Jɛremaya 17 - EBƆRƐ BE KAWƆL

Juda be kulubi nɛ kasogberge be asheŋ

¹ Nɛ Enyɛnpe Ebɔrɛ na kaŋɛ: “Juda be basa, menyi be alubi maaŋ tiŋ ŋ kpra kikɛ; ŋkpal manɛ so, e sibɛ a deŋ menyi be ŋgbene so nna fanɛ b ka shɛl amo n deŋi kejembu so ŋko menyi be ebɔrɛsure be ekarso na nna.

^2-3 Menyi be basa yuu nnyamase be agbirsure nna a shuŋ kegbirche nɛ baa tre Ashira na ashi efuli na so be abeebi nɛ abeegboŋ nɛ ndibigboŋ nɛ e kɔ afantaŋ ga kikɛ be afito. Amoso meeŋ ta asɔ nɛ men kɔ kikɛ nɛ menyi be agbirsure n ti so n sa men doŋana.

⁴ Ŋkpal kusɔ nɛ men wora na so, menyeeŋ paŋ kasawule nɛ n sa menyi na, kumo be kaman nɛ n shin nɛ men shuŋ men doŋana ashi kasawule nɛ menyi maŋ nyi shɛŋ a laŋɛ kumo be kaplɛa so. Ŋkpal manɛ so, ma agbo du fanɛ edɛ nɛ k maa duŋ mbaanaayɔ nna.”

Mmalga be yiri yiri be asheŋ

⁵ Kumo be kaman nɛ Enyɛnpe Ebɔrɛ na kaŋɛ le: “Meeŋ shoduu bekama nɛ b pal kaman n sa ma nseŋ ta bumo be yirda n deŋi edimɛdi nɛ bumo be eleŋ so.

⁶ Baaŋ baa du fanɛ keshishɛrsawule so be afitiri nɛ e kɔr kasawule jiga nɛ k maŋ kɔ kayul nsaa kɔ nfɔl nɛ shɛŋ shɛŋ maa tiŋ a kɔr kumo so na nna. Bɔrɛ ba kumo so gba, k maa sɔ nchu a wora kayul.

⁷ Ama meeŋ nɛfa esa kama nɛ e ta mbe yirda n deŋi ma, Enyɛnpe Ebɔrɛ na so.

⁸ Amodoŋwura beeŋ baa du fanɛ kedibi nɛ k yili m mata kabombi nna nsaa teŋi kumo be nliŋi a yɔ nchu na to nna. Kakpa baŋ bel edɛ gba k maa ŋana kufu, ŋkpal k ka kɔ afantaŋ bumbuŋ jemanɛ kikɛ so. Bɔrɛ maŋ ba gba k maa fɔŋ shɛŋ so, kumo ere bee sɔr kumo be asɔrso nna.

⁹ Menyi Juda be basa la basa nɛ baa fule nna pasaa. Men fule men gbagba be amu, menyi alɛ maaŋ tiŋ n chɛrga kumo to.

¹⁰ Ama ma, Enyɛnpe Ebɔrɛ na bee keni basa be nfɛra to nsaa wora bumo be ŋgbene a keni a nyi amo to nna. Kebaawɔtɔ nɛ ekama kɔ ŋko kusɔ nɛ e bee wora nɛ mee yili so a ka mo kukɔ.”

¹¹ Esa kama nɛ e bee puni a nya amansherbi du fanɛ kabuibi nɛ e bee pugi afule nɛ e maŋ to so nna. Jemanɛ nɛ e beeŋ daŋ n yili na nɛ e beeŋ paŋ amansherbi na, kumo be lalaloge nɛ e ki fanɛ ewulpo.

¹² Anyi be bɔrɛlambu du fanɛ kemaŋkura be kuwurputi nɛ k yil kebee jeŋgreŋ so sososo na kikɛ nna.

¹³ O Enyɛnpe Ebɔrɛ, fo du fanɛ kubuye nɛ k bee sa Israɛl nchu nɛ e bee sa ŋkpa nɛ tama nna. Bekama nɛ b kplaŋ fo so bee ji anishinyɔr nna. Baaŋ foe basa be anishi so fanɛ b ka wu n yɔ bubuni to na.

Jɛremaya ka kule Ebɔrɛ be kechɛto be asheŋ

¹⁴ Enyɛnpe Ebɔrɛ, chɛ ma to nɛ n nya alenfia. Mɔlga ma nɛ n nya ma kumu kashenteŋto. Ŋkpal manɛ so, fo nawule nɛ mee kpaŋ!

¹⁵ Le nɛ Juda be basa bee kaŋɛ ma: “Jɛremaya, fee kaŋɛ anyi fanɛ kusɔ nɛ Enyɛnpe Ebɔrɛ na bee kaŋɛ a gbiti anyi nde. To, nɛ manɛ nna nɛ k maŋ wora m bɔlɔ so kashenteŋto?”

¹⁶ Ama Enyɛnpe Ebɔrɛ, fo e lara ma fanɛ m baa keni fo basa so fanɛ anebi, kumo alɛ nɛ mee wora na. Fo nyi ma kɔnɔ to be mmalga kikɛ. Ma alɛ maŋ naŋ kaŋɛ fo kachɛ koŋwule gba fanɛ fo gberge bumo kusoe.

¹⁷ N yirda fo nna nɛ fo baa kuŋ ma tɔrɔ be jemanɛ. Amoso sa maŋ shin nɛ m baa lɔ kufu.

¹⁸ Enyɛnpe Ebɔrɛ, shin nɛ basa nɛ baa kɔrfɛ ma na e ji anishinyɔr, ama baa kuŋ ma nɛ n sa maŋ ji nyɔmɔ. Kumo be kaman nɛ fo shin nɛ kufugboŋ e tɔr bumo so nseŋ naŋ shin nɛ b mur ga.

¹⁹ Ndoŋ nna nɛ Enyɛnpe Ebɔrɛ kaŋɛ ma le: “Jɛremaya, yɔ Jerusalɛm be kabunagboŋ nɛ baa tre Basa be Kabuna nɛ Juda be bewura bee bɔla to a luri a lar na ase n ya bɔ ma kubɔya ndoŋ. Kumo be kaman nɛ fo naŋ yɔ mbuna nɛ a ka na ase n ya wora loŋ.

²⁰ Kaŋɛ Juda be basa nɛ bewuraana nɛ bekama nɛ b wɔ Jerusalɛm to nsaa bɔla mbunagboŋana na to a luri a lar na fanɛ b nu kusɔ nɛ mee kaŋɛ ere.

²¹ Kaŋɛ bumo fanɛ nɛ baa sha bumo be ŋkpa, b sa maŋ kaa sulɔ asɔ kewushiachɛ. B sa maŋ kaa sulɔ shɛŋ a bɔla mbunagboŋ na to a luri ŋko a lar Jerusalɛm to.

²² Bumo alɛ e sa maŋ kaa sulɔ asɔ a lar bumo be elaŋana to gba ŋko a shuŋ kewushiachɛ na. A daga fanɛ b baa ta kumo fanɛ kachɛ cheembi nsaa maa shuŋ shɛŋ fanɛ kananɛ n yili kumo n sa bumo nananyɛnana na.

²³ Bumo nananyɛnana bre daŋ maŋ nu m bɛ kusɔ nɛ ŋ kaŋɛ na so. Ama b daŋ wora bumo be ŋgbene kpakpa nseŋ kini kewora ma kasonu ŋko kekoya asheŋ ashi ŋ kutɔ nna.

²⁴ To, kaŋɛ basa na fanɛ a daga fanɛ b baa wora ma mmalga naseso kikɛ kasonu. A maŋ daga b baa sulɔ esulɔ kikɛ a bɔla mbunagboŋ na to a luri kadegboŋ na to kewushiachɛ kikɛ. A daga fanɛ b baa ta kewushiachɛ na fanɛ kachɛ cheembi nsaa maa shuŋ kushuŋ kikɛ kuraa.

²⁵ Saŋɛ na so ewura Deevid be kanaŋ to ebi beeŋ baa ji kuwura ashi Juda be efuli so nɛ Jerusalɛm to. Kumo be kaman, Juda be efuli so nɛ Jerusalɛm to be basa kikɛ beeŋ baa dii egbaŋɛ nɛ egbaŋɛturko. Basa damta malɛ beeŋ ba bɔlɔ Jerusalɛm be kadegboŋ na to a wɔtɔ.

²⁶ Basa beeŋ shi Juda be efuli so be ndeana to nɛ ndekarso nɛ e kulti Jerusalɛm na to m ba. Baaŋ shi Bɛnjamin be yiri be kasawule so nɛ abeemase nɛ abeesawule so nɛ keshishɛrsawule nɛ e wɔ Juda be efuli so be kelargato be kaseto be kaba so na nna m ba. Esarga be yiri yiri fanɛ esarga chɔɔso nɛ ayu be esarga nɛ kapandi be esarga nɛ eduwu be sarga nɛ baaŋ baa ta a ba ma bɔrɛlambu to.

²⁷ Ama a daga fanɛ b baa wora ma kasonu nsaa ta ma kewushiachɛ na fanɛ kachɛ cheembi nsaa maa sulɔ asɔ a bɔla Jerusalɛm be mbunagboŋana na to a luri a lar loŋ be kachɛ na. Nɛ b kini nseŋ wora loŋ, meeŋ shin nɛ Jerusalɛm be mbunagboŋana na e ji edɛ. Jerusalɛm to be ewurkpaana beeŋ ji edɛ n tɔr nɛ esa kikɛ maaŋ tiŋ n duŋ edɛ na.”