Jɛremaya 26 - EBƆRƐ BE KAWƆL

B ka ji Jɛremaya demu be asheŋ

¹ Ewura Josaya pibinyɛn, Jehowakim ka ji Juda be efuli so be kuwura, k maŋ chɛr ko nɛ Enyɛnpe Ebɔrɛ na kaŋɛ ma le.

² E yɛ: “Jɛremaya, ŋ kɔ kubɔya ko a sa ekama fanɛ Juda be ndeana to be basa e ba kaa shuŋ ma ashi ma bɔrɛlambu to. Yɔ bɔrɛlambu na be kelɔnɛ so n ya kaŋɛ kusɔ kama nɛ meeŋ kaŋɛ fo fanɛ fo malga. Sa maŋ kaŋ yige kamalga na kusɔ kama n lɛ.

³ Ashere basa na beeŋ nu kamalga na nseŋ yige bumo be asheŋ lubi na. Nɛ b wora loŋ bre, meeŋ chɛrga ma nfɛra a laŋɛ kemur nɛ n daŋ kre keta m ba bumo so na be kaplɛa so ŋkpal bumo be asheŋ lubi so na.”

⁴ Kumo be kaman nɛ Enyɛnpe Ebɔrɛ na naŋ kaŋɛ ma fanɛ ŋ kaŋɛ basa na le: “Ma, Enyɛnpe Ebɔrɛ na e naa kaŋɛ menyi na fanɛ men baa wora ma kasonu nsaa bɛ ma keŋini nɛ n ta n sa menyi na so,

⁵ nsaa ta menyi be lakal a wɔtɔ ma mmalga nɛ mee ta a sa ma anya, anebiana, nɛ mee shuŋi bumo menyi kutɔ jemanɛ kikɛ na to. Menyi maŋ naŋ wora asɔ nɛ baa kaŋɛ menyi na kasonu kikɛ.

⁶ Nɛ men kraŋ kini kewora kasonu, kumo ere meeŋ mur bɔrɛlambu ere fanɛ kananɛ n daŋ mur kade nɛ baa tre Shilo na, nɛ durnya to be efuliana kikɛ so be basa e ta Jerusalɛm be ketre a sho basa kɔnɔ.”

⁷ Bɔrɛmatapoana nɛ anebiana nɛ basa na kikɛ daŋ nu ŋ ka bee kaŋɛ asheŋ ere ashi bɔrɛlambu na to.

⁸ Ŋ ka baŋ malga asɔ nɛ Enyɛnpe Ebɔrɛ na kaŋɛ ma kenishipereso fanɛ m malga na n loge, nɛ basa na ba kulti ma n wɔtɔ nseŋ pɛ ma to a ponte to a kaŋɛ le: “Fo daga luwu nna ŋkpal kusɔ nɛ fo kaŋɛ ere so!

⁹ Manɛ so nɛ fo ta Enyɛnpe Ebɔrɛ na be ketre a kaŋɛ fanɛ bɔrɛlambu ere beeŋ ki fanɛ Shilo nɛ kadegboŋ nɛ e mur nɛ esa kikɛ maaŋ naa wɔ kumo to na?”

¹⁰ Juda be bejuŋkparpoana na ka nu kusɔ nɛ k wora na nɛ b nya manaŋ n shi ewurkpa m ba bɔrɛlambu na to m ba chena bumo be echenakpa ashi Kabunagboŋ Popɔr na ase.

¹¹ Kumo be kaman, nɛ bɔrɛmatapoana na nɛ anebiana na kaŋɛ bejuŋkparpoana na nɛ basa na kikɛ le: “Kanyɛn ere daga luwu nna ŋkpal e ka malga ŋ gbiti kadegboŋ na nseŋ kaŋɛ fanɛ k beeŋ mur so. Men gbagba nu kusɔ nɛ e kaŋɛ.”

¹² Ndoŋ nna nɛ ŋ kaŋɛ le: “Enyɛnpe Ebɔrɛ na e shuŋi ma fanɛ m ba bɔ kubɔya nɛ men nu a laŋɛ bɔrɛlambu ere nɛ kadegboŋ ere be kaplɛa so n sa menyi.

¹³ A daga fanɛ men chɛrga menyi be kebaawɔtɔ nɛ asheŋ woraso nseŋ wora Enyɛnpe, menyi be Ebɔrɛ na kasonu. Nɛ men wora loŋ, e beeŋ chɛrga mbe nfɛra a laŋɛ kemur nɛ e kaŋɛ fanɛ e beeŋ bar menyi so na.

¹⁴ Ma ere wɔ menyi be enɔ to nna! Menyeeŋ tiŋ n wora ma kusɔ kama nɛ menyee fɛ fanɛ kumo e daga.

¹⁵ Ama men baa nyi fanɛ, nɛ men mɔ ma menyi nɛ basa nɛ b wɔ kadegboŋ ere to kikɛ beeŋ tɔr ntaŋ ŋkpal men ka mɔ esa nɛ e maŋ wora shɛŋ so. Ŋkpal manɛ so, Enyɛnpe Ebɔrɛ na e shuŋi ma fanɛ m ba kpele menyi kusoe.”

¹⁶ Ndoŋ nna nɛ bejuŋkparpoana na nɛ basa na kikɛ kaŋɛ bɔrɛmatapoana na nɛ anebiana na le: “Enyɛnpe, anyi be Ebɔrɛ na be ketre to nɛ kanyɛn ere malga n sa anyi, amoso e maŋ daga luwu.”

¹⁷ Kumo be kaman nɛ benimuana na be beko koso n yili nseŋ kaŋɛ basa nɛ b shɛr ndoŋ na le.

¹⁸ B yɛ: “Jemanɛ nɛ Hɛzekaya daa ji kuwura Juda be efuli so na, anebi Maika nɛ e shi kade nɛ baa tre Moreshɛf na daŋ bɔ kubɔya ŋ kaŋɛ basa na fanɛ Enyɛnpetale Ebɔrɛ na daŋ kaŋɛ le: ‘Baaŋ pulgi Jerusalɛm to fanɛ kudɔsawule, nɛ k ki kade bureso m biti abar so a dese; nɛ kebee nɛ bɔrɛlambu na yil so na e ki kupo.’

¹⁹ Ndoŋ nna nɛ benimuana na kraŋ naŋ kaŋɛ ewura Hɛzekaya nɛ e shin nɛ Juda be basa na maŋ mɔ anebi Maika. Ama kusɔ Hɛzekaya daŋ wora e la fanɛ e daŋ maŋkura Enyɛnpe Ebɔrɛ na nna nseŋ kule mo fanɛ e wu mo kuwɔr. Kumo be kaman nɛ Enyɛnpe Ebɔrɛ na chɛrga mbe nfɛra a laŋɛ jɛrbi nɛ e daŋ kaŋɛ fanɛ e beeŋ shin nɛ b ji na be kaplɛa so. An peebi Juda be basa, nɛ an mɔ Jɛremaya, anyeeŋ ji jɛrbi lubi.”

²⁰ Kanyɛn ko gba daa wɔtɔ nɛ baa tre mo Uriya, nɛ e la kanyɛn nɛ baa tre Shemaya na pibinyɛn nseŋ shi kade nɛ baa tre Kiriaf Jeerim na. Mo alɛ gba daŋ malga ŋ gbiti Jerusalɛm nɛ Juda ashi Enyɛnpe Ebɔrɛ na be ketre to fanɛ kananɛ Jɛremaya wora ere.

²¹ Ewura Jehowakim nɛ mbe benimuana nɛ benapo be bejuŋkparpoana na ka nu kusɔ nɛ anebi Uriya kaŋɛ na, nɛ ewura na wora ania fanɛ e beeŋ mɔ mo. Ama Uriya daŋ nu kumo be asheŋ nseŋ ta kufu n shile n yɔ Ijipt be efuli so.

²² Ama ewura Jehowakim daŋ shuŋi kanyɛn nɛ baa tre Ɛlnatan nɛ e la Akbɔ pibinyɛn na nɛ basa ko nna fanɛ b yɔ Ijipt n ya pɛ Uriya m ba.

²³ Ndoŋ nna nɛ b ya bar Uriya ewura Jehowakim kutɔ nɛ e shin nɛ b mɔ mo nseŋ ta mo kebuni n ya lɛ kakpa nɛ baa puli basa na.

²⁴ Ade kikɛ be kaman, nɛ kanyɛn nɛ baa tre Ahikam nɛ e la Shafan pibinyɛn na malga ŋ kuŋ Jɛremaya, nɛ b maŋ ta mo n sa basa na nɛ b mɔ.