Jɛnesis 49 - EBƆRƐ BE KAWƆL

Jeekɔb be lalaloge be mmalga be asheŋ

¹ Kachako nɛ Jeekɔb kaŋɛ mbe bibinyɛnana na le: “Men gbargbar abar m ba ma anishito nɛ ŋ kaŋɛ menyi kusɔ nɛ k beeŋ nya menyi echefoso be asheŋ.

² Menyi Jeekɔb be bibinyɛn e shɛr n nu kusɔ nɛ men tuto Jeekɔb kɔ nɛ e kaŋɛ menyi.

³ Ruben, fo e la ma wurkoŋ nɛ ma eleŋ nɛ kebia nɛ e juŋkpar n lar ŋ ŋini fanɛ n la enyɛn. Fo nɛ bunyaŋ nɛ eleŋ daa shi fo to a chɔ ma kebia kama.

⁴ Fo daa du fanɛ ketiligboŋ nna, ama fo maaŋ naa la esagboŋ ŋkpal fo ka di ma kowurche keche nɛ kenyɛn n wora ma, fo tuto be edesekpa eyurpi na so so.

⁵ Simiɔn nɛ Livai, la esa nɛ mo sipo nna, a kɔ bumo be etokobi a ŋini eleŋ a jija asɔ.

⁶ M maaŋ ta ma kɔnɔ n wɔtɔ bumo be wulo be mmalga to, ma alɛ nɛ bumo maaŋ shɛr ŋ kre asheŋ kikɛ. Ŋkpal manɛ so, b kaa agbo m mɔ basa nseŋ tuge asɔbɔya be aya be achin kenyaŋnyaŋɛso nɛ a ki ebobi.

⁷ Kɔnɔsho e baa wɔ bumo be agbo so, ŋkpal k ka lubi ga so so. Bumo be agbo lubi ga. Kɔnɔsho koŋwule na e baa wɔ bumo be kediewu so, ŋkpal manɛ so, b maŋ kɔ kushuso kuraa. Meeŋ shin nɛ b pesaŋ to n sɔ Israɛl be efuli so be basa kikɛ to nyam.

⁸ Juda, fo sipoana nɛ fo daana beeŋ chɔrɔ fo. Feeŋ pɔɔ fo doŋana so. Fo sipoana nɛ fo daana beeŋ jɔŋɛ fo ase.

⁹ Juda, fo du fanɛ buluŋ nna, mo e naa pɔɔ mo braana asɔbɔya so a mɔ bumo, nsaa bɛta a yɔ mbe eŋanakpa n ya kaa teŋi to a dese na. Wanɛ e naaŋ tiŋ n tɔrɔ mo?

¹⁰ Juda e naaŋ ba kaa kɔ kuwurkpabi mbe enɔ to nɛ mbe kanaŋ to ebi malɛ e ba kaa ji kuwura basa so saŋkama. Efuli pɔtɛana so ebi beeŋ ba kaa bunyaŋ mo a gbir mo kumuli kasonuso.

¹¹ E beeŋ ba ta mbe kurmafɔlbi n chɛ m muni kefeelebi nɛ k bee sɔr asɔrso nɛ baa tre greep na be keyabi lela. E beeŋ ta nsa nɛ b ta kefeelebi be asɔrso nɛ baa tre greep na n wora nɛ a pere kpaw fanɛ ŋklaŋ na n fɔr mbe asɔbuuso. Kumo e naŋ ŋini fanɛ mbe ndibi sɔrso wora ga.

¹² Mbe anishi beeŋ ba pere fanɛ nsa nɛ baa tre wain na, nɛ mbe anyii malɛ e fuli parr fanɛ kenyipochu na.

¹³ Zɛbyulɔn beeŋ ba kaa wɔ teku ase nɛ mbe echenakpa e ki nchu so be ekuloŋgboŋana be eyilikpa. Mbe kasawule beeŋ dese loŋ n ya taga to Sidɔn.

¹⁴ Isakar, fo du fanɛ kurma lempo nɛ e teŋi to a dese mbe esulɔ gbɛgbɛso be nferinto nna.

¹⁵ Ŋkpal kananɛ fo ewushikpa walɛ nɛ kananɛ kasawule na so wɔ ebel so feeŋ yɔɔ m barase n sɔ kenyaya be kushuŋ gbɛgbɛso n shuŋ.

¹⁶ Dan, feeŋ ji fo basa demu nɛ kumo be ekpa so ashi Israɛl be nnaŋ na to.

¹⁷ Dan, fo du fanɛ ekpakar be kuwɔ nna, kuwɔ nɛ k kɔ kɔrtɔ lubi, nɛ k bee duŋ gbaŋɛ be keya nɛ k kpa kumo be ediipo n ya lɛ kelela.

¹⁸ O, Enyɛnpe, mee jo fo kenya be kesɔnyige nna.

¹⁹ Gad, beyu be katuŋ beeŋ ju m buu fo so, ama feeŋ kilgi n ju bumo so n ya lɛ.

²⁰ Ashɛr, fo adɔsawule beeŋ wora ajibi lela damta, ajibi nɛ feeŋ nya na beeŋ baa walɛ nna n sa ewura.

²¹ Naftali, fo du fanɛ chibir nɛ k kɔ mbia lela nna a ji kumo be kumu a shile a kulti.

²² Josɛf, fo du fanɛ kefeelebi nɛ k bee sɔr asɔrso lela nɛ baa tre greep, nɛ k yili m mata eboŋkar nɛ kumo be ayabi daŋ n ya kaa dii a buu egbal so na nna.

²³ Fo doŋana beeŋ ta bumo be ata nɛ atanyembiana m baa tu fo a kɔ fo kekishiso.

²⁴ Ama feeŋ yili n tu bumo nɛ fo enɔ lempo na e baa yɔ a ba manaŋ manaŋ, ŋkpal manɛ so, Enyɛnpetale Ebɔrɛ nɛ e la Jeekɔb be Ebɔrɛ nɛ Israɛl be Ebɔrɛ na e baa du fanɛ kefalta a kuŋ fo nsaa du fanɛ mbolpɔkpapo a keni fo so na e baa sa fo eleŋ.

²⁵ Fo tuto be Ebɔrɛ na e naa chɛ fo to. Enyɛnpetale na e naa nɛfa fo, a sa fo bɔrɛchu nɛ nchu nɛ a bee bul kasawule to nɛ asɔbɔya nɛ mbia nɛ kenyipochu damta nɛ mbia na e baa nuu.

²⁶ Fo tuto be nɛfa nɛ e sa fo ere beeŋ ba shi a chɔ bedarapo na peya nɛ asɔ lela nɛ a shi a chɔɔ abeebi, nsaa wɔtɔ mbaanaayɔ na. Le be nɛfa ere kikɛ e baa wɔ Josɛf so ŋkpal e ka ki enimu ashi mo daana kikɛ so so.

²⁷ Bɛnjamin, fo du fanɛ jiŋkaamu lubi nɛ e bee kaa mɔ asɔbɔya chipurso nsaa kpɛa bumo to a we kanyɛso na nna.”

²⁸ To, bede kikɛ e la Israɛl be nnaŋ kuduanyɔ na be bejuŋkparpo nna. Asɔ nɛ bumo tuto malɛ daŋ nɛfa bumo nseŋ kaŋɛ ŋ kaŋɛ bumo kukoko to a yɔ ekama be da be kaplɛa so nna na.

Jeekɔb be luwu nɛ mbe kepuli be asheŋ

²⁹ Ade be kaman nɛ Jeekɔb ta le be mmalga m bɔɔ mbe mbia enɔ. E yɛ: “Naniere a ka gbrɛ nɛ n wu n yɔ n nanaana kutɔ, ma alɛ kaŋ wu, men ya puli ma n tutoana kutɔ ashi kebeelaŋ nɛ k daa la Hitebi be esa nɛ baa tre Efrɔn peya na to.

³⁰ Kumo e wɔ Makpɛla nɛ k mata kade nɛ ba tre Mamre nɛ k wɔ Keenan be kasawule so na. Eebraham e daŋ tɔ loŋ be kasawule na nɛ kebeelaŋ na ashi Efrɔn Hitebi be esa na kutɔ fanɛ k baa la kakpa nɛ baaŋ ba puli mbe bubuni.

³¹ Ndoŋ nɛ b puli Eebraham nɛ mbe eche Sɛɛra nɛ Aizek nɛ mbe eche Rebɛka nɛ m puli Lia ndoŋ na.

³² B daŋ tɔ kasawule na nɛ kebeelaŋ nɛ k wɔ ndoŋ na ashi Hitebi kutɔ nna. Men puli ma ndoŋ.”

³³ Jeekɔb ka ta le be mmalga ere kikɛ m bɔɔ mbe mbia na enɔ n loge nɛ e lɔŋɛ n dese nseŋ fute mbe lalaloge be efute n wu.