Jɛremaya 14 - EBƆRƐ BE KAWƆL

Ewule lubi be asheŋ

¹ Ewule ka daŋ yili jemanɛ tenteŋ ko nɛ Enyɛnpe Ebɔrɛ na kaŋɛ ma fanɛ ŋ kaŋɛ basa na le:

² “Juda be efuli so nɛ Jerusalɛm to ebi bee shu ŋkpal kasawule na ka wɔl a dese so.

³ Damawuraana shuŋi bumo be nyɛrbi nɛ mbita eboŋ to, nɛ b yɔ atirbu chiŋgeliŋ to nɛ b ya jɔ nchu, ama b maŋ nya nchu nɛ b jɔ. Ndoŋ nna nɛ aba pɔ bumo nɛ b bɛta nɛ mpuya fuloŋ.

⁴ Ŋkpal bɔrɛ ka maa ba nɛ kasawule wɔl a dese so; bedɔpo be ŋgbene jija bumo ga nna nɛ b ta bumo be anishi a ŋana.

⁵ Kupuŋ to be echibir gba shile nna nseŋ ka bumo be bibi popɔrbi n lɛ, ŋkpal afitiri ka maŋ wɔtɔ nɛ b ji so.

⁶ Kupuŋ to be ekurma yili abeebi be awɔlto nna a fute yeŋayeŋa fanɛ ejiŋkaamu. B maŋ naa wu nɛnɛ gba, ŋkpal b ka maŋ naa nya afitiri a ji so.

⁷ Ma basa bee shu a tre ma a kaŋɛ le nna: ‘Kashenteŋto, anyi be alubi bee ji a bri anyi, amoso chɛ anyi to, Enyɛnpe Ebɔrɛ, fanɛ kananɛ fo nase kɔnɔ fanɛ feeŋ chɛ anyi to na. Ale damta nɛ an shile n lar fo kaman. An wora alubi ŋ gbiti fo kashenteŋto

⁸ Fo e la Israɛl be basa tama kikɛ. Fo e naŋ tiŋ m mɔlga anyi ashi etɔrɔgboŋ to. Manɛ nna nɛ fee wora fanɛ efɔ ashi anyi be kasawule so, ŋko fanɛ esa nɛ e wɔ enite to nseŋ ba ji kanyɛ koŋwule?

⁹ Manɛ nna nɛ fee wora asheŋ fanɛ esa nɛ asheŋ purgi loŋ, ŋko fanɛ enapo nɛ e maŋ kɔ eleŋ nɛ e tiŋ n chɛ esa to? Fo Enyɛnpe Ebɔrɛ na wɔ anyi kutɔ kashenteŋto nna! An la fo basa nna nɛ fo bɔrɛlambu wɔ anyi kutɔ nfe, amoso, sa maŋ kini anyi n lɛ.’ ”

¹⁰ Ndoŋ nna nɛ Enyɛnpe Ebɔrɛ na kaŋɛ le a laŋɛ basa na be kaplɛa so. E yɛ: “Basa ere bee sha kebaa shile ma nna ga. B maa sha kebaa firgi a taga ma to kikɛ. Amoso bumo be asheŋ maa par ma. Meeŋ nyiŋi bumo be asheŋ lubi nseŋ gberge bumo kusoe.”

¹¹ Kede be kaman nɛ Enyɛnpe Ebɔrɛ na kaŋɛ ma le: “Jɛremaya, sa maa kule ma fanɛ n chɛ basa ere to kikɛ.

¹² Nɛ b kishi n luri kabɔrɛkule to gba, m maaŋ nu bumo be kekule nɛ baaŋ kule a fin kechɛto na. Nɛ b bar ma esarga chɔɔso nɛ ayu be esarga gba, bumo be asheŋ kraŋ maaŋ par ma. Kusɔ nɛ meeŋ shin nɛ k wora bumo e la fanɛ, baa wu kena to ŋko akoŋ nɛ alɔ beeŋ mɔ bumo.”

¹³ Ndoŋ nna nɛ ma alɛ e kaŋɛ le: “Fo, Enyɛnpetale Ebɔrɛ nyi fanɛ anebiana na bee kaŋɛ basa na nna fanɛ kena nɛ akoŋ maaŋ ba bumo so, ŋkpal manɛ so, b yɛ, fo nase kɔnɔ nna fanɛ kayurwushi nawule e naŋ baa wɔ anyi be kasawule so.”

¹⁴ Ama kusɔ nɛ Enyɛnpe Ebɔrɛ na kaŋɛ nde: “Efɛ nɛ anebiana na bee ku a deŋi ma. Ma ere maŋ shuŋi bumo ŋko m malga kamalga koŋwule gba n sa bumo. Ebɔrɛdare nɛ baa malga amo be asheŋ na maŋ shi ma kutɔ nɛ asheŋ nɛ baa wu a kaŋɛ na la asheŋ fuloŋ nna. Bumo gbagba be nfɛra to nɛ baa nya amo.

¹⁵ Kusɔ nɛ ma, Enyɛnpe Ebɔrɛ na, beeŋ wora anebiana nɛ m maŋ shuŋi nɛ bumo alɛ bee ku efɛ a deŋi ma nsaa kaŋɛ fanɛ kena nɛ akoŋ maaŋ ba kasawule na so na nde. Meeŋ shin nɛ b wu kena to nɛ akoŋ malɛ gba e naŋ mɔ bumo nɛ baaŋ ka na.

¹⁶ Basa nɛ b ku le be efɛ ere n sa na gba beeŋ wu ekpa koŋwule na so. Baaŋ wu n dese Jerusalɛm be kade to be agbembi so nɛ esa kikɛ maaŋ baa wɔtɔ nɛ e puli bumo. Kusɔ nɛ k beeŋ ba bumo gbagba nɛ bumo be beche nɛ mbia kikɛ so nna na. Meeŋ shin nɛ b ka bumo be asheŋ lubi na be kukɔ.”

¹⁷ Kumo be kaman nɛ Enyɛnpe Ebɔrɛ na kaŋɛ ma kenishipereso fanɛ n ya kaŋɛ basa na kebɔltofinfin nɛ k wɔ ma to be asheŋ. Ndoŋ nna nɛ n ya kaŋɛ bumo le: “Kapa nɛ kanyɛ, ma anishi maa paŋ anishichubi ŋkpal ma basa be awurfoŋ damta nɛ baa ji na so.

¹⁸ M baŋ yɔ kupuŋ to, mee wu benyɛn nɛ b wu kena to a dese nna. Ma alɛ naŋ luri nde to, mee wu basa nɛ akoŋ bee mɔ nna. Ama anebiana nɛ bɔrɛmatapoana na bre kraa shuŋ bumo be ashuŋ nna, a maŋ nyi kusɔ nɛ k bee wora gba.”

Basa na ka kule Ebɔrɛ na be asheŋ

¹⁹ Ade be kaman nɛ basa na kule Ebɔrɛ ŋ kaŋɛ le: Enyɛnpe Ebɔrɛ, fo kini Juda n lɛ nna ere a? Fo kishi Jerusalɛm be basa nna ere a? Manɛ nna nɛ fo doro anyi ga loŋ, hale anyi maaŋ tiŋ n nya kechɛ? An daa tama kayurwushi nɛ eyur be alenfia nna, ama etɔrɔ nɛ e bee keta kufu e ba anyi so.

²⁰ Enyɛnpe Ebɔrɛ, an wora alubi n da fo so. Anyi nɛ an nananyɛnana kikɛ wora n jija ŋkpal an ka kini fo nseŋ lar fo kaman so.

²¹ Nyiŋi fo nnɔ naseso nsaa maŋ kini anyi n lɛ. Sa maŋ shin nɛ nyɔmɔ e ba Jerusalɛm nɛ k la kakpa nɛ fo kemaŋkura be kuwurputi wɔ na so. Sa maŋ lar anyi nɛ fo be kɔnɔkoŋwule be ŋkre na kaman.

²² Efuli pɔtɛana na be agbirana na be kekama maaŋ tiŋ n shin nɛ bɔrɛ e ba. Kuwɔlpa gbagba maaŋ tiŋ n shin nɛ bɔrɛ e furi gba. Anyi be tama wɔ fo, Enyɛnpe anyi be Ebɔrɛ na so nna; ŋkpal manɛ so, fo nawule e naa shin nɛ ade kikɛ bee wora.