Jɛremaya 25 - EBƆRƐ BE KAWƆL

Edoŋ nɛ e shi kelargato be esoso a ba na be asheŋ

¹ Ewura Josaya pibinyɛn Jehowakim ka ji Juda be efuli so be kuwura be kafɛ nasopo to, nɛ Enyɛnpe Ebɔrɛ na sa ma kubɔya fanɛ n ta n sa Juda nɛ Jerusalɛm to be basa. Ewura Nebukadneeza malɛ ka ji Babilɔn be efuli so be kuwura be kafɛ koŋwule to e daa la.

² Ndoŋ nna nɛ ŋ kaŋɛ Juda nɛ Jerusalɛm to be basa na kikɛ le:

³ “Beeŋ wora fanɛ nfɛ adunyɔ nɛ asa nna na Enyɛnpe Ebɔrɛ na ka sa ma kubɔya fanɛ n ta n sa menyi. Ma alɛ maŋ kini kubɔya na be kebɔ n sa menyi, ama menyi maŋ nu n sa kumo. Ammɔn pibinyɛn, Josaya ka ji kuwura Juda be efuli so be nfɛ kuduasa to nna na.

⁴ Enyɛnpe Ebɔrɛ na shuŋi anebi damta nɛ b la mbe mbɔ menyi kutɔ, ama menyi maŋ nu n sa bumo.

⁵ B kaŋɛ menyi fanɛ men lar menyi be kebaawɔtɔ lubi nɛ asheŋ lubi na to nseŋ nya n chena kasawule nɛ Enyɛnpe Ebɔrɛ na ta n sa menyi nɛ men nananyɛnana fanɛ k baa la menyi be kapetɛsawule mbaanaayɔ na so.

⁶ Anebiana na kaŋɛ menyi fanɛ men sa maa bunyaŋ ŋko a shuŋ agbir nɛ men lɔŋɛ na; saŋɛ na so Enyɛnpe Ebɔrɛ na maaŋ nya agbo n wora menyi. Men daŋ wora Enyɛnpe Ebɔrɛ na kasonu nna, e daa maaŋ gberge menyi kusoe.

⁷ Ama Enyɛnpe Ebɔrɛ na gbagba kaŋɛ fanɛ men kini kenu n sa mo nsaa shuŋ agbirana nɛ mbe kagbene kaa. Amoso men gbagba e bar kasogberge na menyi be amu so.

⁸ Ŋkpal loŋ so, Enyɛnpetale Ebɔrɛ na yɛ: ‘Men ka kini kenu m bɛ ma malga so so,

⁹ meeŋ shuŋi n tre efuliana nɛ e wɔ kelargato be esoso be kaba so na be basa kikɛ nɛ ewura Nebukadneeza nɛ e la Babilɔn be efuli so be ewura nɛ ma kenya na, nɛ b ba kɔ Juda nɛ efuliana nɛ e kulti ndoŋ na kikɛ kena m mur. Ndoŋ beeŋ mur a dese loŋ mbaanaayɔ nɛ k chinchiŋ ekama nɛ e beeŋ wu amo, ama b kraa beeŋ baa wora menyi eyurto. Ma, Enyɛnpe Ebɔrɛ e kaŋɛ na.

¹⁰ Ma alɛ beeŋ shin nɛ kejafɔ to be kejigboŋ nɛ kagbenefuliso be awɔr nɛ baa wora ashi kasawule na so kikɛ e fo ekar. Esa kama maŋ naŋ nya ayu ŋ kɔr n wora ajibi n ji ŋko n nya ŋku n wɔtɔ fitila to n chɔɔso kanyɛso.

¹¹ Kasawule ere kikɛ e dese fuloŋ nsaa la kusɔ nɛ esa beeŋ wu kumo kenishiso nɛ k chinchiŋ mo nna. Kumo be kaman, efuli pɔtɛana nɛ e kulti kumo na be basa beeŋ baa shuŋ a sa Babilɔn be ewura nfɛ adushunu.

¹² Nfɛ adushunu na be kaman nɛ ŋ gberge Babilɔn be ewura nɛ mbe basa kusoe n shin nɛ kasawule na e ki kasawule fuloŋ a dese mbaanaayɔ ŋkpal bumo gba be alubi so.

¹³ Meeŋ ta jɛrbi kama nɛ ŋ kaŋɛ Jɛremaya fanɛ k beeŋ ba efuliana na so nɛ e sibɛ amo n nase kawɔl ere to na ŋ gberge Babilɔn be efuli na be basa kusoe.

¹⁴ Meeŋ ka Babilɔnebi na be kusɔ nɛ b wora na kukɔ n shin nɛ efuli pɔtɛana nɛ bewuragboŋ damta e ba pɛ bumo anya.’ ”

¹⁵ Ade be kaman nɛ Enyɛnpe, Israɛl be Ebɔrɛ na naŋ kaŋɛ ma le ashi bɔrɛdare to: “Kawiebi nɛ ma agbo bɔlɔ kumo nde. Sɔ kumo n yɔ efuliana nɛ meeŋ shuŋi fo amo so na so n ya shin nɛ b nuu kumo to.

¹⁶ B kaŋ nuu kumo to be asɔ n loge, baaŋ boo nsaa wora asheŋ fanɛ bumo be amu ka kilgi na, ŋkpal kena nɛ meeŋ nya agbo n shin nɛ k ku bumo to na so.”

¹⁷ Ndoŋ nna nɛ n sɔ kawiebi na ashi Enyɛnpe Ebɔrɛ na be enɔ to nseŋ ta kumo n ya sa efuliana nɛ e shuŋi ma amo so na nɛ b nuu kumo to be asɔ nuuso na.

¹⁸ Jerusalɛm to nɛ Juda be ndeana to be basa kikɛ, n ta bumo be bewura nɛ benimuana gba kikɛ n ti so beeŋ nuu kawiebi na to be asɔ nuuso na, saŋɛ na so bumo alɛ gba be kasawule beeŋ ki fanɛ keshishɛrsawule nɛ esa e wu kumo nɛ k chinchiŋ mo. A loŋ beeŋ shin nɛ basa e baa ta bumo be ketre e shoduu fanɛ kananɛ baa wora m ba fo kabre na.

^19-26 Mboŋ nɛ amo alɛ gba beeŋ nuu kawiebi na to be asɔ nuuso na nde: Ijipt be efuli so be ewura nɛ mbe benimu nɛ bejuŋkparpo beeŋ nuu amo; Ijipt be basa kikɛ nɛ befɔ kama nɛ b wɔ Ijipt be efuli so beeŋ nuu amo; Bewura kama nɛ b wɔ Uz be kasawule so beeŋ nuu amo; Bewura kama nɛ b wɔ ndegboŋ fanɛ Ashkɛlɔn nɛ Gaaza nɛ Ekrɔn nɛ basa kama nɛ b ka e wɔ Ashdɔd na ashi Filisti be efuli so; Basa kama nɛ b wɔ Edɔm nɛ Mowab nɛ Ammɔn be efuliana so beeŋ nuu amo; Bewura kama nɛ b wɔ Tayɛ nɛ Sidɔn be ndegboŋana to nɛ nde nɛ bumo be basa wɔ a laŋɛ Teku nɛ baa tre Mɛditerenia na ase beeŋ nuu amo; Basa nɛ b wɔ ndegboŋ nɛ baa tre Dedan nɛ Tɛma nɛ Buz na kikɛ beeŋ nuu amo; nɛ basa kama nɛ baa shɛ bumo be amu kɔlikɔli na beeŋ nuu amo; Bewura kama nɛ b wɔ Areebia be efuli so na kikɛ beeŋ nuu amo; Keshishɛrsawule so be eyiriana na be bewura kikɛ beeŋ nuu amo; Bewura kama nɛ b wɔ Zimri nɛ Elam nɛ Midia be abonfu so na beeŋ nuu amo; Bewura kama nɛ b wɔ kelargato be esoso be kaba so be mboŋ nɛ e taga to nɛ amo nɛ e wɔ kufɔ kufɔ kikɛ so na beeŋ nuu amo. Durnya to be efuli kama daŋ nuu kawiebi na to be asɔ nuuso na. Babilɔn be ewura e daa la esa nɛ e shir kaman n nuu amo.

²⁷ Ade kikɛ be kaman nɛ Enyɛnpe Ebɔrɛ na kaŋɛ ma le: “Kaŋɛ basa na fanɛ ma, Enyɛnpetale, Israɛl be Ebɔrɛ na bee kaŋɛ bumo kenishipereso nna fanɛ b nuu kawiebi na to be asɔ nuuso na m boo a kwiɛ nseŋ lar n tɔr a maaŋ naŋ tiŋ ŋ koso; ŋkpal kena nɛ meeŋ shin nɛ k ku bumo to na so.

²⁸ Nɛ b kaŋ kini kesɔ kawiebi na fo enɔ to n nuu kumo to be asɔ nuuso na, fo kaŋɛ bumo fanɛ Enyɛnpetale Ebɔrɛ na e kaŋɛ fanɛ a daga fanɛ b nuu kumo to be asɔ nuuso na.

²⁹ Jerusalɛm nɛ k la ŋ gbagba be kadegboŋ na to nɛ meeŋ shin nɛ kemur na e fara. B sa maa fɛ fanɛ kasogberge maaŋ ba bumo so. Bumo alɛ gba beeŋ nya kasogberge, ŋkpal manɛ so, meeŋ shin nɛ kena e ku basa kikɛ nɛ b wɔ durnya to be efuliana so. Ma, Enyɛnpe Ebɔrɛ e kaŋɛ na.

³⁰ Jɛremaya, fo e daga fo ber asheŋ nɛ ŋ kaŋɛ ere kikɛ be kebomboŋ n sa basa ere: ‘Enyɛnpe Ebɔrɛ na beeŋ shi ebɔrɛso m ponte awɔrso fanɛ bɔrɛ ka ponte awɔlpa to na. E beeŋ ponte m malga ŋ gbiti mbe basa fanɛ kananɛ baa beri ayu nsaa boŋ nshɛ awɔrso na. Esa kama nɛ e wɔ durnya to be kaplɛkama beeŋ nu mbe ebɔl.

³¹ Mbe ebɔl na beeŋ gbri n yɔ durnya be kukɔlɔbi kikɛ to. Enyɛnpe Ebɔrɛ na kɔ demu ko a ji a gbiti efuliana na. E beeŋ ji basa kikɛ demu nseŋ shin nɛ luwu e ba kumu kpakpasowuraana so. Ma, Enyɛnpe Ebɔrɛ e kaŋɛ na.’ ”

³² Ade kikɛ be kaman, nɛ Enyɛnpetale Ebɔrɛ na naŋ kaŋɛ fanɛ jɛrbi nɛ k du fanɛ bɔrɛfugboŋ na beeŋ ba durnya to be efuliana na kikɛ so kukoko to.

³³ Kachɛ na kaŋ fo, basa damta nɛ Enyɛnpe Ebɔrɛ na beeŋ shin nɛ b wu na be kebuniana beeŋ dese durnya be kaplɛkama fanɛ epi. Esa kikɛ maaŋ puli ŋko n shu bumo be nli.

³⁴ Enyɛnpe Ebɔrɛ na be basa du fanɛ mbe mbolpɔ nna nɛ menyi bejuŋkparpoana na malɛ du fanɛ mbolpɔkpapoana. Ama naniere saŋɛ fo nɛ b mɔ menyi fanɛ ekpakpa, amoso men baa shu awɔrso nsaa dese shishɛr to a melti. Ŋkpal manɛ so, baaŋ kpla menyi to fanɛ kapuya ka bure to a dese na.

³⁵ Kakpa kikɛ maaŋ baa wɔtɔ nɛ menyi bejuŋkparpoana ere e shile n ya ŋana.

^36-37 Menyeeŋ baa shu kagbenejijaso nna nsaa wora kuwɔr be asheŋ ŋkpal Enyɛnpe Ebɔrɛ na ka nya agbo m mur menyi be efuli nseŋ shin nɛ menyi be kasawule dese fuloŋ so.

³⁸ Enyɛnpe Ebɔrɛ na kini mbe basa n lɛ nseŋ kplaŋ bumo so fanɛ kananɛ buluŋ bee kini kebeelaŋ nɛ k bee di to a lɛ nsaa shile a ka kumo na. Kufugboŋ nɛ k bee tɔr basa so ŋkpal kena so na nɛ Enyɛnpe Ebɔrɛ na be agbo nɛ k bee suse fanɛ edɛ na e shin nɛ efuli na ki fanɛ keshishɛrsawule a dese.