Jɛremaya 22 - EBƆRƐ BE KAWƆL

Enyɛnpe Ebɔrɛ ka beeŋ gberge Juda be Ewura kusoe be asheŋ

^1-2 Enyɛnpe Ebɔrɛ na daŋ kaŋɛ ma nna fanɛ n yɔ Juda be ewura be laŋ to n ya bɔ kubɔya ere n sa mo nɛ mbe benimuana na nɛ basa nɛ b daa wɔ ndoŋ na kikɛ.

³ E yɛ: “Ma, Enyɛnpe Ebɔrɛ na e naa kaŋɛ menyi kenishipereso na fanɛ men baa wora asheŋ nɛ e bɔla ekpa so nseŋ niŋi. Men baa kuŋ basa nɛ bumo braana bee puni bumo na nɛ b sa maa nya a puni bumo. Menyi alɛ e sa maa mɛaŋ ŋko a kɔrfɛ befɔ ŋko amunibi ŋko bekulpoche. Men sa maa mɔ basa nɛ b maŋ wora shɛŋ ashi kakpa cheembi ere.

⁴ Nɛ menyee wora kusɔ nɛ ŋ kaŋɛ menyi ere kenishipereso, kumo ere ewura Deevid be kaman to ebi beeŋ baa kraa ji kuwura ashi efuli na so. Kayurwushi beeŋ baa wɔtɔ nɛ bumo nɛ benimuana nɛ bumo be basa e baa luri egbaŋɛturko to a bɔla ewurkpa be mbunagboŋ to a luri a lar.

⁵ Ama nɛ men kini kenu n sa kusɔ nɛ mee kaŋɛ menyi kenishipereso ere, ŋ gbagba bee nase kɔnɔ ma ketre to nna fanɛ ewurkpa ere beeŋ ba ki kelambure n dese. Ma, Enyɛnpe Ebɔrɛ e kaŋɛ na.”

⁶ Kusɔ nɛ Enyɛnpe Ebɔrɛ na kaŋɛ a laŋɛ Juda be efuli so be ewurkpa be kaplɛa so nde: “Ma ere kutɔ, Juda be ewurkpa walɛ kebita nna fanɛ kananɛ Giliad be kasawule so nɛ Lebanɔn be abee so walɛ kebita na nna. Ama ma alɛ beeŋ shin nɛ k ki kakpa fuloŋ nɛ esa kikɛ maaŋ naa wɔ ndoŋ.

⁷ Meeŋ shuŋi basa nɛ b ba mur kumo. Baaŋ ta akpanfu m ba ku kumo be eshabɔrɛ nɛ b ta ndibi nɛ baa tre sida na be alela n wora na n lɛ edɛ to n chɔɔ.

⁸ Kumo be kaman befɔ damta beeŋ bɔla ndoŋ a choŋ nsaa bishi abar kusɔ nɛ k ba nɛ ma, Enyɛnpe Ebɔrɛ na mur kadegboŋ fanɛ Jerusalɛm le.

⁹ Ndoŋ nna nɛ beko e kaŋɛ fanɛ ŋkpal men ka kplaŋ ma nɛ menyi be kɔnɔkoŋwule be ŋkre so nseŋ ya kaa shuŋ nsaa bunyaŋ agbir pɔtɛana so nɛ m mur kumo.”

Ewura Jehowahaz be asheŋ

¹⁰ Juda be basa men sa maŋ shu ŋkpal ewura Josaya ka wu so. Ama menyeeŋ tiŋ n shu ga ŋkpal mo pibinyɛn, ewura Jehowahaz nɛ b pɛ a yɔ efuli pɔtɛ wɔfɔ so nɛ e maaŋ naŋ bɛta m ba ŋko n wu kasawule nɛ b kurge mo kumo so na so.

^11-12 Ŋkpal manɛ so, kusɔ nɛ Enyɛnpe Ebɔrɛ na kaŋɛ a laŋɛ Jehowahaz nɛ e la ewura Josaya pibinyɛn nseŋ daŋ ba sɔ mo tuto so n ji kuwura ashi Juda be efuli so na be kaplɛa so nde. E yɛ: “Ma, Enyɛnpe Ebɔrɛ na e nase kɔnɔ fanɛ e beeŋ ya wu ndoŋ nsaa maaŋ naŋ wu mo gbagba be kasawule kenishiso kikɛ.”

Ewura Jehowakim be asheŋ

^13-14 Nɛ Enyɛnpe Ebɔrɛ na kaŋɛ ma fanɛ ŋ kaŋɛ Juda be ewura popɔr, Jehowakim le: “Asheŋ maaŋ nyalɛ n sa fo, ŋkpal manɛ so, fo bɔla ekpa lubi so nna m pɔr fo ewurkpa nseŋ pɔr ebu gboŋgboŋiana kumo be awɔlto na. Kumo be kaman nɛ fo wɔtɔ etokurogboŋ nseŋ buu kumo so n ta ndibi nɛ baa tre sida na n tato, nseŋ naŋ ta asɔ nyɔɔso peper n nyɔɔ kowu na. Ama fo alɛ daŋ maŋ wora nɛnɛ. Fo daŋ tintiŋ bepɔrpo na nna nɛ b shuŋ nɛ fo kini keka bumo.

^15-16 Fo keta sida be ndibi damta m pɔr fo ewurkpa maa shin nɛ fee ki ewura lela a chɔ fo tuto Josaya. Mo ere daa wora asheŋ niŋiso nna. Kumo e la fanɛ e daa ji asheŋ nɛ amo be ekpa so nna a sa betirpo nseŋ daa la kashenteŋjipo. Kusɔ nɛ k bee ŋini fanɛ esa nyi ma kashenteŋto nna na. Amoso nɛ kebaawɔtɔ daŋ nyalɛ n sa fo tuto, nɛ e daa nya a ji nsaa nuu yila yila so nna na.

¹⁷ Ama fo ere, Jehowakim, kananɛ feeŋ wora m puni, ŋko nyaŋ fo basa n suge bumo be asɔ, ŋko m mɔ basa nɛ b maŋ wora shɛŋ be asheŋ e wɔ fo kagbene nɛ fo nfɛra to.”

¹⁸ Ama kusɔ nɛ Enyɛnpe Ebɔrɛ na kaŋɛ a laŋɛ Ewura Josaya pibinyɛn Jehowakim, nɛ fo la Juda be ewura na be kaplɛa so nde. E yɛ: “Esa kama maaŋ shu fo keeli ŋko ŋ kaŋɛ le: ‘Wooyo, n teri lela!’ Esa kikɛ maaŋ shu anishichubi ŋko m bugi kɔnɔ n shu ŋkpal fo so ŋ kaŋɛ le: ‘O n nyɛnpe! O ma ewura!’

¹⁹ Kananɛ baa puli ekurma na nɛ baaŋ puli fo alɛ gba. Baaŋ chɛ fo efɔl nna ŋ gberge fo n lar kadegboŋ na be kabunagboŋ na to n ya lɛ kemaŋ to nseŋ gbare eshishɛr m buu fo so.”

Kusɔ nɛ k beeŋ ba Jerusalɛm so be asheŋ

²⁰ Jerusalɛm to be basa, efuliana nɛ men yirda na kɔ n tɔr nsaa maŋ naa kɔ eleŋ. Amoso men yɔ Lebanɔn be efuli so, nɛ Bashan be kasawule so n ya shu anishichubi; nseŋ dii Mowab be abee so n ya shu awɔrso ndoŋ.

²¹ Jemanɛ nɛ asheŋ daa nite nɛnɛ a sa menyi na, Enyɛnpe Ebɔrɛ daŋ kpele menyi kusoe, ama men kini kenu n sa mo. Ma nɛ menyi ka fara m pin abar dra dra na kikɛ, menyi maŋ naŋ wora kusɔ Enyɛnpe Ebɔrɛ kaŋɛ menyi kikɛ.

²² Naniere menyeeŋ ji anishinyɔr ŋkpal menyi be alubi so. K beeŋ wora menyi fanɛ afu ka ber menyi be bejuŋkparpoana n yɔ, nɛ bedoŋ ba pɛ efuli pɔtɛana nɛ men daŋ yirda na be basa n yɔ efuli pɔtɛ wɔfɔ so nna.

²³ Men chena ewurkpa nɛ men ta Lebanɔn be efuli so be ndibi nɛ baa tre sida n lɔŋɛ na to nna nsaa maa fɔŋ shɛŋ so. Ama ŋ kaŋ shin nɛ ebesa fanɛ kakurge be ebesa ba menyi so na, nɛ menyi be asheŋ beeŋ baa keta kuwɔr.

Ebɔrɛ ka ji ewura Jehowachin demu be asheŋ

²⁴ Nɛ Enyɛnpe Ebɔrɛ na naŋ kaŋɛ ewura Jehowachin nɛ e sɔ mo tuto Ewura Jehowakim so a ji Juda be kuwura na le: “Ŋ ka baa la Enyɛnpe Ebɔrɛ nɛ e bee sa ŋkpa ere, nɛ fo e la kepinibi nɛ mee wɔtɔ ma enɔjiso to a ŋini ma kuwurji be eleŋ gba, ŋ kraa beeŋ pee fo ma keshilbi to n lɛ.

²⁵ Meeŋ ta fo n sa Babilɔn be ewura Nebukadneeza nɛ mbe benapo nɛ baa sha kemɔ fo nɛ fee ŋana bumo na.

²⁶ Ma alɛ beeŋ shin nɛ b pɛ fo nɛ fo nio n yɔ efuli pɔtɛ wɔfɔ nɛ b maŋ kurge menyi be ekama ndoŋ so, nɛ menyi benyɔ na kikɛ e ya wu ndoŋ.

²⁷ Menyi beeŋ baa sha kebɛta m ba men gbagba be efuli so, ama menyi alɛ maaŋ naŋ tiŋ m bɛta m ba.”

²⁸ Kumo be kaman nɛ Jɛremaya kaŋɛ le: “Ewura Jehowachin, fo ki fanɛ kapuya bureso nɛ b maa sha nna. Amoso baaŋ ta fo nɛ fo mbia kikɛ n ya lɛ efuli pɔtɛ wɔfɔ nɛ menyi maŋ nyi so.”

²⁹ O Juda be kasawule so be basa! Men kaŋ asoe n nu kusɔ nɛ Enyɛnpe Ebɔrɛ na kaŋɛ:

³⁰ “Kpra Ewura Jehowachin be mbia be atre ashi Juda be kuwurji be nwɔl to. E maŋ tiŋ n wora shɛŋ mbe kuwurji to, amoso mbe kebia kama maaŋ chena mo nananyɛn Deevid be kuwurputi so n ji kuwura ashi Juda be efuli so. Ma, Enyɛnpe Ebɔrɛ e malga na.”