Jɛnesis 39 - EBƆRƐ BE KAWƆL

Josɛf nɛ Potifa be eche be asheŋ

¹ Ishmaɛlebi nɛ b daŋ tɔ Josɛf na ka ta mo n yɔ Ijipt be efuli so, Potifa nɛ e la Ijipt be ewura Fɛɛro be esoji nɛ baa kuŋ mo na be enimu na e daŋ tɔ mo. Potifa gba daa la Ijiptebi nna.

² Enyɛnpe na daa wɔ Josɛf kutɔ nna a nɛfa mo ashi kusɔ kama nɛ e bee wora ashi mo nyɛnpe Ijiptnyɛn na be laŋ to.

³ Josɛf mo nyɛnpe Potifa ka wu fanɛ Enyɛnpe Ebɔrɛ na wɔ Josɛf kutɔ nsaa nɛfa kusɔ kama nɛ e bee wora na

⁴ nɛ Josɛf be asheŋ bɔlɔ mo kenishi ga. Ndoŋ nna nɛ e ta mo ŋ ki esa nɛ e bee shuŋ mbe ashuŋ nsaa keni mbe laŋ so.

⁵ Baŋ yili jemanɛ nɛ Potifa ta Josɛf ŋ ki mbe laŋ to nɛ mbe asɔ kikɛ so be enimu na, Enyɛnpe na daŋ kpal Josɛf so nna n nɛfa mbe laŋ to nɛ mbe ndɔ to be asɔ kikɛ nyam.

⁶ Josɛf ka daŋ baa juŋkpar kusɔ kama ashi mbe laŋ to so, Potifa daŋ maŋ naa fɔŋ shɛŋ so ama ajibi nɛ e beeŋ ji nawule. Josɛf malɛ daŋ pɔr nɛnɛ nna a walɛ kayɛrbi.

⁷ B wɔtɔ loŋ nɛ Josɛf mo nyɛnpe be eche be kagbene ba kilgi Josɛf so nɛ mbe kayɛlga ba mo so nɛ kaŋɛ Josɛf le: “Ba nɛ an ya di keche nɛ kenyɛn ai.”

⁸ Nɛ Josɛf kini nseŋ kaŋɛ kache na: “Ŋ ka bee ji kejuŋkpar laŋ ere to ere, n nyɛnpe maŋ naa fɔŋ shɛŋ so, kusɔ kama nɛ e kɔ e ta kumo nna m bɔɔ ma enɔ.

⁹ Kenimu be kaplɛa so, esa kama maŋ chɔ ma laŋ ere to. N nyɛnpe maa mɔn ma shɛŋ shɛŋ laŋ ere to ama fo nawule nɛ e maŋ ta m bɔɔ ma enɔ, ŋkpal manɛ so, mbe eche e la fo. To, nɛ nuso nɛ meeŋ tiŋ n nya kagbene kpakpaso n wora le be kulubi ŋ gbiti Ebɔrɛ?”

¹⁰ Asheŋ nɛ Josɛf daŋ malga na kikɛ daa maŋ luri kache na to, amoso saŋkikɛ e daa kaŋɛ Josɛf kesheŋ koŋwule na nna, nɛ Josɛf malɛ daa maa nu a sa mo nsaa gelge mo.

¹¹ Kachako nɛ Josɛf yɔ laŋ to nɛ e ya shuŋ nɛ laŋ na to be beshumpo na be ekama maŋ wɔtɔ.

¹² Ndoŋ nna nɛ kache na ya pɛ Josɛf be kale to a gberge a kaŋɛ mo le: “Shin nɛ an di! Shin nɛ an di!” Ndoŋ nna nɛ Josɛf gbaŋ mbe kale n wɔtɔ kache na be enɔ to nseŋ shile n lar laŋ na to.

¹³ Kache na ka wu fanɛ Josɛf yige mbe kale n wɔtɔ mbe enɔ to nseŋ lar kowu n shile na

¹⁴ nɛ e tre mbe laŋ na to be beshumpo na ŋ kaŋɛ bumo: “Men keni, ŋ kul bar Hibruw ere nna nɛ e ba tege anyi. Men keni, e ba ma ebu to nna nɛ e ba pur ma nɛ m boŋ to awɔrso ga.

¹⁵ E ka nu kananɛ m boŋ to na nɛ e yige mbe kale n wɔtɔ ma enɔ to nseŋ shile n lar kowu.”

¹⁶ Kede be kaman nɛ e ta Josɛf be kale na n nase m mata mbe kumu hale nɛ Josɛf mo nyɛnpe na ya ba.

¹⁷ Mo kul ka ba nɛ e kaŋɛ mo kesheŋ koŋwule na fanɛ: “Keni, kenya nɛ e la Hibruw nɛ fo bar laŋ to m ba wɔtɔ anyi to nfe na luri nna nɛ e ba pur ma.

¹⁸ Ama ŋ ka baŋ boŋ to n shu awɔrso nɛ e gbaŋ mbe kale n wɔtɔ ma enɔ to nseŋ shile n lar kowu.”

¹⁹ Josɛf mo nyɛnpe na ka nu kusɔ nɛ mbe eche kaŋɛ na nɛ k nu mo agbo nɛ mbe kagbene kaa mo ga.

²⁰ Ndoŋ nna nɛ Josɛf mo nyɛnpe na pɛ mo n ti ebu, kaboŋ nɛ baa ti ewura Fɛɛro be basa lubi ebu na.

²¹ Enyɛnpe Ebɔrɛ na daa wɔ Josɛf kutɔ ashi kabuti na to gba nna a ŋini mo mbe kasha nseŋ shin nɛ Josɛf be asheŋ bee bɔlɔ kabutikenipo na kenishi.

²² Ndoŋ nna nɛ kabutikenipo na ta basa nɛ b daa wɔ kabuti na to kikɛ nɛ kusɔ kama nyam nɛ k daa wora ndoŋ na m bɔɔ Josɛf enɔ nɛ e bee keni so.

²³ Kabutikenipo na be lakal daa maŋ naa deŋ kusɔ kama nɛ Josɛf daa wora so, ŋkpal manɛ so, Enyɛnpe na daa wɔ mo kutɔ nna a nɛfa kusɔ kama nɛ k daa wɔ mbe enɔ to nɛ k bee wora nɛnɛ.