Jɛnesis 33 - EBƆRƐ BE KAWƆL

Jeekɔb nɛ Isɔɔ ka shɛr abar to be asheŋ

¹ Kede be kaman nɛ Jeekɔb maŋ kumu so n wu Isɔɔ nɛ mbe basa alfa ana ka bee ba nɛ e kpal loŋ so m barga mbe mbia na to n sa Lia nɛ Reechel nɛ bumo be mbita anyɔ na.

² E daŋ ta mbita na nɛ bumo be mbia nna n juŋkpar nseŋ ta Lia nɛ mbe mbia m bɛ so n ta Reechel nɛ Josɛf m bɛ so lalaloge.

³ Jeekɔb ka wora loŋ na nɛ mo gbagba juŋkpar bumo kikɛ a jɔŋɛ a jɔŋɛ mo da Isɔɔ ase. E daŋ jɔŋɛ mo ase ale shunu nna pɔɛŋ nseŋ tu mo.

⁴ Ndoŋ nna nɛ Isɔɔ malɛ shile n ya ber Jeekɔb to n far n chɛ mo n lɛ mbe enɔ n deŋi mbe abatimu so nɛ bumo benyɔ na kikɛ shu ga.

⁵ Kumo be kaman nɛ Isɔɔ ki ŋ keni n wu beche na nɛ bumo be mbia na nseŋ bishi Jeekɔb le: “Fo nɛ basa mo malɛ nna?” Nɛ Jeekɔb kaŋɛ: “Mbia nɛ Ebɔrɛ wu ma kuwɔr n sa ma, fo kenya nna.”

⁶ Kumo be kaman nɛ mbita na nɛ bumo be mbia ba jɔŋɛ m bunyaŋ Isɔɔ nɛ mbe basa na.

⁷ Nɛ Lia nɛ mbe mbia bɛ so n ta Reechel nɛ Josɛf malɛ m bɛ so lalaloge, nɛ bumo kikɛ jɔŋɛ m bunyaŋ Isɔɔ.

⁸ Nɛ Isɔɔ bishi Jeekɔb le: “Nɛ asɔbɔya damta nɛ n shɛr to na malɛ a?” Nɛ Jeekɔb kaŋɛ mo: “N ta bumo nna n sa fo nɛ fo wu ma kuwɔr n sɔ ma, n nyɛnpe.”

⁹ Nɛ Isɔɔ kaŋɛ: “Bumo nɛ ma alɛ gba kɔ shi ga, amoso baa kɔ feya.”

¹⁰ Nɛ Jeekɔb kaŋɛ mo: “Ayai, nɛ ma asheŋ baŋ bɔlɔ fo kenishi bre, kumo ere fo sɔ le be kakɛ nɛ mee sa fo ere, ŋkpal manɛ so, ŋ kaŋ baŋ wu fo anishito ere gba baa du nna fanɛ ŋ ka wu Ebɔrɛ be anishito na, fɔŋfɔŋ kananɛ fo sɔ ma nɛ enɔ anyɔ ere so.

¹¹ Amoso, jande sɔ kakɛ nɛ n ta n shuŋi a sa fo ere, ŋkpal manɛ so, Ebɔrɛ wu ma kuwɔr ga n sa ma kusɔ kama nɛ k daga ma.” Ŋkpal Jeekɔb ka mata Isɔɔ so ga so nɛ e sɔ kakɛ na.

¹² Kumo be kaman nɛ Isɔɔ kaŋɛ mo: “Shin nɛ n shuŋi fo n yɔ a!”

¹³ Nɛ Jeekɔb kaŋɛ mo: “N nyɛnpe, fo nyi mbia ka maŋ kɔ eleŋ nɛ kumo alɛ naŋ daga fanɛ ŋ keni mbolpɔ cheso nɛ ana nɛ b kɔ bibi na so. B kpa bumo eleŋso kachɛ koŋwule n yɔ, asɔbɔya na kikɛ beeŋ wu.

¹⁴ Amoso n nyɛnpe, juŋkpar ma a yɔ, nɛ ma alɛ e bɛ asɔbɔya na nɛ mbia na so a ba gbrɛgbrɛbi, hale nɛ an ba fo fo kutɔ ashi Edɔm be efuli so.”

¹⁵ Nɛ Isɔɔ kaŋɛ: “Kumo ere shin nɛ n yige ma basa ere be beko fo kutɔ.” Nɛ Jeekɔb bishi mo: “Manɛ nna nɛ fee sha nɛ fo wora loŋ, n nyɛnpe? Kananɛ fo sɔ ma ere gba kukwe.”

¹⁶ Ŋkpal loŋ so Isɔɔ daŋ naŋ bɛta nna n yɔ mo pe ashi Edɔm be efuli so kumo be kachɛ na kikɛ.

¹⁷ Ama Jeekɔb bre daŋ yɔ Sukɔf nna n ya pɔr kaboŋ ndoŋ n chena nseŋ yuu kuluu n sa mbe asɔbɔya malɛ. Sukɔf be kefito e la abuu to.

¹⁸ Jeekɔb ka shi Mɛsopoteemia be efuli so m ba nɛ alenfia nɛ ya chena m mata kadegboŋ nɛ baa tre Shɛkɛm nɛ k wɔ Keenan be kasawule so na.

¹⁹ Gbiti be ndarbi kalfa nɛ Jeekɔb daŋ ta n tɔ kasawule nɛ e chena so na ashi Hamar be mbia kutɔ. Hamar ere e daa la Shɛkɛm mo tuto na.

²⁰ Ndoŋ nɛ e pɔr bɔrɛsure m bunyaŋ Israɛl be Ebɔrɛ na nseŋ nase kumo Ɛl Elohi Israɛl.