Jɛremaya 20 - EBƆRƐ BE KAWƆL

Jɛremaya nɛ Bɔrɛmatapowura Pashɔ be asheŋ

¹ Bɔrɛmatapo Pashɔ, nɛ e la Imma pibinyɛn, nseŋ daa la Enyɛnpe Ebɔrɛ be bɔrɛlambu na to be bekumpo na be enimu na ka nu ŋ kaa bee bɔ asheŋ ere be kubɔya na,

² nɛ e shin nɛ b pɛ ma m bri nseŋ ta ŋgbɛlɛbi ŋ kre ma n nase ashi bɔrɛlambu na be kabunagboŋ nɛ baa tre Bɛnjamin be Kabunagboŋ na ase.

³ Kumo be ŋklade kachipurso, nɛ bɔrɛmatapo Pashɔ shin nɛ b saŋɛ ŋgbɛlɛbi na ashi ma so, nɛ ŋ kaŋɛ mo le: “Enyɛnpe Ebɔrɛ na daa maŋ nase fo ketre Pashɔ, ama Magɔ Missabib nɛ e ta n nase fo ketre; kumo be kifito e la Kebaaŋana kufu kusɔ kama to.

⁴ Enyɛnpe Ebɔrɛ na gbagba yɛ: ‘Meeŋ shin nɛ fo ta kufu m pɛ fo kumu nɛ fo teriana, nɛ bumo doŋana e ta etokobi m mɔ bumo fo anishito. Meeŋ ta Juda be efuli so be basa kikɛ m bɔɔ Babilɔn be efuli so be ewura enɔ nɛ e ji eleŋ bumo so. E beeŋ mɔ beko nseŋ pɛ beko fanɛ anya n yɔ mbe efuli so.

⁵ Ma alɛ beeŋ naŋ shin nɛ bumo doŋana e ba fuu kadegboŋ na to be asɔ lela kikɛ nseŋ suge kumo to be mpetɛsɔ kikɛ nyam, hale Juda be bewuraana be amansherbi nɛ yawu kpakpaso be asɔ, n sulɔ amo kikɛ n yɔ Babilɔn be efuli so.

⁶ Baaŋ pɛ fo, Pashɔ nɛ fo kanaŋ kikɛ, fanɛ anya n yɔ Babilɔn be efuli so. Fo nɛ fo teriana nɛ fee ku efɛ damta a sa na kikɛ beeŋ wu nɛ b puli menyi ndoŋ.’ ”

Jɛremaya ka fubel n sa Enyɛnpe Ebɔrɛ be asheŋ

⁷ Enyɛnpe Ebɔrɛ, fo kɔ eleŋ a chɔ ma, fo alɛ pɔɔ ma so nna kashenteŋto. Ama kewora ma fanɛ fo kplaŋ ma so nɛ asheŋ bri ma nna. Ekama bee wora ma eyur to nna a mushe ma karechɛ kikɛ.

⁸ Jemanɛ kikɛ nɛ k daga fanɛ m malga, kemur nɛ luwu be asheŋ nɛ mee malga. Enyɛnpe Ebɔrɛ, fo kubɔya nɛ mee bɔ na bee bar ma katege nɛ etɔrɔ nawule nna.

⁹ Ama nɛ ma alɛ baŋ kaŋɛ fanɛ meeŋ teŋ Enyɛnpe Ebɔrɛ na so nsaa maŋ naa yili mbe katelamu to a malga, fo kubɔya na bee ki fanɛ edɛ nna a chɔɔ ma kagbene to nɛ ma awibi to. Mee wora ania fanɛ meeŋ nyaŋ ma kumu, ama ma alɛ maa tiŋ a lo ma kɔnɔ.

¹⁰ Mee nu ekama ka bee kuli a kaŋɛ le: “Kufugboŋ e sɔ kaplɛkama! Amoso men shin nɛ an potii Jɛremaya n sa benimuana na!” N teri kpakpasoana gba bee jo nna nɛ n wora n da so. Kusɔ nɛ baa kaŋɛ e la fanɛ: “Ashere esa beeŋ tiŋ n fule Jɛremaya nɛ e wora n da so nɛ an nya mo m pɛ ŋ ka mo kukɔ.”

¹¹ Ama fo, Enyɛnpe Ebɔrɛ, nɛ fo shi ga nsaa kɔ eleŋ na ka wɔ ma kaman so, bekama nɛ baa kɔrfɛ ma na beeŋ wora ŋ gben. Baaŋ ji anishinyɔr mbaanaayɔ, ŋkpal manɛ so, b maaŋ nya kusɔ nɛ baa fin ma so na. Esa kama maaŋ teŋ bumo be ŋaba na so kikɛ.

¹² O Enyɛnpetale Ebɔrɛ, fo e naa wora basa niŋiso a keni nsaa pin kusɔ nɛ k wɔ bumo be ŋgbene nɛ nfɛra to. Amoso shin nɛ n wu fo kaa ka n doŋana kukɔ n tal to. Ŋkpal manɛ so, fo nɛ n ta ma asheŋ tirso m bɔɔ enɔ.

¹³ Mee boŋ nshɛ a kpaŋ fo, Enyɛnpe Ebɔrɛ na nna. Fo e naa kɔ a suge basa nɛ asheŋ du bumo so kpakpa ashi amu kpakpasowuraana be enɔ to.

¹⁴ Shoduu e baa wɔ kachɛ nɛ b kurge ma na so! A maŋ daga fanɛ b baa nyiŋi kachɛ nɛ n nio kurge ma na be asheŋ!

¹⁵ Shoduu e baa wɔ esa kama nɛ e bar baru m ba sa n tuto fanɛ mbo eche kurge ebinyɛn nɛ mbe kagbene fuli mo ŋkpal loŋ so na so.

¹⁶ Ebɔrɛ e shin nɛ amodoŋwura e ki fanɛ ndegboŋ nɛ Enyɛnpe Ebɔrɛ daa maŋ wu kuwɔr nseŋ mur amo na. Ebɔrɛ e shin nɛ e baa nu kushu be asheŋ kachipurso kikɛ nsaa nu kena be asheŋ kapaso kikɛ.

¹⁷ Amodoŋwura daga luwu nna, ŋkpal e ka maŋ mɔ ma jemanɛ nɛ ŋ kraa wɔ n nio be epun to na; saŋɛ na so meeŋ baa la kebia nɛ mo nio kurge mo nɛ e laŋɛ.

¹⁸ Manɛ so nɛ b kurge ma bre? Kebaa kaa wɔ etɔrɔ nɛ awurfoŋ to a ji anishinyɔr n ya wu so nɛ b kurge ma a?