Jɛnesis 40 - EBƆRƐ BE KAWƆL

Josɛf ka kute kabutiwura be edare be afito be asheŋ

¹ Asheŋ ere be kaman be kachako nɛ esa nɛ e bee sa Ijipt be ewura Fɛɛro asɔnuuso nɛ e bee nuu nɛ mbe bodobodo worapo nimuso wora n da bumo nyɛnpe Ijipt be Ewura so.

² Ndoŋ nna nɛ Fɛɛro nya agbo n wɔtɔ mbe asɔnuuso kenipo nimuso nɛ mbe bodobodo worapo nimuso na.

³ Amoso e daŋ shin nɛ b ti bumo ebu ashi kakpa nɛ Josɛf gba daa wɔ kabuti to na nna.

⁴ B ka wɔ kabuti na to na nɛ bekumpo be enimu na ta bumo m bɔɔ Josɛf enɔ nɛ e bee keni so.

⁵ Kachako nɛ bumo basa anyɔ be ekama ku edare kanyɛ koŋwule na. Bumo be edareana na malɛ be kekama daa ŋini kusɔ ko nna.

⁶ B ka ku edareana na ŋklade chipurso nɛ Josɛf wu fanɛ bumo be ŋgbene maŋ fuli bumo.

⁷ Ndoŋ nna nɛ e bishi bumo le: “Manɛ e ba nɛ men gbir anishito kabre loŋ?”

⁸ Nɛ b kaŋɛ mo le: “Anyi benyɔ kikɛ ku edareana nna, anyi alɛ maŋ nya esa kama nɛ e kute amo be afito n sa anyi.” Nɛ Josɛf kaŋɛ bumo: “Edareana be afito be kekute kikɛ wɔ Ebɔrɛ kutɔ nna, amoso, men kaŋɛ ma men be edareana na.”

⁹ Ndoŋ nna nɛ asɔnuuso kenipo nimuso na kaŋɛ Josɛf mbe edare. E yɛ: “Ma edare to n wu kefeelebi nɛ k bee sɔr asɔrso nɛ baa tre greep na nɛ k kɔ ayabi asa kumo so ka yil ma anishito.

¹⁰ Epul na to nɛ k futi n sɔr asɔrso nɛ baa tre greep na nɛ a chɛ gbi gbi nseŋ daŋ m bel.

¹¹ Jemanɛ na so nɛ ewura Fɛɛro be kusɔnuuasɔ wɔ ma enɔ to nɛ n ya chuge egreep na n nyaŋ amo be nchu n wɔtɔ kumo to n ya sa mo.”

¹² Ndoŋ nna nɛ Josɛf kaŋɛ mo: “Fo edare na be kifito nde. Ayabi asa na la nchɛ asa nna.

¹³ Ta a ba nchɛ asa to, Fɛɛro beeŋ lara fo kabuti ere to n shin nɛ fo naŋ ya kaa yil eyilikpa nɛ fo daa yil na a ta kusɔnuuasɔ nɛ kumo be asɔ a sa mo Fɛɛro fanɛ kananɛ fo daa wora na.

¹⁴ Ama mee kule fo nna fanɛ nɛ kusɔ kama kaŋ nyalɛ n sa fo, fo nyiŋi ma nseŋ wora ma kelela. Kaŋɛ Fɛɛro ma asheŋ n lara ma ashi kabuti ere to.

¹⁵ Ŋkpal manɛ so, b daŋ pɛ ma eleŋso nna ashi Hibruwebi be kasawule so m ba nfe. Ma alɛ ka ba nfe ere gba, m maŋ wora shɛŋ n daga kabuti.”

¹⁶ Ewura Fɛɛro be bodobodo worapo nimuso na ka nu kananɛ Josɛf sa edare na be kifito nɛ k wɔ bel na nɛ e kaŋɛ Josɛf: “Ma alɛ gba ku edare nna n wu ŋ ka sulɔ bodobodo be alantaŋɛ asa ma kumu so.

¹⁷ Kelantaŋɛ sasopo nɛ k daa bɛ esoso gbagba na to daa kɔ Fɛɛro be ajibi be yiri yiri nɛ b ta paanu be nyifu n wora nna, ama mbuibi daa ba nna m ba kaa ji amo kelantaŋɛ na to ashi ma kumu so.”

¹⁸ Ndoŋ nna nɛ Josɛf kaŋɛ mo: “Fo edare na be kifito nde. Alantaŋɛ asa na la nchɛ asa nna.

¹⁹ Ta a ba nchɛ asa to Fɛɛro beeŋ lara fo kabuti ere to n shin nɛ b chɛ fo efɔl n shiga kedibi so m mɔ nɛ mbuibi e ba ji fo kebuni.”

²⁰ Edareana na be kaman be kachɛ sasopo na daa la Fɛɛro be kakurgeachɛ nna nɛ e wora kejigboŋ n sa mbe benimu kikɛ nseŋ lara asɔnuuso kenipo nimuso na nɛ bodobodo worapo nimuso na ashi kabuti to m ba benimu kikɛ be anishito.

²¹ E ka lara bumo na nɛ e bɛta asɔnuuso kenipo nimuso na n yili mbe eyilikpa, saŋɛ na so e beeŋ naa ta mo ere Fɛɛro be kusɔnuuasɔ na nɛ kumo be asɔ a sa mo.

²² Ama bodobodo worapo nimuso na bre e daŋ shin nna nɛ b chɛ mo efɔl n shiga fanɛ kananɛ Josɛf daŋ kute bumo be edareana na be afito n sa bumo na.

²³ Asheŋ nɛ a wora ere kikɛ be kaman, Fɛɛro be asɔnuuso kenipo nimuso na daŋ maŋ naŋ nyiŋi Josɛf be asheŋ, e daŋ teŋ mo so nna.