Jɛremaya 18 - EBƆRƐ BE KAWƆL

Jɛremaya ka yɔ mpuliya pɔrpo kutɔ be asheŋ

¹ Ade kikɛ be kaman nɛ Enyɛnpe Ebɔrɛ na kaŋɛ ma le:

² “Yɔ esa nɛ e bee pɔr mpuliya be laŋ to nɛ n ya sa fo kubɔya ko ndoŋ.”

³ Ndoŋ nna nɛ n yɔ ndoŋ nɛ epɔrpo na wɔ mbe eshuŋkpa.

⁴ E baŋ pɔr kapuliya nɛ k maŋ nyalɛ, e bee bure kumo nna nseŋ ta ebɔ na m pɔr kepɔtɛ.

⁵ Kumo be kaman nɛ Enyɛnpe Ebɔrɛ na naŋ kaŋɛ le:

⁶ “Israɛl be basa, ma, Enyɛnpe Ebɔrɛ na kɔ ekpa nɛ n ta menyi n wora kusɔ nɛ mee sha, fanɛ kananɛ esa nɛ e bee pɔr mpuliya na bee ta ebɔ na a wora na nna.

⁷ Nɛ m baŋ kre kemur efuli ko ŋko kuwurgboŋ ko cheche,

⁸ nɛ efuli na so be basa tuba nseŋ yige bumo be asheŋ lubi na be kebaawora, m maaŋ naŋ wora kusɔ nɛ n daŋ kre kewora bumo na.

⁹ Ama nɛ ŋ ka kaŋɛ fanɛ meeŋ wora efuli ŋko kuwurgboŋ ko eleŋ to n ti so,

¹⁰ nɛ efuli na so be basa kini kewora ma kasonu nseŋ wora asheŋ lubi, m maaŋ naŋ wora kelela nɛ n daŋ kaŋɛ fanɛ meeŋ wora bumo na.

¹¹ Amoso kaŋɛ Juda nɛ Jerusalɛm be basa fanɛ n teŋ kre nseŋ wora shiriya nɛ ŋ gberge bumo kusoe. Kaŋɛ bumo b yige asheŋ lubi be kebaawɔtɔ na nseŋ fara a wora asheŋ niŋiso.

¹² Ama baaŋ kaŋɛ le: ‘Ayai, manɛ so nɛ anyee yige kumo? Anyi kikɛ kraa beeŋ baa wɔ ŋgbene kpakpaso to nsaa wora asheŋ lubi kananɛ anyee sha.’ ”

Basa na ka kini Enyɛnpe Ebɔrɛ n lɛ be asheŋ

¹³ Kumo be kaman nɛ Enyɛnpe Ebɔrɛ naŋ kaŋɛ le: “Bishi efuli kama so be basa fanɛ le be kesheŋ daŋ wora ŋ ku so a? Israɛl be basa wora kesheŋ lubi lubi ko!

¹⁴ Kenyɔlɔ nɛ k wɔ Lebanɔn be kebee so na maa ŋalga a loge kikɛ nɛ kumo so be mbombiana maa wɔlto kikɛ.

¹⁵ Ama ma basa bre teŋ ma so nna nseŋ lar ma kaman n ya kaa chɔɔ eduwu a sa agbirana. B daŋ yige ekpa nɛ k daga fanɛ b baa bɔla so a wora asheŋ nna, nseŋ ya kaa bɔla ekpa popɔr so a shuŋ agbir; nɛ k wora fanɛ b ka fiti n tɔr na.

¹⁶ B shin nɛ kasawule na ki kufugboŋ be kakpa nna nɛ ekama ta kumo fanɛ kusɔ fuloŋ a keni kumo jiga. Asɔ nɛ basa nɛ baa bɔla kumo so bee wu na bee chinchiŋ bumo nna nɛ baa fifi amu.

¹⁷ Meeŋ shin nɛ ma basa e pesaŋ to ashi bumo doŋana be anishito fanɛ kalabɛr nɛ epeŋilarkpa be afu bee chela a yɔ na. Meeŋ pal kaman n sa bumo. Kemurgboŋ be jemanɛ, m maaŋ chɛ bumo to.”

B ka to jina a laŋɛ Jɛremaya be kemɔ be kaplɛa so be asheŋ

¹⁸ Ndoŋ nna nɛ basa na kaŋɛ abar le: “Men shin nɛ an to jina a laŋɛ kananɛ anyeeŋ nya Jɛremaya m mɔ be kaplɛa so. Bɔrɛmatapoana beeŋ baa wɔtɔ jemanɛ kikɛ a ŋini anyi asheŋ, nɛ benyiashempo e baa ji anyi asoe to nɛ anebiana malɛ e baa bɔ Ebɔrɛ be kubɔya na a sa anyi. Men shin nɛ an nya kulubi ko ŋ ku n deŋi mo. Saŋɛ na so anyeeŋ tiŋ a kini kebaanu kusɔ kama nɛ e bee kaŋɛ.”

¹⁹ Ndoŋ nna nɛ Jɛremaya kule Ebɔrɛ ŋ kaŋɛ le: “Enyɛnpe Ebɔrɛ, nu kusɔ nɛ mee kaŋɛ fo ere nseŋ naŋ nu kusɔ nɛ ma doŋana bee malga a laŋɛ ma kaplɛa so.

²⁰ N wora ania fanɛ meeŋ chɛ bumo to, ama baa kre keta kulubi nna ŋ ka ma kukɔ. K du fanɛ b kaa kur kemaŋ nna n nase nɛ n tɔr kumo to. Jemanɛ ko n daŋ kule fo fanɛ fo sa maŋ nya agbo ŋ gberge bumo kusoe.

²¹ Ama naniere, Enyɛnpe Ebɔrɛ, shin nɛ akoŋ a mɔ bumo be mbia ŋko shin nɛ b wu kena to. Kumo e la fanɛ fo shin nɛ benyɛn na e lɔ n wu nɛ mbrantiafɔlbi na malɛ e wu kena to, saŋɛ na so beche na beeŋ paŋ bumo kulana nɛ bumo be mbia.

²² Enyɛnpe Ebɔrɛ, basa ere kur amaŋ nna fanɛ n tɔr amo to nseŋ naŋ fe ajigbelɛ a jo ma. Jemanɛ nɛ bedoŋ be benapo beeŋ ba kɔ bumo kena ashi bumo be elaŋana to na, shin nɛ kufugboŋ e tɔr bumo so nɛ b baa shu a boŋ to.

²³ Ama Enyɛnpe Ebɔrɛ, fo nyi ejina nɛ b to a laŋɛ ma kemɔ be kaplɛa so be asheŋ. Amoso nya agbo n wora bumo nsaa maŋ ta bumo be alubi m paŋ bumo. Shin nɛ b kɔ n tɔr.”