Jɛremaya 27 - EBƆRƐ BE KAWƆL

Judaebi ka beeŋ shuŋ ewura Nebukadneeza be asheŋ

¹ Ewura Josaya pibinyɛn Zɛdikaya ka ji Juda be efuli so be kuwura, k maŋ chɛr ko nɛ Enyɛnpe Ebɔrɛ na kaŋɛ ma fanɛ

² n chaŋɛ nwɔl be awulbi ŋ kre ndibi n lɔŋɛ kubɔ to be kebarga nseŋ ta kumo n di kubɔ to fanɛ kananɛ baa ta kumo a deŋi ana dɔso so na.

³ Kumo be kaman nɛ Enyɛnpe Ebɔrɛ na naŋ kaŋɛ ma fanɛ n ta kubɔya m bɔla efuliana nɛ baa tre Edɔm nɛ Mowab nɛ Ammɔn nɛ ndegboŋ nɛ baa tre Tayɛ nɛ Sidɔn be katelamu yilipoana nɛ b ba Jerusalɛm to m ba wu ewura Zɛdikaya na so, nɛ b ta kumo n ya sa bumo be bewuraana.

⁴ Nɛ Enyɛnpetale, Israɛl be Ebɔrɛ na naŋ kaŋɛ ma fanɛ ŋ kaŋɛ bumo kusɔ nɛ e kaŋɛ na kenishipereso fanɛ

⁵ mo gbagba be eleŋgboŋ so nɛ e to durnya nɛ edimɛdi nɛ kasawule so be asɔbɔya kikɛ nsaa lara esa nɛ e beeŋ ji amo kikɛ so kuwura.

⁶ E yɛ: “Ma e sa ma kenya, Babilɔn be ewura Nebukadneeza yuku efuliana ere kikɛ so nseŋ shin nɛ kupuŋ to be asɔbɔya kikɛ gba wɔ mbe kaseto.

⁷ Efuliana na kikɛ be basa beeŋ shuŋ Ewura Nebukadneeza nɛ mbe mbia nɛ mo nanabiana fanɛ anya n ya fo fanɛ bedoŋ ka beeŋ ba mur mbe efuli na gba. Kumo be kaman nɛ efuliana nɛ e kɔ yuku ga nɛ bewurgboŋana e ba abar so m ba tintiŋ mbe efuli so be basa nɛ b shuŋ bumo fanɛ anya.

⁸ Kubɔ to be kebarga nɛ Jɛremaya ta n deŋi mbe kubɔ so na yili n sa eleŋgboŋ nɛ ewura Nebukadneeza kɔ na nna. Amoso efuli kama ŋko kuwurgboŋ kama so be basa kaŋ kini keshuli fanɛ e ji bumo so kuwura, meeŋ ta kena ŋko akoŋgboŋ ŋko alɔ ŋ gberge loŋ be efuli na so be basa kusoe n ya fo saŋɛ nɛ ewura Nebukadneeza ka beeŋ mur bumo cheche.

⁹ Men sa maa nu a sa menyi be anebiana ŋko basa nɛ baa kaŋɛ fanɛ bumo ere bee tiŋ a bɔla edare so ŋko a tre basa nɛ b wu be ayoyu a bishi so ŋko a kpal a wu echefoso be asheŋ a kute na. Ŋkpal manɛ so, bumo kikɛ bee kaŋɛ menyi nna fanɛ men sa maa nu a sa Babilɔn be ewura Nebukadneeza.

¹⁰ Baa fule menyi nna nɛ Babilɔn be benapo e pɛ menyi n lar men be efuli so n yɔ efuli pɔtɛ wɔfɔ so. Ma alɛ beeŋ ju menyi n lar menyi be efuli so n shin nɛ men mur cheche.

¹¹ Ama meeŋ shin nɛ efuli kama nɛ kumo be basa beeŋ shuli so a bɛ Babilɔn be ewura so nsaa shuŋ mo e baa kraa wɔ bumo gbagba be kasawule so a dɔ a ji. Ma, Enyɛnpe Ebɔrɛ e kaŋɛ na.”

¹² Ŋ ka bɔ kubɔya na n sa efuliana nɛ a mata Juda be efuli so na be katelamu yilipoana na be kaman, nɛ n yɔ Juda be ewura Zɛdikaya kutɔ n ya kaŋɛ mo le: “Nɛ fanɛ fo nɛ Juda be basa bee sha kebaawɔ ŋkpa to, kumo ere a daga fanɛ men baa wora ewura Nebukadneeza nɛ Babilɔn be efuli so be basa kasonu.

¹³ Ama nɛ men kaŋ kini kenu n sa bumo, kumo ere kena ŋko akoŋgboŋ ŋko alɔ beeŋ mɔ menyi, fanɛ kananɛ Enyɛnpe Ebɔrɛ na teŋ kaŋɛ na.

¹⁴ Men sa maa nu a sa anebiana nɛ baa kaŋɛ menyi fanɛ men sa maŋ yige menyi be amu n sa ewura Nebukadneeza na. Ŋkpal manɛ so, baa fule menyi nna.

¹⁵ Enyɛnpe Ebɔrɛ na gbagba e kaŋɛ fanɛ mo ere maŋ shuŋi bumo menyi kutɔ, amoso efɛ nɛ b kɔ mbe ketre a ku a sa menyi na. Ŋkpal loŋ so e beeŋ ju menyi n lar kasawule na so nɛ b mɔ menyi nɛ anebiana nɛ baa ku efɛ a sa menyi na kikɛ.”

¹⁶ Ade be kaman nɛ ŋ kaŋɛ bɔrɛmatapoana na nɛ basa na fanɛ Enyɛnpe Ebɔrɛ na kaŋɛ le: “Men sa maa nu a sa anebiana nɛ baa kaŋɛ fanɛ Babilɔnebi na beeŋ bɛta bɔrɛlambu na to be shuwa nɛ gbiti be asɔ damta nɛ b ta n yɔ bumo be efuli so na m ba. Efɛ nɛ baa ku a sa menyi.

¹⁷ Men sa maa nu a sa bumo! Men shuli so n sa Babilɔn be ewura nsaa kɔ ŋkpa a wɔtɔ. A maŋ daga kadegboŋ ere ka ki kade bure a dese fuloŋ.

¹⁸ Nɛ fanɛ ŋ gbagba e daŋ malga n sa anebiana ere, b daa beeŋ baa nyi kusɔ nɛ mee sha kewora na, nseŋ kule ma fanɛ n sa maŋ naŋ shin nɛ bedoŋ e ba ta shuwa nɛ gbiti be asɔ nɛ e ka bɔrɛlambu na to nɛ Juda be ewurkpa nɛ Jerusalɛm be mboŋ nɛ a ka na n yɔ Babilɔn be efuli so.”

^19-20 Jemanɛ nɛ Ewura Nebukadneeza daŋ ba pɛ Juda be ewura Jehowachin nɛ Juda nɛ Jerusalɛm be benimuana na nseŋ tintiŋ bumo n yɔ Babilɔn be efuli so na, e daŋ maŋ ta Jerusalɛm to be yawu kpakpaso be asɔ kikɛ n yɔ. E daŋ yige danyaŋ be eshabɔrɛana nɛ danyaŋ be echeenshigboŋ na nɛ danyaŋ be eturko nɛ a wɔ bɔrɛlambu na to na nna. E daŋ yige yawu kpakpaso be asɔ lela ko gba ashi ewurkpa nɛ Jerusalɛm be mboŋ nɛ a ka na nna.

²¹ “Men nu kusɔ nɛ ma, Enyɛnpetale, Israɛl be Ebɔrɛ na bee kaŋɛ a laŋɛ asɔ lela nɛ a ka a wɔ bɔrɛlambu na to nɛ ewurkpa nɛ k wɔ Jerusalɛm to na be kaplɛa so.

²² Babilɔn be basa beeŋ ba sulɔ amo alɛ gba n yɔ bumo be efuli so nɛ e ya kaa wɔ ndoŋ n ya fo saŋɛ nɛ meeŋ shin nɛ b naŋ bɛta amo m ba amo be kakpa ashi Jerusalɛm to. Ma, Enyɛnpe Ebɔrɛ e kaŋɛ na.”