Jɛremaya 10 - EBƆRƐ BE KAWƆL

Ebɔrɛ nɛ Agbirana be asheŋ

¹ Israɛl be basa, men nu kubɔya nɛ Enyɛnpe Ebɔrɛ na kɔ nɛ e kaŋɛ menyi!

² E yɛ: “Men sa maa kute efuli pɔtɛana na be basa to a wora asheŋ. Menyi alɛ e sa maŋ shin nɛ asheŋ nɛ e bee wora awɔlpa so a ta kufu a da efuli pɔtɛana na be basa na, e baa ta kufu a da menyi alɛ gba.

³ Basa ere be kabɔrɛshuŋ maŋ kɔ kechɛto kikɛ n sa bumo. Baa ku kupo to be ndibi nna a shɛl amo ŋ ki agbir.

⁴ Kumo be kaman nɛ b ŋalga shuwa nɛ gbiti n wurge amo so nseŋ gbir amo anyembi n yili nɛ e sa maŋ melgi n tɔr kasawule.

⁵ Le be agbirana ere du fanɛ asɔ nɛ b ta n yili ndɔ to a ju mbuibi nna. E kɔ nnɔ, amo alɛ maa malga; e kɔ aya amo alɛ maa nite! Amoso baa sulɔ amo nna a nite. Men sa maa ŋana amo; ŋkpal manɛ so, e maaŋ tiŋ n wora menyi shɛŋ. Amo alɛ maaŋ tiŋ n wora kesheŋ lela kikɛ n sa menyi.”

⁶ Enyɛnpe Ebɔrɛ, esa kama maŋ du fanɛ fo. Fo shi ga nɛ fo ketre malɛ gba shi a kɔ eleŋ ga.

⁷ Fo e naa ji efuliana na kikɛ so kuwura. Ekama daga fanɛ e maŋkura fo ga nna. Ashi durnya ere to be kaplɛkama, dimɛdi kikɛ maŋ nyi asheŋ a chɔ fo.

⁸ Agbirana maŋ kɔ tɔnɔ nɛ kechɛto kikɛ n sa basa. Esa kama nɛ e bee shuŋ amo la ewulpo nna.

⁹ Edimɛdi e naa lɔŋɛ agbir. Eshɛlpo e naa ku kedibi n shɛl, nɛ basa nɛ b nyi enɔ to be kushuŋ fanɛ ebɔyɛpo malɛ e ŋalga shuwa nɛ k shi Ufaz be efuli so ŋko gbiti nɛ k shi Speen be efuli so n wurge kedibi nɛ e shɛl na so. Kumo be kaman nɛ basa nɛ b nyi kananɛ baa ba asɔbuuso e ta wajɛchɛbi nɛ b nyɔɔ buru nɛ kepeper kunɔkunɔ m ba asɔbuuso m buu kedibi shɛlso na nɛ k ki kegbir.

¹⁰ Ama fo, Enyɛnpe Ebɔrɛ na, e la Ebɔrɛ kashenteŋto. Fo e naa sa ŋkpa nsaa wɔ ŋkpa to na; fo alɛ e la ewura nɛ e wɔtɔ mbaanaayɔ na. Fo baŋ nya agbo, durnya kikɛ bee gbuŋgbuŋ to nna, nɛ efuliana bee mur.

¹¹ Fo yɛ ŋ kaŋɛ basa fanɛ, mannɛ agbirana e to ebɔrɛso nɛ kasawule; fo Enyɛnpe Ebɔrɛ na malɛ beeŋ mur kegbir kikɛ nɛ edimɛdi lɔŋɛ.

¹² Enyɛnpe Ebɔrɛ na e bɔla mbe eleŋgboŋ so n to durnya; e bɔla mbe kanyiasheŋ so nna n to durnya nseŋ parga awɔlpa to m buu kaplɛkama so.

¹³ Mo e naa malga nɛ awɔlto be nchuana bee baga to a gbri, mo alɛ e naa shin nɛ awɔlpa bee deŋi durnya be kaplɛkama. Mo e naa shin nɛ bɔrɛ bee ba nsaa nyɛkpɛ nɛ afu bee shi kakpa nɛ e yili kumo na a ba.

¹⁴ Basa nɛ baa lɔŋɛ agbir maŋ kɔ nfɛra kikɛ! Ebɔyɛpo nɛ baa ta shuwa ŋko gbiti a wurge agbirana so na bee ji anishinyɔr nna ŋkpal bumo be agbirana nɛ e maŋ kɔ kashenteŋ nɛ ŋkpa so.

¹⁵ Agbirana na maŋ kɔ tɔnɔ, a daga basa e wora amo eyurto nna nseŋ kini amo n lɛ. Kachɛ na kaŋ fo, Enyɛnpe Ebɔrɛ na beeŋ mur amo kikɛ.

¹⁶ Ama Ebɔrɛ nɛ an nananyɛn Jeekɔb daŋ shuŋ na bre maŋ du fanɛ agbirana na. Mo e to kusɔ kama nseŋ lara Israɛl be basa fanɛ b baa la mo gbagba be basa. Mbe ketre e la Enyɛnpetale Ebɔrɛ na.

Kemurgboŋ nɛ k bee ba na be asheŋ

¹⁷ Ade kikɛ be kaman nɛ ŋ kaŋɛ Juda be basa na le: “Men doŋana e kulti menyi n wɔtɔ na. Amoso men koli menyi be asɔ abar so nseŋ wora shiriya n lar kasawule na so.

¹⁸ Enyɛnpe Ebɔrɛ na bee sha kelara menyi kasawule ere so nna na. E beeŋ shin nɛ men doŋana e ta kenishi m pere menyi nseŋ tintiŋ menyi n lar men be kasawule so. Enyɛnpe Ebɔrɛ e kaŋɛ na.”

¹⁹ Ndoŋ nna nɛ basa na kaŋɛ le: “Kumo ere anyeeŋ wu asheŋ pasaa! Anyi be awurfoŋ maaŋ loge kikɛ. An daa fɛ fanɛ anyeeŋ tiŋ n ji ebesa nɛ awurfoŋ na be kanyiti nna.

²⁰ Anyi be elaŋana mur; nɛ anyi be mbia wu ŋ ka anyi. Esa kikɛ maŋ naa wɔtɔ nɛ e chɛ anyi to n fin echenakpa.”

²¹ Ndoŋ nna nɛ ŋ kaŋɛ bumo le: “Anyi be bejuŋkparpoana na maŋ kɔ nfɛra nna; b maa kule Ebɔrɛ a fin ekpa a bɔla so a wora asheŋ. Amoso nɛ b maaŋ tiŋ nɛ b chɛ anyi to nɛ anyi be basa maaŋ chɛr nseŋ pesaŋ to fanɛ mbolpɔ na.

²² Men nu nfe! Baru ko bee ba! Kebagato gboŋ ko wɔ efuli ko nɛ k wɔ kelargato be esoso be kaba so a ba. Efuli na be benapo beeŋ shin nɛ Juda be efuli so be ndegboŋ e ki keshishɛrsawule nɛ ejiŋkaamu e baa wɔ kumo so.”

²³ Enyɛnpe Ebɔrɛ, n nyi fanɛ anyi edimɛdi maŋ kɔ anyi be ŋkpa so be eleŋ.

²⁴ Ŋini fo basa akpa, Enyɛnpe Ebɔrɛ, ama sa maŋ kaŋ nyaŋ anyi ga ŋko ŋ gberge anyi kusoe kanya agbo so; nɛ mannɛ aloŋ anyeeŋ wu.

²⁵ Shin nɛ fo agbo e laŋɛ efuliana nɛ b kini kesɔ fo fanɛ bumo be Ebɔrɛ a maa shuŋ fo na. Ŋkpal manɛ so, b mɔ fo basa m mur cheche n shin nɛ anyi be efuli bure a dese fuloŋ.