Jɛremaya 19 - EBƆRƐ BE KAWƆL

Kapuya nɛ k bure na be asheŋ

¹ Nɛ Enyɛnpe Ebɔrɛ na kaŋɛ ma fanɛ n ya tɔ kapuya nɛ b ta ebɔ m pɔr. Kumo be kaman nɛ ŋ keta basa na to be benimuana na be beko nɛ bɔrɛmatapoana na to be bejuŋkparpo nɛ ekama nyi bumo na n ti ma kumu so

² m bɔla kabunagboŋ nɛ baa tre Mpuya bureso be Kabunagboŋ na to n yɔ ketaŋɛ nɛ baa tre Hinnɔm be Ketaŋɛ na to n ya bɔ kubɔya nɛ e beeŋ sa ma ndoŋ na n sa bumo.

³ An ka yɔ ndoŋ nɛ Enyɛnpe Ebɔrɛ na kaŋɛ ma fanɛ ŋ kaŋɛ bumo le: “Juda be efuli so be bewura nɛ Jerusalɛm to be basa, men nu kusɔ nɛ ma, Enyɛnpetale Israɛl be Ebɔrɛ na kɔ nɛ ŋ kaŋɛ menyi. Meeŋ bar tɔrɔ gboŋgboŋi nfe nɛ k chinchiŋ esa kama nɛ e beeŋ nu kumo be asheŋ.

⁴ Meeŋ shin nɛ le e wora ŋkpal basa na ka kini ma n lɛ nseŋ ya kaa lara esarga a sa agbirana nɛ bumo gbagba ŋko bumo nanaana ŋko Juda bewuraana maŋ nyi shɛŋ a laŋɛ amo be kaplɛa so na nseŋ shin nɛ kakpa ere wora eyurpi daŋkare be ekpa so. B mɔ basa damta nɛ b maŋ wora shɛŋ n nase nfe be kaplɛkama,

⁵ nseŋ pɔr agbirsure n yili abeebi so n sa kegbir nɛ baa tre Baal na, saŋɛ na so baaŋ baa chɔɔ bumo be mbia a lara esarga amo so a sa kegbir na. Ma alɛ maŋ yili kumo loŋ n sa bumo. Loŋ maŋ naŋ ba ma nfɛra to gba kuraa.

⁶ Amoso, men baa da so! Kachako bee ba nɛ b maa naa tre kakpa ere Tɔfɛf ŋko Hinnɔm be Ketaŋɛ. Ama baaŋ baa tre kumo Kamɔ be Ketaŋɛ.

⁷ Juda be efuli so nɛ Jerusalɛm to be basa beeŋ tiŋ a kɔ ŋkre gboŋ, ama meeŋ shin nɛ e to jiga ashi ketaŋɛ ere to. Meeŋ shin nɛ bumo doŋana e ba kɔ bumo kena m pɔɔ bumo so nseŋ mɔ bumo n lɛ nɛ mbuibi nɛ kupuŋ to be asɔbɔya e ji bumo.

⁸ Meeŋ shin nɛ Jerusalɛm be kadegboŋ na e ki alambure a dese nɛ k chinchiŋ nseŋ ta kufu m pɛ bekama nɛ baaŋ baa bɔla ndoŋ a choŋ na.

⁹ Bedoŋ beeŋ ba kulti kadegboŋ na n wɔtɔ a fin kebure egbalana n luri m mɔ kumo to be basa. Ajibi beeŋ loge kadegboŋ na to nɛ basa na e baa mɔ bumo braana nɛ bumo be mbia gba a we ŋkpal akoŋ so.”

¹⁰ Kumo be kaman nɛ Enyɛnpe Ebɔrɛ na naŋ kaŋɛ ma fanɛ m bure kapuya na ashi basa nɛ ma nɛ bumo yɔ na be anishito

¹¹ nseŋ kaŋɛ bumo kusɔ nɛ e bee shin nɛ e kaŋɛ ere. E yɛ: “Meeŋ shin nɛ Juda be efuli na nɛ Jerusalɛm be kadegboŋ ere e bure fanɛ kananɛ kapuya ere bure nsaa maŋ naa kɔ kebela n chuge abar so ere. Basa beeŋ ta bumo be bubuni m ba kaa puli Tɔfɛf nfe, ŋkpal manɛ so, kakpa maaŋ naa wɔtɔ kaplɛkama nɛ b baa puli bubuni.

^12-13 Meeŋ shin nɛ bubuni e sɔ Jerusalɛm be kadegboŋ na to kikɛ nɛ k wora eyurpi daŋkare be ekpa so fanɛ kananɛ Tɔfɛf wora eyurpi daŋkare be ekpa so na. Ma alɛ beeŋ shin nɛ loŋ a wora ŋkpal menyi nɛ men be bewura ka bee dii menyi be achoŋi so a chɔɔ eduwu a sa achɛkpabi fanɛ amo alɛ ka la agbir na. Menyi alɛ naa ta yabra a to nchu a sa agbir pɔtɛana.”

¹⁴ Kumo be kaman nɛ n lar kakpa nɛ Enyɛnpe Ebɔrɛ shuŋi ma nɛ n ya bɔ mbe kubɔya nɛ baa tre Tɔfɛf na, n ya yili bɔrɛlambu na be kelɔnɛ so ŋ kaŋɛ basa na kikɛ

¹⁵ fanɛ Enyɛnpetale, Israɛl be Ebɔrɛ na yɛ: “Meeŋ shin nɛ kasogberge nɛ ŋ kaŋɛ fanɛ meeŋ bar kadegboŋ ere nɛ nde kama nɛ e kulti kumo na so na kikɛ e ba amo so, ŋkpal menyi be ŋgbene ka du kpakpa nɛ menyi maa nu a sa ma mmalga so.”