Jɛremaya 15 - EBƆRƐ BE KAWƆL

Juda be basa ka beeŋ wu be asheŋ

¹ Ndoŋ nna nɛ Enyɛnpe Ebɔrɛ na kaŋɛ ma le: “Nɛ Mosis nɛ Samuɛl nɛ b daa la anebiana gba ti fo so nfe a kule ma fanɛ n wu basa ere kuwɔr, m maaŋ nu bumo be kekule nseŋ wu bumo kuwɔr. Amoso shin nɛ Juda be basa e lar ma anishi to a yɔ.”

² Nɛ b kaŋ bishi fo fanɛ nnɛ nɛ baaŋ baa yɔ, fo kaŋɛ bumo le: “Alɔ lubi beeŋ mɔ bumo be beko nɛ beko malɛ e wu kena to. Akoŋgboŋ beeŋ mɔ bumo be beko, nɛ bedoŋ malɛ e pɛ beko n yɔ efuli pɔtɛana so fanɛ anya.

³ Ma, Enyɛnpe Ebɔrɛ na teŋ yili kumo nna fanɛ asheŋ lubi ana ko e naŋ wora bumo. Baaŋ wu kena to nɛ njɔnɔ e baa gbeye bumo be eyurana a kulti nɛ mbuibi e ji bumo be beko nɛ kupuŋ to be asɔbɔya malɛ e we bumo nɛ baŋ ka na.

⁴ Meeŋ shin nɛ bumo be asheŋ e baa kpar durnya be efuliana so be basa kikɛ, ŋkpal kusɔ nɛ Ewura Hɛzekaya pibinyɛn nɛ baa tre Manase wora ashi Jerusalɛm be kadegboŋ na to jemanɛ nɛ e daa ji kuwura Juda be efuli so na so.”

⁵ Kumo be kaman nɛ Enyɛnpe Ebɔrɛ na naŋ kaŋɛ le: “Wanɛ e naŋ shu menyi Jerusalɛm to be basa so, nɛ mbe kagbene e jija mo ga ŋkpal menyi so? Wanɛ e naŋ yige kusɔ nɛ e bee wora nseŋ bishi menyi so fanɛ nuso nɛ asheŋ du?

⁶ Men kini ma n lɛ nseŋ pal kaman n sa ma. Amoso meeŋ mur menyi, ŋkpal manɛ so, m maaŋ naŋ tiŋ n wu menyi kuwɔr.

⁷ Meeŋ chela menyi to fanɛ ayu ashi efuli na so be kade kama to. Meeŋ ta kagbenejija nɛ luwu ŋ gberge menyi kusoe, ŋkpal men ka maŋ yige alubi lubi be kewora so.

⁸ Juda be kasawule so be bekulpoche beeŋ ba kaa chɔ teku ase be eshishɛr gba. Meeŋ shin nɛ menyi be mbrantiɛfɔlbi e wu nɛ bumo nioana e ji awurfoŋ. Meeŋ shin nɛ kagbenejija nɛ kufugboŋ e tɔr bumo so epul to.

⁹ Enio nɛ e beeŋ paŋ mbe mbia ashunu beeŋ kreŋ n dese a fute a gben. Kapiidi beeŋ ki fanɛ kanyɛso n sa mo, ŋkpal e ka beeŋ ji anishinyɔr nseŋ nya kagbenejija damta so. Kumo be kaman nɛ n shin nɛ men doŋana e mɔ menyi to be bumo nɛ baaŋ ka a wɔ ŋkpa to na. Ma, Enyɛnpe Ebɔrɛ e kaŋɛ na.”

Jɛremaya ka fubel ŋ ŋini Enyɛnpe Ebɔrɛ be asheŋ

¹⁰ Ade kikɛ be kaman nɛ Jɛremaya fɛ le ashi mbe kagbene to: “N la esa nɛ mbe kagbene jija mo ga nna! Manɛ nna nɛ n nio kurge ma m ba durnya to bre? Ma nɛ ekama bee bile nna kasawule ere so. Ma alɛ maŋ naŋ yɔ esa kikɛ kutɔ n ya paŋ amansherbi ŋko n ta amansherbi m paŋ esa kikɛ ŋ ku so, ama ekama bee shoduu ma nna.”

¹¹ Ndoŋ nna nɛ Enyɛnpe Ebɔrɛ na kaŋɛ ma le: “N nase kɔnɔ fanɛ meeŋ kuŋ fo jɛrbi be jemanɛ, nɛ fo doŋana gba e kule fo fanɛ fo chɛ bumo to.”

¹² Kede be kaman nɛ Enyɛnpe Ebɔrɛ naŋ kaŋɛ ma fanɛ ŋ kaŋɛ basa na le: “Juda be basa, kananɛ menyi maaŋ tiŋ m bu kebɛlso nɛ epal be weato to na, aloŋ nɛ menyi maaŋ tiŋ ŋ kɔ m pɔɔ bedoŋ nɛ baaŋ shi kelargato be esoso be kaba so m ba kɔ menyi na so.

¹³ Meeŋ shin nɛ bedoŋ e ba sulɔ asɔ nɛ ma basa kɔ na kikɛ n yɔ nɛ k baa la kasogberge n sa bumo ŋkpal bumo be alubi nɛ b wora kasawule na so so.

¹⁴ Meeŋ shin nɛ b ki anya n sa bumo doŋana ashi kasawule nɛ b maŋ nyi shɛŋ a laŋɛ kumo be kaplɛa so na so. Ŋkpal manɛ so, ma agbo du fanɛ edɛ nɛ k bee chɔɔ mbaanaayɔ nna.”

¹⁵ Ndoŋ nna nɛ ŋ kaŋɛ le: “Naniere Enyɛnpe Ebɔrɛ, fo pin kebaawɔtɔ nɛ n wɔ kumo to nna na. Nyiŋi ma asheŋ nseŋ chɛ ma to. Shin nɛ n tiŋ n wora n tal basa nɛ baa kɔrfɛ ma na to. Sa maŋ ji bumo kanyiti n shin nɛ b nya ma m mɔ. Baa nyiŋi fanɛ fo so nɛ baa tege ma.

¹⁶ Fo daŋ malga ma kutɔ nɛ n nu fo kamalga na kikɛ. Enyɛnpetale Ebɔrɛ, n la fo kenya nna nɛ fo mmalga malɛ shin nɛ ma kagbene fuli n wushi ma ga.

¹⁷ N daa maŋ jija ma saŋɛ n tu basa pɔtɛ a mushe a ji ma kumu. Ama n nawule e daa wɔtɔ fanɛ kananɛ fo kaŋɛ na, nɛ kanya agbo wɔ ma kagbene to.

¹⁸ Manɛ nna nɛ ŋ kraa ji awurfoŋ nsaa nu ebesa jemanɛ kikɛ loŋ? Manɛ nna nɛ fo ki fanɛ kabombi nɛ k wɔlto kechali so, nɛ m maaŋ naŋ tiŋ n ta ma kumu n to fo so?”

¹⁹ Ndoŋ nna nɛ Enyɛnpe Ebɔrɛ na kaŋɛ ma le: “Sa maa malga fanɛ ewulpo! Nɛ feeŋ chɛrga fo nfɛra a laŋɛ ma kaplɛa so nseŋ lar n ya kaa bɔ ma kubɔya, feeŋ baa kraa la ma anebi. Kumo be kaman nɛ basa na e baa ba fo kutɔ nɛ fo ere maaŋ naa yɔ bumo kutɔ n ya kaa malga.

²⁰ Meeŋ shin nɛ fo ki fanɛ epal be egbal lempo basa kutɔ. Baaŋ kɔ fo ama b maaŋ tiŋ m pɔɔ fo so. Meeŋ baa wɔ fo kutɔ a kuŋ fo nɛ shɛŋ shɛŋ maaŋ wora fo.

²¹ Ma alɛ beeŋ kɔ n suge fo ashi kumu kpakpasowuraana nɛ b maa wu kuwɔr ere be enɔ to. Ma, Enyɛnpe Ebɔrɛ e kaŋɛ na.”