Jɛnesis 37 - EBƆRƐ BE KAWƆL

Josɛf be edare be asheŋ

¹ Jeekɔb daŋ chena Keenan be kaboŋ nɛ mo tuto daa wɔ fanɛ efɔ na nna.

² Jeekɔb nɛ mbe kanaŋ to ebi be asheŋ nde. Josɛf ka daŋ n fo nfɛ kuduashunu na nɛ mo nɛ mo da nyɛnsoana nɛ b la mo tuto be beche Bilha nɛ Zilpa be mbia na daa kpa mbolpɔ. Loŋ be saŋɛ na so Josɛf daa wɔtɔ nna a ta mo daana na be asheŋ woraso m ba kaa kute a sa mo tuto.

³ Jeekɔb malɛ daa sha Josɛf nna ga a chɔ mbe mbia na be ekama ŋkpal e ka daa la mbe mbel to be kebia so. Amoso e daŋ baa piŋi tenteŋ muchɛr muchɛr nna n sa Josɛf.

⁴ Mo daana ka wu fanɛ bumo tuto bee sha Josɛf a chɔ bumo na nɛ b kishi mo nsaa maŋ naa malga mo kutɔ kashaso.

⁵ Kachako nɛ Josɛf ku edare ko. E ka kaŋɛ mo daana edare na nɛ b kpal kumo so ŋ kishi mo ga n ti so.

⁶ Le nɛ e daŋ kaŋɛ bumo: “Men nu edare mo nɛ ŋ ku ere.

⁷ Edare na to n wu fanɛ an yɔ ndɔ to nna n ya teŋi ayu a kre to a nase nɛ ma kuyu pati niŋi to n yili nɛ menyeyaana ba gama ŋ kulti meya na nsaa jɔŋɛ kumo ase.”

⁸ Ndoŋ nna nɛ mo daana na bishi mo: “Ama fee fɛ nna fanɛ feeŋ ba ji anyi so kuwura ŋko feeŋ ba kaa kɔ eleŋ anyi so a?” Nɛ b naŋ kpal edare na nɛ mbe mmalga so ŋ kishi mo ga n ti so.

⁹ Kachako nɛ Josɛf naŋ ku edare ko nseŋ naŋ kute kumo ŋ ŋini mo daana na. E yɛ: “Men nu nfe, n yaŋ ku edare ko nna n wu epeŋi nɛ kufɔl nɛ achɛkpabi kudukako ka bee jɔŋɛ ma ase.”

¹⁰ E ka kaŋɛ mo tuto edare na nɛ mo tuto ponte mo so ŋ kaŋɛ: “Nuso be edare nɛ fo ku loŋ? Fee fɛ fanɛ ma nɛ fo nio nɛ fo daana beeŋ ba kaa jɔŋɛ fo ase kashenteŋto nna a?”

¹¹ Ndoŋ nna nɛ mo daana na fara a kɔ mo kukɔrkɔ ŋko a besa mo eyur ashi bumo be ŋgbene to, ama mo tuto bre daa maŋ teŋ kesheŋ na so.

Josɛf mo daana ka fa mo be asheŋ

¹² Kachako nɛ mo daana na kpa bumo tuto be mbolpɔ a yɔ Shɛkɛm,

¹³ nɛ bumo tuto Jeekɔb kaŋɛ Josɛf le: “Fo daana wɔ Shɛkɛm a keni mbolpɔ so, amoso shin nɛ n shuŋi fo bumo kutɔ.” Nɛ Josɛf shuli ŋ kaŋɛ: “To.”

¹⁴ Ndoŋ nna nɛ mo tuto kaŋɛ mo: “Keni, yɔ naniere n ya keni kananɛ fo daana nɛ asɔbɔya na du. Fo kaŋ wu bumo, fo naŋ ba kaŋɛ ma kusɔ nɛ k wɔtɔ.” Ndoŋ nna nɛ e shin nɛ Josɛf bɔla Hibrɔn be ketaŋɛ to a yɔ Shɛkɛm.

¹⁵ E ka ya fo Shɛkɛm nɛ kanyɛn ko wu mo nɛ e na ndoŋ a kilgi to nɛ e bishi mo: “Manɛ nɛ fee fin?”

¹⁶ Nɛ Josɛf kaŋɛ mo: “N daana nɛ mee fin. Jande nɛ fo nyi kakpa nɛ b wɔ a keni anyi be mbolpɔ so, fo ŋini ma ndoŋ.”

¹⁷ Nɛ kanyɛn na kaŋɛ mo: “B maŋ naa wɔ nfe. N daŋ nu b ka kaŋɛ abar fanɛ b yɔ Dotan.” Ndoŋ nna nɛ Josɛf ju mo daana na be kebɔr n ya tu bumo Dotan.

¹⁸ E kraa wɔ kufɔ nna a ba nɛ mo daana na wu mo nseŋ wora kɔnɔkoŋwule fanɛ e baŋ ba, b mɔ mo.

¹⁹ Le nɛ b daŋ kaŋɛ abar: “Men keni, edarekupo na e ya kaa ba na.

²⁰ Men shin nɛ an mɔ mo n lɛ ketirbu ere be kuko to nseŋ ya kaŋɛ fanɛ kupuŋ to be kusɔbɔya lubi ko e mɔ mo nseŋ keni kananɛ mbe edare ere be asheŋ beeŋ ba ki.”

²¹ Ruben ka nu loŋ nɛ e wora ania a fin kananɛ e beeŋ wora m mɔlga Josɛf ashi bumo be enɔ to nseŋ kaŋɛ bumo le: “Men sa maŋ shin nɛ an lara mbe ŋkpa.

²² Men sa maŋ wora mo shɛŋ. Men shin nɛ an ta mo n lɛ ketirbu ere to ashi kiyi ere to nfe. Ama men sa maŋ shin nɛ an teŋi enɔ m beta mo.” E daŋ kaŋɛ loŋ nna, saŋɛ na so e beeŋ sɔ kebia na bumo be enɔ to n ya sa mo tuto.

²³ Josɛf ka ba fo mo daana na kutɔ nɛ b gbaŋ mbe piŋi tenteŋ muchɛr muchɛr nɛ e daŋ buu na

²⁴ nseŋ ta mo n lɛ ketirbu nɛ k maŋ kɔ nchu to.

²⁵ Kumo be kaman nɛ b ya chena nɛ b ji ajibi nseŋ wu Ishmaɛlebi be eyawujipoana ko ka shi Giliad a yɔ Ijipt. Eyawujipoana na be enyɔma daŋ sulɔ tulale nɛ duwu nɛ asɔ warabi damta nna.

²⁶ Josɛf mo daana na ka wu basa na nɛ Juda kaŋɛ mo sipoana le: “Nɛ an baŋ mɔ an sipo ere nseŋ ta kumo ŋ ŋana, manɛ be tɔnɔ nɛ anyeeŋ nya kumo to?

²⁷ An fa mo n sa Ishmaɛlebi ere bɔ an ka teŋi enɔ m mɔ mo, ŋkpal manɛ so, an sipo gbagba nna nɛ anyi nɛ mo la ŋklaŋ koŋwule.” Ndoŋ nna nɛ bumo nɛ b ka na nu n sa mo.

²⁸ Amoso Ishmaɛlebi be eyawujipoana na ka ba fo kakpa nɛ Josɛf mo daana na wɔ na nɛ b lara Josɛf ketirbu na to n fa mo egbiti be ndarbi adunyɔ n sa Ishmaɛlebi na nɛ b ta mo n yɔ Ijipt be efuli so. Kumo be saŋɛ so nɛ Ruben bre maŋ wɔ bumo kutɔ.

²⁹ Ruben ka laŋɛ m ba ketirbu na ase m ba wu fanɛ Josɛf maŋ naa wɔtɔ nɛ e kpɛa mbe asɔbuuso to ŋkpal kagbenejijaso

³⁰ nseŋ yɔ mo sipoana na kutɔ n ya bishi bumo le: “Kebia ere ka maŋ naa wɔtɔ ere, manɛ nɛ meeŋ ya kaŋɛ mo tuto?”

³¹ Kumo be kaman nɛ b mɔ kaboe nseŋ ta Josɛf be piŋi tenteŋ muchɛr muchɛr na m melti m melti kumo be ŋklaŋ

³² nseŋ ta kale na n ya ŋini bumo tuto m bishi mo le: “Keni kusɔ nɛ an wu, fo kebia be piŋi na nde ŋko mannɛ kumo nna?”

³³ Ndoŋ nna nɛ e pin kumo nseŋ kaŋɛ: “Ma kebia be piŋi nna. Kupuŋ to be kusɔbɔya lubi ko e pɛ mo na. K maŋ naa kɔ emɔrɔ fanɛ kusɔbɔya ko e kpɛa mo to n we.”

³⁴ Ndoŋ nna nɛ e kpɛa mbe asɔbuuso to nseŋ ta kusɔbuuso ko nɛ kumo be kapɔr du sesaga fanɛ bɔtɛ m buu n ta nchɛ damta n shu mbe kebia na be keeli ga.

³⁵ Mbe bibinyɛn nɛ bibiche kikɛ daŋ wushi mo kagbene ŋ gben nɛ e yɛ: “Ayai, m maaŋ tiŋ n yige. Ma nɛ kushu ere e naaŋ yɔ ma nchaŋ to, kakpa nɛ ma kebia na wɔ na.” Kashenteŋto, e daŋ shu ga ŋkpal Josɛf so.

³⁶ Loŋ be saŋɛ malɛ nɛ Ishmaɛlebi nɛ b daŋ tɔ Josɛf na malɛ ta mo n ya fa n sa kanyɛn ko nɛ baa tre Potifa ashi Ijipt be efuli so. Potifa e daa la ewura Fɛɛro be esoji nɛ baa kuŋ mo na be enimu.