹⁷ Kafɛ na be kufɔl shunusopo to nɛ anebi Hananiya wu.