Jɛnesis 48 - EBƆRƐ BE KAWƆL

Jeekɔb ka nɛfa Josɛf be mbia be asheŋ

¹ Kachako nɛ b kaŋɛ Josɛf fanɛ mo tuto bee lɔ. Ndoŋ nna nɛ e koso ŋ keta mbe bibinyɛn anyɔ na, Manase nɛ Efreim n ti mbe kumu so n yɔ nɛ e ya keni mo.

² Josɛf ka ya fo ndoŋ nɛ b kaŋɛ Jeekɔb le: “Fo kutɔ nɛ fo pibinyɛn Josɛf ba na.” Nɛ e wora ania n niŋi to n chena mbe edesekpa, nseŋ kaŋɛ Josɛf le:

³ “Enyɛnpetale Ebɔrɛ lar ma so nna ashi Bɛtɛl nɛ k wɔ Keenan be kasawule so na n nɛfa ma,

⁴ nseŋ kaŋɛ ma le: ‘Meeŋ sa fo mbia damta nɛ b wora keshi ŋ ki efuli damtawuraana. Meeŋ ta kasawule ere n sa fo kanaŋ to ebi nɛ k baa la bumo peya mbaanaayɔ.’ ”

⁵ E ka kaŋɛ kusɔ nɛ Ebɔrɛ daŋ kaŋɛ mo na nɛ e naŋ kaŋɛ Josɛf le: “Fo bibinyɛn Efreim nɛ Manase nɛ fo kurge Ijipt pɔɛŋ nɛ m ba nfe na gba ki ma mbia nna fanɛ kananɛ Ruben nɛ Simiɔn baa la ma mbia ere.

⁶ Ama bibinyɛn kama nɛ fo naŋ kurge bumo be kaman beeŋ baa la feya. Ma kapetɛ kama nɛ loŋ be mbia na bre beeŋ nya beeŋ bɔla Efreim nɛ Manase so nna.

⁷ Mɛsopoteemia nɛ n daŋ shi a ba nɛ fo nio Reechel wu Keenan be kasawule so n ta kagbenejija damta n lɛ ma so. Kumo be saŋɛ na so nɛ anyi nɛ Efrat nɛ baa tre Bɛtlɛhɛm na maŋ naa wɔ kufɔ. Amoso n daŋ puli mo nna m mata Efrat be ekpa to ndoŋ.”

⁸ Jeekɔb ka kilgi n wu Josɛf be bibinyɛn na nɛ e bishi mo: “Mbia mo nde?”

⁹ Nɛ Josɛf kaŋɛ mo: “Ma mbia nɛ Ebɔrɛ sa ma Ijipt nfe nna na.” Nɛ Jeekɔb kaŋɛ mo: “Keta bumo m ba ma kutɔ nfe nɛ n nɛfa bumo.”

¹⁰ Jemanɛ na so nɛ Jeekɔb maŋ naa wu nɛnɛ ŋkpal mbel so so. Ndoŋ nna nɛ Josɛf gberge mbe mbia na m ba mo tuto kutɔ nɛ e lala bumo so kashaso nseŋ pɛ m pɛ bumo m mata m mata mbe kumu.

¹¹ Kumo be kaman nɛ Jeekɔb kaŋɛ mo pibi Josɛf le: “N daa maŋ naŋ fɛ fanɛ meeŋ naŋ wu fo kikɛ, ama naniere Ebɔrɛ shin nɛ n wu fo nɛ fo mbia gba kuraa!”

¹² E ka malga loŋ n loge na nɛ Josɛf maŋ mbia na so ashi mbe aya so nseŋ gbir mbe anishito ndoŋ ŋ kurgi kumu n yuu to.

¹³ Kumo be kaman nɛ Josɛf shin nɛ Efreim yili Jeekɔb be enɔ benaso nɛ Manase malɛ yili mbe jiso so.

¹⁴ Ama Jeekɔb daŋ bal mbe enɔana nna n deŋi mbia na so n shin nɛ mbe jiso yɔ Efreim nɛ e la ekekarso na so nseŋ shin nɛ mbe bena malɛ yɔ Manase nɛ e la enimuso na be kumu so.

¹⁵ E ka wora loŋ na be kaman nɛ e nɛfa Josɛf nseŋ kaŋɛ: “Ebɔrɛ mo nɛ n nananyɛn Eebraham nɛ n tuto Aizek daŋ shuŋ na e nɛfa fo mbia ere. Mo, Ebɔrɛ koŋwule mo nɛ e juŋkpar ma a keni ma so fanɛ asɔbɔyakpapo na e nɛfa bumo.

¹⁶ Malaika mo nɛ e tu ma ŋ kɔ emaŋ na e nɛfa bumo. Ebɔrɛ e shin nɛ ma ketre nɛ n tuto Aizek be ketre nɛ n nananyɛn Eebraham be ketre e bɔla mbia ere so a wɔtɔ mbaanaayɔ. Ebɔrɛ e sa bumo mbia damta nɛ kanaŋ to ebi damta durnya to.”

¹⁷ Josɛf ka wu mo tuto ka ta mbe jiso n deŋi Efreim so na k maŋ par mo nɛ e ya deŋi mo tuto be enɔ na ashi Efreim be kumu so n ta n deŋi Manase peya so,

¹⁸ nseŋ kaŋɛ mo tuto: “N tuto, mannɛ aloŋ nna, ede e la enimuso, amoso mo e daga fanɛ fo ta fo jiso n deŋi mo so.”

¹⁹ Ndoŋ nna nɛ mo tuto kini nseŋ kaŋɛ: “N nyi, m pibi n nyi. Mo alɛ gba beeŋ ki basa ko be kumuwura, mo alɛ gba beeŋ ba ki esagboŋ, ama mo sipo e naaŋ ba kaa chɔ mo eleŋ nɛ mbe kanaŋ to ebi e ba ki efuli damtaana be basa.”

²⁰ Ndoŋ nna nɛ Jeekɔb nɛfa bumo kamɔnchɛ na ŋ kaŋɛ: “Israɛlebi beeŋ ba kaa kɔ men be atre a nɛfa bumo braana a kaŋɛ: ‘Ebɔrɛ e shin nɛ fo baa du fanɛ Efreim nɛ Manase.’ ” E ka wora loŋ na e daŋ ta Efreim nna n juŋkpar Manase.

²¹ Kumo be kaman nɛ Jeekɔb kaŋɛ Josɛf: “M maaŋ naŋ chɛr nseŋ wu, ama Ebɔrɛ beeŋ baa wɔ menyi kutɔ n naŋ yɛr menyi men nananyɛnana be kasawule so.

²² Ma alɛ bee sa fo kasawule nɛ k chɔ fo daana peya ŋkpal fo ka beeŋ ba ka chɔ bumo so so. Loŋ be kasawule na nɛ n daŋ ta ma tokobi nɛ keta ŋ kɔ n sɔ ashi Ammɔnebi kutɔ na.”