Jɛnesis 46 - EBƆRƐ BE KAWƆL

Jeekɔb nɛ mbe kanaŋ to ebi ka kaa n yɔ Ijipt be asheŋ

¹ Ndoŋ nna nɛ Jeekɔb bela ase n ta kusɔ kama nɛ e kɔ m pɛ Ijipt be ekpa loŋ m ba fo Bɛshiba nseŋ lara esarga ndoŋ n sa mo tuto Aizek be Ebɔrɛ na.

² Kumo be kanyɛso nɛ Jeekɔb ku bɔrɛdare n nu Ebɔrɛ ka tre mo: “Jeekɔb, Jeekɔb.” Nɛ Jeekɔb shuli ŋ kaŋɛ: “Ma nde.”

³ Nɛ Ebɔrɛ kaŋɛ: “Ma, Enyɛnpe Ebɔrɛ, fo tuto be Ebɔrɛ na e naa malga na. Sa maŋ kaa lɔ keyɔ Ijipt be kufu, ŋkpal manɛ so, meeŋ ya ta fo nɛ fo kanaŋ to ebi ŋ ki efuli lempo ndoŋ.

⁴ Ma nɛ fo e naaŋ yɔ Ijipt, ama kachako abaanaaworasheŋ meeŋ naŋ bar fo kanaŋ to ebi kasawule ere so. Fo luwu achɛ, Josɛf beeŋ keta fo nɛ fo wu.”

⁵ Kede be kaman nɛ Jeekɔb lar Bɛshiba m pɛ Ijipt be ekpa. Mbe mbia daŋ ta mo nɛ bumo be mbia nɛ bumo be beche n wɔtɔ egbaŋɛturko nɛ ewura Fɛɛro daŋ ta n shoŋi bumo na to nna.

⁶ Asɔ nɛ b daŋ ta n ti bumo be amu so n yɔ e daa la bumo be asɔbɔya nɛ bumo be kanya kama nɛ b daŋ nya Keenan be kasawule so kikɛ. Jeekɔb nɛ mbe kaman to ebi kikɛ nyam e daŋ yɔ Ijipt,

⁷ bumo e la fanɛ mbe bibinyɛn nɛ mo nanabi nyɛnsoana nɛ mbe bibiche nɛ mo nanabi chesoana nɛ bekama nɛ b lar mo to kikɛ nyam.

⁸ Jeekɔb be kanaŋ to ebi nɛ mo nɛ bumo daŋ yɔ Ijipt na be atre nde. Emo nɛ e juŋkpar n daa la mbe wurkoŋ Ruben.

⁹ Ruben malɛ be mbia e daa la Hanɔk nɛ Palu nɛ Hezrɔn nɛ Karmi.

¹⁰ Jeekɔb pibi nyɔsopo e daa la Simiɔn nɛ mo alɛ be mbia daa la Jemuwɛl nɛ Jamin nɛ Ohad nɛ Jakin nɛ Zohar nɛ Shawul nɛ e daa la Keenanche ko pibi na.

¹¹ Livai e daŋ naŋ bɛ so nɛ mbe mbia be atre daa la Gɛrshon nɛ Kohaf nɛ Merari.

¹² Juda malɛ e daŋ naŋ bɛ so nɛ mbe mbia be atre daa ji: Ɛr nɛ Onan nɛ Shela nɛ Pɛrɛs nɛ Zɛra. Ɛr nɛ Onan bre daŋ wu Keenan be kasawule so nna. Pɛrɛs malɛ be mbia daa la Hɛzrɔn nɛ Hamul.

¹³ Isakar malɛ be mbia e daa la Tola nɛ Puwa nɛ Jashub nɛ Shimron.

¹⁴ Zɛbyulɔn be mbia malɛ be atre e daa la Serɛd nɛ Elon nɛ Jaleel.

¹⁵ To, bibinyɛn nɛ Lia daŋ kurge n sa Jeekɔb ashi Mɛsopoteemia nna na. Daina nawule e daa la mo pibi cheso ndoŋ. Ama Jeekɔb be bibinyɛn nɛ bibiche kikɛ daa wɔ mbia adesa nɛ asa.

¹⁶ Gad malɛ be mbia e daa la Zefon nɛ Hagai nɛ Shunai nɛ Ezlon nɛ Erai nɛ Arodai nɛ Areli.

¹⁷ Ashɛr malɛ be mbia be atre e daa la Imna nɛ Ishwa nɛ Ishwi nɛ Beraya. Mbia na bumo sipoche e daa la Sera. Beraya malɛ be mbia be atre e daa la Heber nɛ Malkiɛl.

¹⁸ Lia be kebita Zilpa nɛ mo tuto Leeban daŋ sa mo na daŋ nya mbia nɛ benanabi kuduashe nna n sa Jeekɔb.

¹⁹ Jeekɔb be bibinyɛn nɛ mo nɛ Reechel malɛ daŋ kurge e daa la Josɛf nɛ Bɛnjamin.

²⁰ Bibinyɛn anyɔ nɛ baa tre Manase nɛ Efrayim na nɛ Or be kegbirwura Potifera pibiche Asenat daŋ kurge n sa Josɛf ashi Ijipt.

²¹ Bɛnjamin malɛ be mbia e daa la Bela nɛ Bekaa nɛ Ashbel nɛ Gera nɛ Naaman nɛ Ehai nɛ Rosh nɛ Mupim nɛ Hupim nɛ Ard.

²² Bibinyɛn nɛ benanabi nyɛnso nɛ Jeekɔb nɛ Reechel daŋ nya kikɛ daa wɔ mbia kuduana.

²³ Dan malɛ be kebia e daa la Hushim.

²⁴ Naftali malɛ be bibinyɛn e daa la Jaziɛl nɛ Guni nɛ Jɛza nɛ Shilɛm.

²⁵ Bibinyɛn nɛ benanabi nyɛnso ashunu nɛ Reechel be kebita Bilha nɛ mo tuto Leeban daŋ sa mo na daŋ kurge n sa Jeekɔb.

²⁶ Jeekɔb be basa gbagba nɛ b daŋ yɔ Ijipt daa wɔ basa adeshe nɛ ashe, mbe mbia be beche daa maŋ ti so.

²⁷ Bibinyɛn anyɔ nɛ Josɛf daŋ kurge ashi Ijipt n shin nɛ Jeekɔb be kanaŋ to ebi nɛ b daŋ yɔ Ijipt na kikɛ daa wɔ basa adushunu.

Jeekɔb nɛ mbe kanaŋ to ebi ka fo Ijipt be asheŋ

²⁸ Jeekɔb daŋ shuŋi Juda nna fanɛ e juŋkpar bumo n ya kaŋɛ Josɛf fanɛ e ba shɛr bumo to ŋ ŋini bumo kakpa nɛ Goshen wɔ. B ka ba fo Goshen be kasawule so

²⁹ nɛ Josɛf bela ase n luri mbe gbaŋɛturko to m pɛ ekpa nɛ e ya tu mo tuto Jeekɔb ndoŋ. Josɛf ka wu mo tuto nɛ e ya ber mo to m pɛ mo to nseŋ shu n chɛr ga.

³⁰ Ndoŋ nna nɛ Josɛf mo tuto Jeekɔb kaŋɛ mo: “To, naniere bre nɛ n wu, k par ma, ŋkpal manɛ so, ŋ gbagba wu naniere fanɛ fo kraa wɔ ŋkpa to.”

³¹ Kumo be kaman nɛ Josɛf kaŋɛ mo daana nɛ mo tuto be kowu to ebi na kikɛ le: “A daga fanɛ n yɔ naniere n ya kaŋɛ ewura Fɛɛro fanɛ n daana nɛ n tuto be kowu to ebi kikɛ nɛ b daa wɔ Keenan be kasawule so na ba ŋ kutɔ nfe.

³² Meeŋ kaŋɛ mo fanɛ men la asɔbɔyakpapoana nna m bar men be mbolpɔ nɛ men be asɔbɔya be yiri yiri nɛ men be asɔ kikɛ nyam.

³³ Amoso, nɛ ewura Fɛɛro kaŋ tre menyi m bishi menyi kushuŋ nɛ menyee shuŋ,

³⁴ men kaŋɛ mo le: ‘Anyi be kebia to kikɛ anyi, fo anya, la asɔbɔyakpapoana nna fanɛ an nananyɛnana m ba fo mbre.’ Nɛ men kaŋɛ mo loŋ e beeŋ sa menyi ekpa nɛ men ya kaa wɔ Goshen be kasawule so, ŋkpal manɛ so, Ijiptebi nɛ mbolpɔkenipoana maŋ kɔ shɛŋ.”