Jɛremaya 13 - EBƆRƐ BE KAWƆL

Jɛremaya be wajɛchɛbi lela na be kreso na be asheŋ

¹ Ade be kaman nɛ Enyɛnpe Ebɔrɛ na kaŋɛ ma fanɛ n ya tɔ wajɛchɛbi lela be dɔkɔri n dela. Kumo be kaman nɛ e naŋ kaŋɛ ma fanɛ n sa maŋ kaŋ ta kumo n wɔtɔ nchu to.

² Ndoŋ nna nɛ n tɔ dɔkɔri n dela.

³ Kumo be kaman nɛ Enyɛnpe Ebɔrɛ na naŋ kaŋɛ ma le:

⁴ “Ta dɔkɔri na n yɔ Yufreetes be Lɔrgboŋ na ase n ya puli kefalta be kemaŋ to.”

⁵ Nɛ n ta kumo n ya ŋana m mata Yufreetes be Lɔrgboŋ na ase nseŋ bɛta n yɔ epe.

⁶ Jemanɛ ko ka fo nɛ Enyɛnpe Ebɔrɛ na kaŋɛ fanɛ n ya lara edɔkɔri na ashi Yufreetes be Lɔrgboŋ na ase.

⁷ Ndoŋ nna nɛ n yɔ ndoŋ n ya wu fanɛ dɔkɔri na wu nsaa maŋ naa walɛ kedela.

⁸ Kumo be kaman nɛ Enyɛnpe Ebɔrɛ na naŋ kaŋɛ ma le:

⁹ “Kananɛ meeŋ mur Juda nɛ Jerusalɛm be basa be kamoowu nɛ b kɔ na nna na.

¹⁰ Le be basa lubi ere kini kewora ma kasonu. B wora bumo be amu nɛ ŋgbene kpakpa nna nseŋ kini kebaashuŋ ma n ya kaa shuŋ agbirana. Amoso baaŋ ki fanɛ dɔkɔri nɛ k wu nsaa maŋ naa kɔ tɔnɔ kikɛ na.

¹¹ Kananɛ dɔkɔri bee yili esa be kashɛr to nɛnɛ na nɛ n daa sha Israɛl nɛ Juda be basa kikɛ e baa yil ma kaman. N daa sha fanɛ efuli kama so ebi e pin fanɛ b la ma basa nna, saŋɛ na so baaŋ baa kpaŋ ma nsaa maŋkura ma. Ama b kini kewora ma kasonu.”

Yabra be mpuya be asheŋ

¹² Ade kikɛ be kaman nɛ Enyɛnpe Ebɔrɛ na naŋ kaŋɛ ma le: “Jɛremaya, kaŋɛ Israɛl be basa na fanɛ b shin nɛ bumo be beche e wora yabra m bɔlɔ yabra be kapuya kikɛ so. Bumo alɛ beeŋ kaŋɛ fo fanɛ bumo alɛ gba nyi fanɛ a daga b wora yabra m bɔlɔ yabra be kapuya kikɛ so.

¹³ Kumo be kaman nɛ fo kaŋɛ bumo fanɛ ma, Enyɛnpe Ebɔrɛ na beeŋ shin nɛ basa nɛ b wɔ kasawule ere so kikɛ e nuu yabra m boo. Bewura nɛ b shi Ewura Deevid be kanaŋ to nɛ bɔrɛmatapoana nɛ anebiana nɛ Jerusalɛm to be basa kikɛ beeŋ nuu amo m boo.

¹⁴ Kumo be kaman nɛ n ta bumo ŋ ŋmɛa abar fanɛ mpuya nɛ b bure. M maaŋ wu basakpar ŋko mbifɔlbi kikɛ kuwɔr. Bumo kikɛ beeŋ wu m mur. Ma, Enyɛnpe Ebɔrɛ e kaŋɛ na.”

B ka beeŋ pɛ Juda be basa anya n yɔ efuli pɔtɛ so be asheŋ

¹⁵ Juda be basa, Enyɛnpe Ebɔrɛ na e naa malga na! E yɛ men bar menyi be amu kaseto nseŋ nu n sa mo.

¹⁶ Men baa maŋkura Enyɛnpe menyi be Ebɔrɛ na; saŋɛ na so e maaŋ shin nɛ tentembiri e ba menyi so nɛ men baa nite a fiti a tɔr abee so. Men baa maŋkura mo, saŋɛ na so e maaŋ shin nɛ kefulto nɛ menyee tama na e ki tentembiri mina n sa menyi.

¹⁷ Ama nɛ men kini kenu n sa ma bre, meeŋ kpal menyi be kamoowuso n shu ashiri to. Meeŋ shu kenishipereso nɛ anishichubi a lar ma anishi to ŋkpal b ka beeŋ pɛ menyi nɛ men la Enyɛnpe Ebɔrɛ be basa n yɔ efuli pɔtɛana so fanɛ anya so.

¹⁸ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Kaŋɛ ewura nɛ mo nio nɛ b koso bumo be nwurputi so nseŋ gbaŋ bumo be awurwuro lela n nase.

¹⁹ Bedoŋ teŋ ba kulti ndeana nɛ e wɔ Juda be kelargato be kaseto be kaba so be keshishɛrsawule so nna n wɔtɔ nɛ esa kikɛ maaŋ naŋ tiŋ n luri ŋko n lar amo to. B teŋ pɛ Juda be basa kikɛ fanɛ anya n yɔ efuli pɔtɛana nɛ e wɔ kufɔ kufɔ so.”

²⁰ Jerusalɛm, to kenishi ŋ keni, fo doŋana e shi kelargato be esoso be kaba so a ba na! Nnɛ nɛ basa nɛ fee keni so nsaa kpal bumo so a wu fo kumu na naa wɔ?

²¹ Nɛ basa nɛ fo tama fanɛ b la fo teriana kaŋ ba kɔ m pɔɔ fo so nsaa ji fo so kuwura, manɛ nɛ feeŋ kaŋɛ? Feeŋ baa wɔ ebesa to fanɛ eche nɛ kakurge ta mo na nna.

²² Fo kaŋ bishi fo kumu fanɛ manɛ e ba nɛ b delge ma so nseŋ pur ma ere? Feeŋ pin fanɛ fo asheŋ lubi so nɛ loŋ wora.

²³ Edimɛdi beeŋ tiŋ n chɛrga bumo be kayurwule a? Karmɛ beeŋ tiŋ n chɛrga kumo be eyur so be chɛchɛrɛ na a? Nɛ baaŋ tiŋ n chɛrga bre, fo alɛ gba beeŋ tiŋ n chɛrga fo asheŋ lubi nawule na to nsaa wora asheŋ niŋiso.

²⁴ Enyɛnpe Ebɔrɛ na beeŋ shin nɛ fo basa e pesaŋ to n sɔ kaplɛkama fanɛ kananɛ afu bee sulɔ amimi a yɔ kaplɛkama na.

²⁵ E yɛ kusɔ nɛ k beeŋ nya menyi nna na. Kusɔ nɛ e kre kewora fo basa nna na, ŋkpal b ka teŋ mo so nseŋ yirda agbirana nɛ e maŋ kɔ kashenteŋ so.

²⁶ Enyɛnpe Ebɔrɛ na gbagba e naŋ delge fo so n shin nɛ fo ji anishinyɔr.

²⁷ Ŋkpal manɛ so, e wu fo basa ka wora asheŋ nɛ e kishi nna. Kumo e la fanɛ e wu menyi nɛ menyee shuŋ nnyamase be agbirana ashi abee so nɛ adɔsawule to fanɛ kananɛ enyɛn ko bee yɛlga mo barkasa be eche nsaa shil a chɔ mo so na ŋko fanɛ kananɛ gbaŋɛ nyɛnso bee ju a bɛ gbaŋɛ cheso so na. Asheŋ maaŋ nyalɛ n sa menyi, Jerusalɛm to be basa ere! Jemanɛ mo nɛ menyeeŋ naŋ nyalɛ so a maaŋ naa kɔ eyurpi menyi so?