Jɛnesis 47 - EBƆRƐ BE KAWƆL

¹ Josɛf be kamalga na be kaman nɛ e ya kaŋɛ ewura Fɛɛro le: “N tuto nɛ n daana nɛ bumo be asɔbɔya nɛ kusɔ kama nyam nɛ b kɔ kikɛ shi Keenan be kasawule so m ba kaa wɔ Goshen be kaba so.”

² Kumo be kaman nɛ e lara mo daana na be benu n ya ŋini ewura Fɛɛro.

³ Ndoŋ nna nɛ ewura Fɛɛro bishi bumo: “Manɛ be kushuŋ nɛ menyee shuŋ?” Nɛ b kaŋɛ mo: “Anyi, fo anya la asɔbɔyakpapoana nna fanɛ an nananyɛnana.

⁴ An ba nfe nna nɛ an ba kaa wɔ nfe n ya fo saŋko. Ŋkpal akoŋ ka wɔ Keenan ga so fo anya be asɔbɔya maŋ naa nya afitiri ndoŋ a ji. Amoso, jande, shin nɛ anyi, fo anya e baa wɔ Goshen kaba so.”

⁵ Ndoŋ nna nɛ Fɛɛro kaŋɛ Josɛf: “Fo tuto nɛ fo daana ba fo kutɔ nna,

⁶ Ijipt malɛ be kasawule kikɛ e dese fo na, shin nɛ fo tuto nɛ fo daana na e ya chena kaplɛkama nɛ k walɛ. Shin nɛ b ya kaa wɔ Goshen be kaba so. Bumo to be ekama malɛ nɛ e nyi asɔbɔya to nɛnɛ, fo ta ma asɔbɔya m bɔɔ mo enɔ.”

⁷ Kumo be kaman nɛ Josɛf keta mo tuto Jeekɔb m ba ŋini ewura Fɛɛro, nɛ Jeekɔb nɛfa Fɛɛro.

⁸ Ndoŋ nna nɛ Fɛɛro bishi Jeekɔb: “Fo nfɛ afanɛ nde?”

⁹ Nɛ Jeekɔb kaŋɛ Fɛɛro: “Nfɛ mo nɛ n ji a na a kilgi to durnya ere to wɔ nfɛ kalfa nɛ adesa. Loŋ be nfɛ na malɛ kikɛ la awurfoŋ be nfɛ nna, amo alɛ maŋ naa shi fanɛ kananɛ n tutoana nɛ n nanaana nɛ b daa na a kilgi to na be nfɛ daa shi na.”

¹⁰ Kamalga na be kaman nɛ Jeekɔb naŋ nɛfa ewura Fɛɛro nseŋ lar mo kutɔ.

¹¹ Ndoŋ nna nɛ Josɛf shin nɛ mo tuto nɛ mo daana chena Ijipt nɛ e sa bumo kasawule na so be kaboŋ lela a mata kadegboŋ nɛ baa tre Ramases ashi Goshen be kaba so fanɛ kananɛ ewura Fɛɛro daŋ kaŋɛ na.

¹² Kumo be kaman nɛ Josɛf sa mo tuto nɛ mo daana na nɛ mo tuto be kowu to ebi kikɛ nyam ajibi nɛ a beeŋ fo ekama nɛ mbe mbia kanaŋkamaso.

Akoŋgboŋ na be asheŋ

¹³ Ŋkpal akoŋ na ka daa chɛr ga so ajibi daa maŋ naa wɔ kaplɛkama. Ndoŋ nna nɛ Ijipt nɛ Keenan be basa kikɛ bee shu akoŋ.

¹⁴ Josɛf daa sɔ amansherbi kama nɛ basa daa ta ashi Ijipt to nɛ Keenan be efuli so m ba kaa tɔ ajibi na kikɛ nna a yɔ Fɛɛro kutɔ ashi ewurkpa.

¹⁵ Ijiptebi nɛ Keenanebi na ka ta bumo be amansherbi kikɛ n tɔ ajibi n loge nɛ Ijiptebi kikɛ ba Josɛf kutɔ m ba kaŋɛ mo le: “Anyi be amansherbi kikɛ loge, amoso, sa anyi ajibi nɛ an sa maŋ wu fo anishito.”

¹⁶ Nɛ Josɛf kaŋɛ bumo: “To, kumo ere men ta men be asɔbɔya m ba kaa chɛr ajibi ŋkpal men be amansherbi kikɛ ka loge so.”

¹⁷ Ndoŋ nna nɛ b fara a bar bumo be asɔbɔyaana m ba kaa sa Josɛf nɛ e bee sa bumo ajibi. Basa daa bar bumo be egbaŋɛ nɛ bumo be mbolpɔ nɛ mboe nɛ ana nɛ ekurma nna. Amoafɛ basa na be asɔbɔya nɛ b ta n chɛr ajibi n ji loŋ nɛ kafɛ naŋ ya bɔɔ m ba.

¹⁸ Kafɛ na ka fo ekar nɛ b naŋ ba Josɛf kutɔ m ba kaŋɛ mo: “Ebunyampo, anyi maaŋ tiŋ n ta le be kesheŋ ere ŋ ŋana fo so fanɛ anyi be amansherbi kikɛ loge nɛ anyi be asɔbɔya malɛ kikɛ ki feya naniere. Anyi maŋ naa kɔ shɛŋ nɛ an sa fo an nyɛnpe. Naniere anyi gbagba be amu nɛ anyi be nsawule e ka.

¹⁹ Amoso wora kusɔ ko nɛ an sa maŋ wu fo anishito ŋko n shin nɛ anyi be nsawule e baa dese jiga loŋ. Amoso tɔ anyi nseŋ sa anyi asɔ duuso nɛ an duu, saŋɛ na so anyi nɛ anyi be nsawule kikɛ beeŋ ki ewura Fɛɛro peya.”

²⁰ Ndoŋ nna nɛ Josɛf tɔ Ijiptebi be nsawule kikɛ n sa ewura Fɛɛro. Ekama nyam daŋ fa mbe kasawule nna, ŋkpal manɛ so, akoŋ na daŋ baa shi nna ga n sa ekama. Amoso nsawule na kikɛ daŋ ki Fɛɛro peya nna

²¹ nɛ Josɛf shin nɛ ekama nyam ashi Ijipt be kasawule so kikɛ ki Fɛɛro be anya.

²² Efuli na so kikɛ bɔrɛmatapoana be kasawule nawule nɛ e daa maŋ tɔ, ŋkpal manɛ so, bumo ere daa la ewura Fɛɛro be beshumpo nna nɛ e bee sa bumo ajibi saŋkikɛ. Amoso nɛ bumo alɛ daa maŋ fa bumo be nsawule na.

²³ Basa na kikɛ ka ki Fɛɛro peya na nɛ Josɛf kaŋɛ bumo: “To, naniere ŋ ka tɔ menyi nɛ men be nsawule n sa Fɛɛro ere, asɔ duuso nde nɛ men ta n duu men be nsawule na so.

²⁴ Ama men baa nyiŋi fanɛ men kaŋ teŋi loŋ be asɔ na, menyeeŋ nase amo ntuŋ anu nseŋ ta katuŋ koŋwule n sa ewura Fɛɛro. Ntuŋ ana so nɛ a ka na menyeeŋ tiŋ n ta amo be ako ŋ ki aduuso nseŋ ta amo nɛ a ka na nɛ menyi nɛ men be mbia nɛ men be laŋ to ebi kikɛ e baa ji.”

²⁵ Ndoŋ nna nɛ b kaŋɛ Josɛf: “Ebunyampo, fo mɔlga anyi be ŋkpaana, amoso an shuli fanɛ, anyeeŋ baa la Fɛɛro be anya fanɛ kananɛ fo kaŋɛ na.”

²⁶ Amoso Josɛf daŋ shin nna nɛ k ki Ijipt kikɛ be mbra fanɛ esa kama be adɔjibi be ntuŋ anu so be katuŋ koŋwule kama la ewura Fɛɛro peya nna. Hale nɛ mbre loŋ be mbra na malɛ kraa shuŋ. Bɔrɛmatapoana nawule be nsawule e daa maŋ ki ewura Fɛɛro peya.

²⁷ Israɛlebi na daŋ chena Ijipt be kakpa nɛ baa tre Goshen na nna n dii dama nseŋ nya mbia damta n ti so.

²⁸ Nfɛ kuduashunu nɛ Jeekɔb daŋ ji Ijipt saŋɛ na so nɛ mbe nfɛ kikɛ daŋ ya yili kalfa nɛ adena nɛ ashunu.

²⁹ Mbe luwu be saŋɛ ka ba kaa taga to nɛ e tre Josɛf ŋ kaŋɛ mo: “Nɛ fo baa sha ma asheŋ bre, fo ŋini ma kelela nseŋ ji kashenteŋ n ta fo enɔ n wɔtɔ ma kebembi be kaseto n nase kɔnɔ kpakpaso fanɛ ŋ kaŋ wu, fo maaŋ puli ma Ijipt nfe.

³⁰ Mee sha fanɛ b puli ma kakpa nɛ n tutoana wɔ nna, amoso ŋ kaŋ wu, fo ya puli ma kakpa nɛ b puli n tutoana na.” Nɛ Josɛf kaŋɛ mo: “Meeŋ wora loŋ.”

³¹ Nɛ Jeekɔb kaŋɛ mo: “Nase kɔnɔ fanɛ ŋ kaŋ wu feeŋ wora loŋ.” Ndoŋ nna nɛ Josɛf nase kɔnɔ na nɛ Jeekɔb gbir mbe edesekpa m bunyaŋ Ebɔrɛ.