Jɛremaya 21 - EBƆRƐ BE KAWƆL

B ka malga Jerusalɛm be kekɔ n tɔr be asheŋ

¹ Juda be efuli so be ewura, Zɛdikaya daŋ tre Malkiya pibinyɛn nɛ baa tre Pashɔ na nɛ Maseiya pibinyɛn nɛ baa tre Zefanaiya nɛ e la bɔrɛmatapo na nna n shuŋi ma kutɔ fanɛ b ba kaŋɛ ma le:

² “Jande Jɛremaya, malga Enyɛnpe Ebɔrɛ na kutɔ n sa anyi, ŋkpal manɛ so, Babilɔn be efuli so be ewura, Nebukadneeza nɛ mbe benapo e ba kulti Jerusalɛm n wɔtɔ a sha kekɔ anyi kena na. Ashere Enyɛnpe Ebɔrɛ na beeŋ wora mbe emamachisheŋ na be kuko n shin nɛ Nebukadneeza e yige anyi nseŋ bɛta n yɔ mbe efuli so.”

³ Ndoŋ nna nɛ Enyɛnpe Ebɔrɛ na malga ma kutɔ nɛ ma alɛ kaŋɛ basa nɛ ewura Zɛdikaya shuŋi ma kutɔ na fanɛ

⁴ b ya kaŋɛ mo fanɛ kusɔ nɛ Enyɛnpe, Israɛl be Ebɔrɛ na kaŋɛ nde: “Zɛdikaya, meeŋ shin nɛ Babilɔn be ewura nɛ mbe benapo e kɔ m pɔɔ fo benapo so. Ma alɛ beeŋ naŋ gama fo benapo na be akɔsɔ n deŋi abar so ashi kadegboŋ na be nferinto.

⁵ Meeŋ ta ma eleŋgboŋ kikɛ nɛ ma kanya agbogboŋ kikɛ ŋ kɔ menyi,

⁶ nseŋ shin nɛ alɔ lubi e mɔ edimɛdi nɛ asɔbɔya kikɛ ashi kadegboŋ na to.

⁷ Ama fo nɛ fo benimuana nɛ basa nɛ baaŋ ji efute ashi kena na nɛ akoŋ na nɛ alɔ lubi na to na bre, Babilɔn be ewura Nebukadneeza nɛ men doŋana nɛ baa sha kemɔ menyi na beeŋ pɛ menyi fanɛ anya nɛ ewura Nebukadneeza e ya mɔ menyi. E maaŋ yige menyi be ekoŋwule gba ŋko n wu menyi kuwɔr ŋko n shu menyi so. Ma, Enyɛnpe Ebɔrɛ na e kaŋɛ na.”

⁸ Kumo be kaman nɛ Enyɛnpe Ebɔrɛ na kaŋɛ ma fanɛ ŋ kaŋɛ Jerusalɛm be basa na le: “Men nu nfe! Ma, Enyɛnpe Ebɔrɛ na bee sa menyi ekpa nna nɛ men keni to n lara kumo nɛ menyee sha. Ekpa nɛ k bee yɔ ŋkpa to nɛ menyee sha ŋko kumo nɛ k bee yɔ luwu to nɛ menyee sha?

⁹ Esa kama nɛ e wɔ kadegboŋ na to beeŋ wu kena to ŋko akoŋ beeŋ mɔ mo ŋko e beeŋ lɔ n wu. Ama bekama nɛ baaŋ lar n ta bumo be amu n ya bɔɔ Babilɔnebi nɛ b kulti Jerusalɛm n wɔtɔ na enɔ bre beeŋ nya bumo be amu.

¹⁰ N teŋ wora ma nfɛra fanɛ meeŋ mur kadegboŋ na. Meeŋ sa Babilɔn be ewura ekpa nɛ e chɔɔ kumo m mur. Ma, Enyɛnpe Ebɔrɛ e kaŋɛ na.”

Demuji nɛ k bee ba Juda be bewura so be asheŋ

^11-12 Kede be kaman nɛ Enyɛnpe Ebɔrɛ naŋ kaŋɛ ma fanɛ n ta kubɔya ere n sa Ewura Deevid be kaman to ebi nɛ baa ji kuwura Juda be efuli so na. E yɛ: “Men nu kusɔ nɛ ma, Enyɛnpe Ebɔrɛ na bee kaŋɛ ere. Men baa ji asheŋ nɛ amo be ekpa so karechɛ kikɛ nsaa kuŋ bekama nɛ bumo braana bee puni bumo na. Nɛ men kini kebaawora loŋ, asheŋ lubi nɛ menyee wora ere beeŋ shin nɛ ma agbo e suse fanɛ edɛ nɛ e maaŋ tiŋ n duŋ kikɛ na.

¹³ Menyi Jerusalɛm be basa ka chena kebee so nsaa keni ataŋɛ to so, menyee fɛ fanɛ shɛŋ maaŋ tiŋ n wora menyi nna. Ama ma, Enyɛnpe Ebɔrɛ na nya agbo n wora menyi nna na.

¹⁴ Meeŋ gberge menyi kusoe ŋkpal kusɔ nɛ menyee wora so. Meeŋ shin nɛ edɛ e ji menyi be ewurkpa nseŋ chɔɔ kusɔ kama nɛ k kulti kumo na m mur. Ma, Enyɛnpe Ebɔrɛ e kaŋɛ na.”