Jɛremaya 23 - EBƆRƐ BE KAWƆL

Echefoso be tama be asheŋ

¹ Asheŋ maaŋ nyalɛ n sa benimujipoana nɛ baa mur Enyɛnpe Ebɔrɛ na be basa nsaa pesaŋ bumo to na! E beeŋ ji bumo demu kpakpaso.

² Kusɔ nɛ Enyɛnpe, Israɛl be Ebɔrɛ na bee kaŋɛ benimujipoana nɛ k daŋ daga fanɛ b baa keni mbe basa so na nde. E yɛ: “Menyi maaŋ keni ma basa so nɛnɛ. Men pesaŋ bumo to nseŋ ju bumo n lɛ to nna. To, meeŋ gberge menyi kusoe ŋkpal kusɔ lubi nɛ men wora ere so.

³ Meeŋ naŋ gama ma basa nɛ b daŋ pesaŋ to n yɔ efuli pɔtɛana so na abar so nseŋ bɛta bumo m ba bumo gbagba be kasawule so. Baaŋ ba kurge mbia damta n wora keshi n ti so.

⁴ Ma alɛ beeŋ lara bejuŋkparpo nɛ baŋ keni bumo so kananɛ k daga nɛ kufu maaŋ naa kɔ bumo nɛ b baa chicha kufuso. M maaŋ naŋ gberge bumo kusoe kikɛ. Bumo be ekoŋwule gba maaŋ foe bumo to. Ma, Enyɛnpe Ebɔrɛ e kaŋɛ na.”

⁵ Nɛ Enyɛnpe Ebɔrɛ na naŋ kaŋɛ le: “Kachako bee ba nɛ n lara ewura nɛ e niŋi nseŋ shi Ewura Deevid be kanaŋ to. Loŋ be ewura na beeŋ ta kanyiasheŋ n ji kuwura, nseŋ wora asheŋ niŋiso ashi ekpa nɛ k daga so ashi kasawule na kikɛ so.

⁶ E kaŋ m ba ji kuwura, Juda be basa kikɛ beeŋ nya bumo be amu nɛ shɛŋ shɛŋ maaŋ naa tɔrɔ bumo nɛ Israɛl be basa e baa wɔ kayurwushi be kebaawɔtɔ to. Le be ewura ere be ketre e naŋ baa la Enyɛnpe Ebɔrɛ e la anyi be Emɔlgapo.”

⁷ Kede be kaman nɛ Enyɛnpe Ebɔrɛ kaŋɛ le: “Jemanɛ ko bee ba nɛ ma basa maaŋ naa ta Enyɛnpe Ebɔrɛ nɛ e bee sa ŋkpa nseŋ lara Israɛl be basa ashi Ijipt be kasawule so dra dra na be ketre to a bɔ ntaŋ.

⁸ Ama baaŋ baa ta Enyɛnpe Ebɔrɛ nɛ e bee sa ŋkpa nseŋ lara Israɛl be basa ashi kasawule nɛ k wɔ kelargato be esoso be kaba so nɛ efuli pɔtɛana nɛ b pesaŋ to n yɔ na so na be ketre nna a bɔ ntaŋ. Kumo be kaman nɛ b chena bumo gbagba be kasawule so.”

Anebi fɛpoana be asheŋ

⁹ M baa fɛ kusɔ nɛ anebiana na be asheŋ, k bee chinchiŋ ma nna nsaa shin nɛ mee chicha fanɛ esa nɛ e nuu nsa m boo m baŋ so; ŋkpal Enyɛnpe Ebɔrɛ nɛ mbe mmalga cheembi na so.

¹⁰ Anebiana nɛ b maa ji kashenteŋ a sa Enyɛnpe Ebɔrɛ na e bɔlɔ kasawule na kikɛ to. Kumu kpakpaso be kebaawɔtɔ to nɛ b wɔ nsaa ta yuku nɛ b kɔ na a wora asheŋ nɛ e maŋ daga. Ŋkpal Enyɛnpe Ebɔrɛ na ka shoduu kasawule na so, k shin nɛ asɔbɔya be ejikpaana wɔl ŋ ki fanɛ keshishɛrsawule nna.

¹¹ Nɛ Enyɛnpe Ebɔrɛ na kaŋɛ le: “Anebiana na nɛ bɔrɛmatapoana na maa ŋana Ebɔrɛ. Ŋkpal manɛ so, m pɛ bumo nɛ baa wora asheŋ lubi ashi bɔrɛlambu na to gbagba.

¹² Amoso, meeŋ shin nɛ kebaawɔtɔ e ki kpakpa ga n sa bumo; nɛ k wora fanɛ b ka bee nite tentembiri to ashi ekpa fɛrgeso to nsaa fɛrge a tɔr na. Bumo be kasogberge be saŋɛ kaŋ fo, meeŋ shin nɛ b ji jɛrbi damta ga. Ma, Enyɛnpe Ebɔrɛ e kaŋɛ na.

¹³ N daŋ wu ekishisheŋ nɛ Samɛria be kadegboŋ na to be anebiana wora. B daa malga a sa basa ashi kegbir nɛ baa tre Baal na be ketre to nna, a shin nɛ ma basa bee foe ekpa.

¹⁴ Kumo be kaman nɛ n naŋ wu anebiana nɛ b wɔ Jerusalɛm to na ka wora kulubi nɛ k chɔ kusɔ nɛ Samɛria to be anebiana na wora na. B daa shuŋ agbir nna nsaa ku efɛ a ti so. Bumo alɛ daa chɛ basa to nna nɛ baa wora asɔ nɛ e maŋ daga. Ŋkpal loŋ so ekama daa wɔ asheŋ lubi be kewora to nna. Ma ere kutɔ, bumo kikɛ lubi nna fanɛ nde anyɔ nɛ baa tre Sodɔm nɛ Gomɔra na be basa.

¹⁵ Amoso, kusɔ nɛ ma, Enyɛnpetale Ebɔrɛ na bee kaŋɛ anebiana nɛ b wɔ Jerusalɛm to na e la fanɛ, meeŋ sa bumo ajibi kekera nɛ b ji nseŋ sa bumo nchu nɛ kɔrtɔ wɔ amo to nɛ b nuu, ŋkpal b ka shin nɛ ekama maa ŋana Ebɔrɛ ashi kasawule be kaplɛkama so so.”

¹⁶ Kumo be kaman nɛ Enyɛnpetale Ebɔrɛ na naŋ kaŋɛ Jerusalɛm to be basa na le: “Men sa maa nu asheŋ nɛ anebiana na bee kaŋɛ menyi na. Tama fuloŋ nɛ baa sa menyi. Asɔ nɛ bumo be nfɛra sa bumo nɛ baa kaŋɛ menyi, mannɛ kusɔ nɛ ŋ kaŋɛ.

¹⁷ Anebi fɛpoana ere bee kaŋɛ basa nɛ b kini kenu kusɔ nɛ ŋ kaŋɛ na nna fanɛ asheŋ beeŋ nyalɛ n sa bumo. Bumo alɛ nseŋ naa kaŋɛ kagbene kpakpasowuraana fanɛ b maaŋ ji jɛrbi kikɛ.”

¹⁸ Ndoŋ nna nɛ ma alɛ kaŋɛ bumo le: “Anebiana ere be ekama maŋ nyi Enyɛnpe Ebɔrɛ na be ashiri be nfɛra kikɛ. Bumo to be ekama maŋ naŋ pin mbe kubɔya to ŋko n nu ŋko n wɔtɔ lakal kusɔ nɛ e malga to.

¹⁹ B la basa lubi nna, amoso ma agbo du fanɛ afugboŋ nɛ k bee ber ga a ba kumu kpakpasowuraana so nna.

²⁰ Kumo alɛ maaŋ yige n ya fo fanɛ e ka beeŋ wora kusɔ kama nɛ e kre kewora na nna. Kachako bee ba nɛ ma basa e pin ade kikɛ ere to nɛnɛ.”

²¹ Nɛ Enyɛnpe Ebɔrɛ na naŋ kaŋɛ le: “Ma ere maŋ shuŋi anebiana ere ŋko m malga bumo kutɔ gba, ama amo nɛ amo kikɛ, ma ketre to nɛ b kraa malga a sa basa.

²² Nɛ b daŋ taga ma to nsaa nyi kusɔ nɛ k wɔ ma nfɛra to, b daa beeŋ bɔ ma kubɔya n sa ma basa nseŋ shin nɛ b chɛrga bumo be nfɛra n lar alubi be kewora to m bɛta m ba ŋ kutɔ.

²³ N la Ebɔrɛ nɛ e wɔ kaplɛkama nna mannɛ kaboŋ koŋwule nɛ n wɔ.

²⁴ Kaplɛkama maŋ wɔtɔ nɛ esa e ŋana ndoŋ nɛ m maaŋ wu mo. Ŋkpal manɛ so, n wɔ ebɔrɛso nɛ kasawule so be kaplɛkama nna.

²⁵ N nyi kusɔ nɛ anebiana ere bee ku efɛ a kaŋɛ kikɛ. B yɛ ma e naa sa bumo ma abɔya ashi bumo be edareana nɛ ebɔrɛdare to.

²⁶ Ama kusɔ kama nɛ baa kaŋɛ na shi bumo gbagba be nfɛra nɛ e maŋ niŋi na to nna. Bumo alɛ maaŋ tiŋ a wora loŋ mbaanaayɔ.

²⁷ Baa fɛ nna fanɛ edareana nɛ baa kute na beeŋ shin nɛ ma basa e teŋ ma so, fanɛ kananɛ bumo nananyɛnana daŋ kini ma nseŋ ya kaa shuŋ kegbir nɛ baa tre Baal na.

²⁸ Anebi kama nɛ e ku edare, e kaŋɛ fanɛ edare nɛ e ku. Anebi kama malɛ nɛ e nu ma kubɔya, e bɔ kubɔya na kashenteŋ be ekpa so. Ŋkpal manɛ so, kananɛ amimi kɔr ayu to na aloŋ nɛ edimɛdi be edare kɔr Ebɔrɛ be kubɔya to.

²⁹ Ma mmalga du fanɛ edɛgboŋ gboŋi nna nseŋ naa du fanɛ kebɛlso gbɛgbɛso nɛ k bee bure ajembu to.

^30-32 Anebi fɛpoana ere bee kaŋɛ fanɛ ma e naa sa bumo edareana nɛ baa ku na, ama efɛ nɛ baa ku. Ma ere maŋ lara bumo fanɛ ma anebiana, ama b wɔtɔ a ta ma ketre a ku efɛ nsaa yuri abar be mmalga a malga. Ma basa malɛ baŋ nu befɛpoana ere be mmalga baa foe ekpa nna a maa nya kechɛto ashi amo to. Amoso mee kpele menyi kusoe nna fanɛ anebiana ere la n doŋana nna. Ma, Enyɛnpe Ebɔrɛ e kaŋɛ na.”

Efɛ be abɔya nɛ anebi fɛpoana be asheŋ

³³ Ade be kaman nɛ Enyɛnpe Ebɔrɛ na kaŋɛ ma le: “Jɛremaya, nɛ ma basa to be eko ŋko anebi ko ŋko bɔrɛmatapo ko kaŋ bishi fo fanɛ nuso be kubɔya nɛ Enyɛnpe Ebɔrɛ na kɔ a sa anyi, fo kaŋɛ amodoŋwura le: ‘Menyi be asheŋ bee nu agbo nseŋ lar Enyɛnpe Ebɔrɛ na ebɔl nɛ e bee shin nɛ e kini menyi n lɛ nna.’

³⁴ Nɛ ma basa to be eko ŋko anebi ko ŋko bɔrɛmatapo ko malga ŋ kaŋɛ fanɛ baru ere shi Enyɛnpe Ebɔrɛ kutɔ nde gba, ŋ kraa beeŋ gberge bumo nɛ bumo be nnaŋ to be basa kusoe.

³⁵ Kusɔ nɛ k daga fanɛ bumo be ekama e bishi mo teriana nɛ kanaŋ to be basa e la fanɛ: ‘Manɛ nɛ Enyɛnpe Ebɔrɛ na kaŋɛ kashenteŋto?’

³⁶ Amoso b sa maŋ naa malga a kaŋɛ le: ‘Baru nɛ k shi Enyɛnpe Ebɔrɛ na kutɔ nde.’ Ŋkpal manɛ so, nɛ bumo to be ekama kaŋ kaŋɛ loŋ, meeŋ shin nɛ ma kubɔya e baa la awurfoŋ kashenteŋto n sa bumo. Basa na chɛrga bumo be Ebɔrɛ nɛ e bee sa ŋkpa nsaa la Enyɛnpetale na be mmalga nna kashenteŋto.”

³⁷ Jɛremaya, bishi anebiana na le: “Nuso be ketuwebi nɛ Enyɛnpe Ebɔrɛ na sa menyi ŋko manɛ nɛ e kaŋɛ menyi?”

³⁸ Nɛ b kaŋ kini nseŋ kraa malga a kaŋɛ le: “Baru nɛ k shi Enyɛnpe Ebɔrɛ na kutɔ nde.” Kumo ere fo kaŋɛ bumo fanɛ

³⁹ meeŋ pɛ bumo ŋ kpa n lɛ kufɔ nɛ b sa maŋ naŋ taga ma to. Kusɔ nɛ meeŋ wora bumo nɛ kadegboŋ nɛ n ta n sa bumo nɛ bumo nananyɛnana nna na.

⁴⁰ Meeŋ shin nɛ anishinyɔr nɛ ŋaba nɛ e maŋ kɔ ekar e ba bumo so nɛ b maaŋ teŋ kumo so kikɛ.