Jɛremaya 16 - EBƆRƐ BE KAWƆL

Kusɔ nɛ Enyɛnpe Ebɔrɛ bee sha Jɛremaya ka wora be asheŋ

¹ Ndoŋ nna nɛ Enyɛnpe Ebɔrɛ na naŋ kaŋɛ ma le:

² “Sa maŋ ta eche ŋ kurge mbia ashi kakpa ere.

³ Meeŋ kaŋɛ fo kusɔ nɛ k beeŋ wora mbia nɛ bumo nioana nɛ bumo betutoana kurge nfe.

⁴ Alɔ nɛ kena nɛ akoŋgboŋ beeŋ mɔ bumo, nɛ ekama maaŋ shu bumo be nli ŋko m puli bumo gba kuraa. Bumo be kebuniana beeŋ dese ŋ ki keji n sa mbuibi nɛ kupuŋ to be asɔbɔya.

⁵ Nɛ esa baŋ wu, sa maŋ kaŋ yɔ keelibuna na n ya chɔrɔ kanaŋ na ŋko a wora kuwɔr be asheŋ. M maaŋ naŋ sha ŋko n nɛfa ŋko n wu Juda be basa kuwɔr kikɛ.

⁶ Betirpo nɛ damawuraana kikɛ beeŋ wu kasawule ere so, nɛ esa kikɛ maaŋ shu bumo be nli ŋko m puli bumo gba kuraa. Menyi to be ekama maaŋ ku mbe eyur ŋko n she mbe emin a ŋini fanɛ mbe kagbene jija mo ŋkpal esa ko ka wu so.

⁷ Esa kikɛ malɛ maaŋ lolo mo barkasa nseŋ tu mo n ji ŋkpal mbe eshapo ko ka wu so. Hale esa mo nio ŋko mo tuto wu gba, ekama maaŋ tu mo n shu keeli.

⁸ Fo alɛ e sa maŋ ta keya n cha laŋ kama nɛ baa ji a nuu nsaa ji eyur kumo to n ya tu bumo n ji nseŋ nuu.

⁹ Kaŋ kusoe n nu kusɔ nɛ ma, Enyɛnpetale, Israɛl be Ebɔrɛ na kɔ nɛ ŋ kaŋɛ nseŋ kpele Juda be basa kusoe fanɛ meeŋ shin nɛ kagbenewushi nɛ kagbenefuli be nshɛ nɛ kejafɔ to be awɔr nɛ baa kaa chɛ na e fo ekar.

¹⁰ Fo kaŋ kaŋɛ bumo ade kikɛ, baaŋ bishi fo fanɛ manɛ so nɛ mee sha kegberge bumo kusoe ga loŋ? Bumo alɛ beeŋ naŋ bishi kusɔ nɛ b wora n jija nɛ kulubi nɛ b wora n da Enyɛnpe bumo be Ebɔrɛ na so.

¹¹ Saŋɛ na so feeŋ kaŋɛ bumo fanɛ Enyɛnpe Ebɔrɛ na kaŋɛ. E yɛ: ‘Men nananyɛnana daŋ lar ma kaman nna nseŋ ya kaa shuŋ nsaa bunyaŋ agbir pɔtɛana. B daŋ kini ma n lɛ nsaa maŋ naa bɛ ma mbraana so. Bumo alɛ daa maŋ naa wora ma keŋini kasonu.

¹² Ama menyi ere wora asheŋ lubi nɛ a chɔ men nananyɛnana peya. Menyi kikɛ be ŋgbene du kpakpa nna nseŋ lubi. Menyi alɛ maa nu a sa ma.

¹³ Ŋkpal loŋ so meeŋ lara menyi ashi kasawule ere so nseŋ kpa menyi n lɛ kasawule nɛ menyi ŋko men nananyɛnana maŋ nyi so, nɛ kapa nɛ kanyɛ men ya kaa shuŋ agbir ndoŋ. Ma alɛ maaŋ wu menyi kuwɔr.’ ”

Keshi efuli pɔtɛ so m bɛta m ba be asheŋ

¹⁴ Ade be kaman nɛ Enyɛnpe Ebɔrɛ na naŋ kaŋɛ le: “Jemanɛ ko bee ba nɛ basa maaŋ naŋ bɔ ntaŋ ŋ kaŋɛ fanɛ ma, Ebɔrɛ nɛ e bee sa ŋkpa e lara Israɛl be basa ashi Ijipt be efuli so dra dra na.

¹⁵ Ama baaŋ baa bɔ ntaŋ a kaŋɛ fanɛ ma, Ebɔrɛ nɛ e bee sa ŋkpa e lara Israɛl be basa ashi kelargato be esoso be kaba so be efuli ko so nɛ efuli pɔtɛana nɛ n daŋ tintiŋ bumo n yɔ na so. Ma alɛ beeŋ naŋ bɛta bumo m ba bumo gbagba be efuli nɛ n daŋ ta n sa bumo nananyɛnana na so. Ma, Enyɛnpe Ebɔrɛ e kaŋɛ na.”

Kasogberge nɛ k bee ba be asheŋ

¹⁶ Kumo be kaman nɛ Enyɛnpe Ebɔrɛ na kaŋɛ le: “Mee shuŋi bedoŋ nna nɛ b ba pɛ menyi fanɛ ekɔrɔtɔ nseŋ naŋ mɔ menyi fanɛ bekpampo ka mɔ kupuŋ to be asɔbɔya ashi abeegboŋ nɛ abeebi so nɛ abeelaŋ to na.

¹⁷ Mee wu kusɔ kama nɛ baa wora nɛ shɛŋ maŋ ŋana ma so. Bumo be alubi maa baŋ ma kenishi so.

¹⁸ Meeŋ shin nɛ b ka bumo be alubi nɛ asheŋ jiga be akɔ ntuŋ anyɔso, ŋkpal manɛ so, b ta agbirana nɛ e maŋ kɔ ŋkpa fanɛ bubuni nɛ ŋ kishi amo be asheŋ na m ba sɔ ma kasawule so be kaplɛkama n shin nɛ k wora eyurpi daŋkare be ekpa so.”

Jɛremaya ka kule Ebɔrɛ be asheŋ

^19-20 Enyɛnpe Ebɔrɛ, kewora fanɛ fo ka ta ma nna n wɔtɔ kakpa lempo a kuŋ ma nsaa sa ma eleŋ, a chɛ ma to ashi tɔrɔ be jemanɛ. Efuli pɔtɛana be basa beeŋ shi durnya to be mboŋ wɔfɔ m ba fo kutɔ m ba kaŋɛ le: “An nananyɛnana daŋ lɔŋɛ agbirana nɛ e maa ji kashenteŋ nsaa maa kɔ tɔnɔ kikɛ n sa bumo na nna.”

²¹ Kumo be kaman nɛ Enyɛnpe Ebɔrɛ na kaŋɛ: “Amoso nɛ meeŋ ŋini efuli pɔtɛana na be basa ma eleŋgboŋ nɛ b pin to fanɛ ma e la Enyɛnpe Ebɔrɛ kashenteŋto.”