Jɛnesis 45 - EBƆRƐ BE KAWƆL

Josɛf ka kaŋɛ mo daana esa nɛ e la mo be asheŋ

¹ K ka fo le na, Josɛf daa maŋ naŋ tiŋ nɛ e keta mbe kumu nseŋ kaŋɛ basa pɔtɛ nɛ b daa wɔ ndoŋ na le: “Ekama e lar nfe ŋ ka anyi.” Amoso esa pɔtɛ kama daa maŋ naa wɔ Josɛf kutɔ saŋɛ nɛ e lara mbe kumu ŋ ŋini mo daana

² nseŋ shu awɔrso ga hale nɛ Ijiptebi nɛ b daa wɔ kowu na nu e ka bee shu. Ewura Fɛɛro be laŋ to ebi gba nu mbe kushu na be asheŋ.

³ Kusɔ nɛ Josɛf daŋ kaŋɛ bumo e daa la: “Ma Josɛf nna na. N tuto kraa wɔtɔ a?” Ama mo daana na daa maŋ tiŋ nɛ b sa mo mbe mmalga na be atuwebi, ŋkpal manɛ so kufu daŋ pɛ bumo nna ga ashi mbe anishito.

⁴ Ndoŋ nna nɛ Josɛf kaŋɛ mo daana na: “Men firgi a ba ma kutɔ nfe.” B ka firgi n taga mo to nɛ e kaŋɛ bumo: “Ma, men sipo Josɛf nɛ men daŋ fa n sa Ijiptebi na nna na.

⁵ Men sa maŋ shin nɛ men be ŋgbene e jija menyi. Menyi alɛ e sa maŋ nya agbo n wora men be amu ŋkpal men ka daŋ fa ma so so, ŋkpal manɛ so, basa be kenya ŋkpa so e shin nɛ Ebɔrɛ juŋkpar n shuŋi ma nfe.

⁶ Akoŋ ere ka tɔr kumo be nfɛ anyɔ e kraa la na, kumo alɛ kraŋ ka nfɛ anu. Nfɛ anu na be jemanɛ so basa maaŋ tiŋ n dɔ, a bishi nɛ b duu asɔ ŋko a teŋi.

⁷ Ama Ebɔrɛ shin nna nɛ n juŋkpar menyi m ba nfe nɛ m ba bɔla le be ekpa ere so m mɔlga menyi, saŋɛ na so, menyi nɛ men be kanaŋ to ebi maaŋ mur.

⁸ Amoso, mannɛ menyi e bar ma nfe, Ebɔrɛ e bar ma nfe m ba ta ma ŋ ki ewura Fɛɛro be kowu to ebi kikɛ nyam so be enimu nɛ mee ji kuwura Ijipt be efuli so kikɛ.

⁹ Amoso men nya manaŋ m bɛta n ya kaŋɛ n tuto le: ‘Fo pibi Josɛf yɛ, Ebɔrɛ ta mo ŋ ki Ijipt be efuli so kikɛ be gomena, amoso nya manaŋ m ba kaa wɔ mo kutɔ nfe.

¹⁰ Fo ba feeŋ ya kaa wɔ Goshen be kaba so. Fo nɛ fo mbia nɛ fo nanabiana nɛ fo asɔbɔya nɛ kusɔ kama nyam nɛ fo kɔ beeŋ ba kaa wɔ nfe m mata ma.

¹¹ Fo ba kaa wɔ Goshen, meeŋ baa keni fo nɛ fo kanaŋ to ebi so, ŋkpal manɛ so, nfɛ anu mo nɛ a kraa wɔ anyi be anishito ere kraa la akoŋ be nfɛ nna. Ma alɛ maa sha fanɛ akoŋ nɛ ketentaŋase e mɔ fo nɛ fo kowu to ebi nɛ fo basa kikɛ nɛ fo asɔbɔya kikɛ.’ ”

¹² Kubɔya na be kaman nɛ e kilgi ŋ kaŋɛ mo daana na nɛ Bɛnjamin: “Men gbagba wu nna na fanɛ ma Josɛf gbagba e naa malga men kutɔ na.

¹³ Men kaŋɛ n tuto bunyaŋ nɛ b kɔ a sa ma Ijipt nfe nseŋ kaŋɛ mo kusɔ kama nyam nɛ men wu nfe ere be asheŋ nseŋ bar n tuto nfe manaŋ.”

¹⁴ Ndoŋ nna nɛ e pɛ mo sipo Bɛnjamin m mata mbe kumu nseŋ shu nɛ Bɛnjamin malɛ gba shu ga.

¹⁵ Kumo be kaman nɛ Josɛf nɛ mo daana na pɛ abar to kashaso n shu fraa. Ade be kaman nɛ mo daana na fara a malga mo kutɔ yɛlyɛla so.

¹⁶ Josɛf mo daana na nɛ mo sipo Bɛnjamin be keba na be baru ka fo ewura Fɛɛro pe nɛ mo nɛ mbe benimu kikɛ be ŋgbene fuli bumo ga.

¹⁷ Ndoŋ nna nɛ Fɛɛro kaŋɛ Josɛf le: “Keni, kaŋɛ fo daana na fanɛ b bela ase n ta esulɔ n sulɔ bumo be ekurma m bɛta n yɔ Keenan

¹⁸ n ya bar men tuto nɛ bumo be beche nɛ mbia nfe. Nɛ men ba, meeŋ sa menyi Ijipt be kasawule lela ga nɛ men chena ndoŋ n nu ebel.

¹⁹ Kumo be kaman nɛ fo naŋ kaŋɛ bumo le: ‘Men ta Ijipt nfe be egbaŋɛturko n ti so n ya ta men be mbia nɛ men be beche nɛ men tuto n ti so m ba.

²⁰ Men sa maŋ ya shin nɛ men be asɔ nɛ men maaŋ teŋ bar na be asheŋ e tir menyi, ŋkpal manɛ so, menyeeŋ nya asɔ lela Ijipt a chɔ amo.’ ”

²¹ Ndoŋ nna nɛ Jeekɔb be mbia na wora asheŋ nɛ ewura Fɛɛro kaŋɛ fanɛ b wora na kikɛ. Nɛ Josɛf bɛ Fɛɛro be kɔnɔ so n sa bumo egbaŋɛturko nɛ ekpa to be ajibi jiso.

²² Josɛf daŋ sa mo daana na kikɛ asɔbuuso popɔr koko nna nseŋ sa Bɛnjamin malɛ asɔbuuso popɔr be yiri ntuŋ anu nɛ gbiti be ndarbi alfa asa.

²³ Mo tuto malɛ le be asɔ ere nɛ e daŋ ta n chise mo: Ekurma kudu e daŋ sulɔ Ijipt be kasawule so be asɔ lela be yiri yiri nɛ ekurma cheso kudu malɛ sulɔ ayu nɛ bodobodo nɛ asɔ jiso ko n ti so fanɛ a baa la mbe keba be ekpa to be ajibi.

²⁴ Ade kikɛ be kaman nɛ e sa mo daana nɛ mo sipo ekpa. B ka bee yɔ nɛ e kaŋɛ bumo: “Men sa maŋ ya kaa bile ekpa to!”

²⁵ B ka lar Ijipt na nɛ b ta loŋ m ba bumo tuto Jeekɔb kutɔ ashi Keenan be kasawule so.

²⁶ B ka fo nɛ b kaŋɛ mo: “Josɛf kraa wɔ ŋkpa to. Mo e la Ijipt be efuli so kikɛ be gomena gba kuraa!” Ndoŋ nna nɛ kamalga na mɔ Jeekɔb kɔnɔ nɛ e maŋ tiŋ nɛ e yirda bumo.

²⁷ Ama b ka kaŋɛ mo asheŋ nɛ Josɛf daŋ kaŋɛ na kikɛ nɛ ŋkpal egbaŋɛturko nɛ Josɛf daŋ ta n shoŋi fanɛ a ya bar mo na so so, nɛ mbe kagbene naŋ fuli mo nɛ e nya keleŋto mo to

²⁸ nseŋ kaŋɛ: “Naniere bre m pin asheŋ na ka la kashenteŋ. Kashenteŋto, m pibi Josɛf kraa wɔ ŋkpa to. Ma alɛ beeŋ ya wu mo pɔɛŋ nseŋ wu.”