Jɛnesis 35 - EBƆRƐ BE KAWƆL

Jeekɔb ka bɛta m ba Bɛtɛl be asheŋ

¹ Asheŋ ere kikɛ be kaman nɛ Ebɔrɛ kaŋɛ Jeekɔb: “Bɛta n ya chena Bɛtɛl nseŋ yuu bɔrɛsure ndoŋ n sa Ebɔrɛ nɛ e daŋ lara mbe kumu ŋ ŋini fo saŋɛ nɛ fo daa shile a ŋana fo da Isɔɔ so na.”

² Jeekɔb ka nu loŋ nɛ e kaŋɛ mbe laŋ to ebi nɛ bumo nɛ b daa wɔ mo kutɔ na kikɛ le: “Men lara agbirana ere kikɛ ashi menyi to n fɔr menyi be amu ashi eyurpi kama to n chɛrga menyi be asɔbuuso

³ nseŋ ba nɛ an yɔ Bɛtɛl n ya yuu bɔrɛsure n sa Ebɔrɛ nɛ e nu n sa ma nsaa wɔ ma kutɔ kaplɛkama nɛ n yɔ saŋɛ nɛ n wɔ awurfoŋ to na.”

⁴ Jeekɔb ka malga loŋ n loge nɛ b ta bumo be agbirana na kikɛ nɛ bumo be akondeana kikɛ n sa mo nɛ e ta amo m puli Shɛkɛm be kedibigboŋ na ase.

⁵ Jeekɔb nɛ mbe kanaŋ ka lar Shɛkɛm a yɔ nɛ Ebɔrɛ shin nɛ kufu pɛ nde nɛ b bɔla amo ase a choŋ na be basa. Amoso b daŋ maŋ tiŋ n wora Jeekɔb nɛ mbe basa shɛŋ.

⁶ Ndoŋ nna nɛ Jeekɔb nɛ basa nɛ b daa wɔ mo kutɔ na kikɛ yɔ Bɛtɛl. Kumo koŋwule nɛ baa tre Luz na, ashi Keenan be kasawule so.

⁷ Nɛ Jeekɔb pɔr bɔrɛsure ndoŋ n sa Ebɔrɛ nseŋ tre kaboŋ na Ɛl Bɛtɛl, ŋkpal manɛ so, ndoŋ nɛ Ebɔrɛ daŋ lara mbe kumu ŋ ŋini mo saŋɛ nɛ e daa shile a ŋana mo da Isɔɔ so na.

⁸ Loŋ be saŋɛ na nɛ Dɛbora, nɛ e daa la kebita a keni Rebɛka so kebiato na wu nɛ b puli mo Bɛtɛl be kedibigboŋ na ase. Loŋ so b daa tre ndoŋ Alɔn Bakut nna.

⁹ Jeekɔb ka bɛta n shi Mɛsopoteemia be efuli so a yɔ Keenan na nɛ Ebɔrɛ naŋ lara mbe kumu ŋ ŋini mo nseŋ nɛfa mo

¹⁰ ŋ kaŋɛ: “Fo ketre e la Jeekɔb, ama b maaŋ naa tre fo Jeekɔb. Fo ketre e la Israɛl naniere.”

¹¹ Kede be kaman nɛ Ebɔrɛ naŋ kaŋɛ mo: “Ma e la Enyɛnpetale Ebɔrɛ na. Meeŋ shin nɛ fo mbia e ba kaa shi ŋ ki efuli damtaana be amuwuraana nɛ bumo be beko e ki bewura.

¹² N ta kasawule nɛ n daŋ ta n sa Eebraham nɛ Aizek na, n sa fo alɛ gba nɛ fo kaman to ebi.”

¹³ Ebɔrɛ ka malga n loge nɛ e yige mo ashi kakpa nɛ e daa malga mo kutɔ na nseŋ choŋ.

¹⁴ Ebɔrɛ ka yige mo n choŋ na nɛ Jeekɔb yuu ndulgi be kejembu ndoŋ nseŋ chulgi asɔnuuso ko nɛ ŋku n wurge kumo so fanɛ sarga na n sa Ebɔrɛ.

¹⁵ Kede be kaman nɛ Jeekɔb nase ndoŋ be ketre Bɛtɛl.

Reechel nɛ Aizek be luwu be asheŋ

¹⁶ Jeekɔb nɛ mbe kanaŋ ka lar Bɛtɛl a yɔ Efraf na nɛ kakurge ta Reechel. Kumo alɛ daa du kpakpa n sa mo.

¹⁷ Mbe kakurge na be asheŋ ka bee ki kpakpa a ti so na nɛ kache nɛ e daa keta mo kurge na kaŋɛ mo: “Reechel, sa maa lɔ kufu, ebinyɛn nɛ fo naŋ nya.”

¹⁸ Kajaa Reechel malɛ daa kɔ luwu nna, ama pɔɛŋ nɛ e wu nɛ e nase mbe kebia na Bɛn Oni. Ama kebia na mo tuto bre daŋ naŋ nase mo Bɛnjamin nna.

¹⁹ Reechel ka wu nɛ b puli mo ashi Efraf be ekpa to. Ndoŋ koŋwule na e la Bɛtlɛhɛm na.

²⁰ Jeekɔb daŋ yuu ndulgi be kejembu nna n yili mbe nchaŋ so. Hale kabre loŋ be ndulgi be kejembu na kraa yil Reechel be nchaŋ na so.

²¹ Kede be kaman nɛ Jeekɔb naŋ lar ndoŋ a yɔ n ya choŋ Mikdal Eder so n yɔ anishito n ya yuu mbe wajɛbu.

Jeekɔb be mbia be asheŋ

²² Saŋɛ nɛ Jeekɔb daa wɔ ndoŋ na nɛ Ruben ya tu mo tuto Jeekɔb mo jipoche Bilha n di nɛ Jeekɔb nu kumo be asheŋ. Jeekɔb daa kɔ mbinyɛnbi kuduanyɔ nna.

²³ Lia be mbia e daa la, Ruben, Jeekɔb be wurkoŋ nɛ Simiɔn nɛ Livai nɛ Juda nɛ Isakar n ta Zɛbyulɔn m bɛ so lalaloge.

²⁴ Reechel be mbia e daa la, Josɛf nɛ Bɛnjamin.

²⁵ Reechel be kebita Bilha be mbia e daa la, Dan nɛ Naftali.

²⁶ Lia be kebita Zilpa be mbia e daa la, Gad nɛ Ashɛr. Jeekɔb be mbinyɛnbi nɛ b daŋ kurge n sa mo ashi Mɛsopoteemia be efuli so nna na.

Aizek be luwu be asheŋ

²⁷ Jeekɔb nite loŋ m ba fo mo tuto Aizek pe ashi Mamre nɛ k daŋ taga Kiriaf Aba na. Kumo koŋwule na e la Hibrɔn na. Ndoŋ nɛ Aizek nɛ Eebraham daŋ chena na.

²⁸ Aizek be nfɛ nɛ e daŋ ji daa wɔ nfɛ kalfa nɛ aduburwa nna.

²⁹ Nfɛ ere be kaman nɛ e wu nɛ mbe mbia Isɔɔ nɛ Jeekɔb puli mo.