Jɛnesis 30 - EBƆRƐ BE KAWƆL

¹ Jemanɛ ere so kikɛ nɛ Reechel bre maŋ naŋ nya mbia n sa Jeekɔb, amoso e daa kɔ mo da Lia kukɔrkɔ nna nseŋ kaŋɛ Jeekɔb le: “Sa ma alɛ gba mbia, nɛ mannɛ aloŋ, meeŋ wu.”

² Ndoŋ nna nɛ Jeekɔb nya agbo n wora Reechel nseŋ bishi mo: “N la Ebɔrɛ nna a? Mo nawule e naŋ teŋ shin nɛ fo kurge, mannɛ ma.”

³ Nɛ Reechel kaŋɛ mo: “Ma kebita Bilha e wɔtɔ na. To, ta mo n di nɛ e kurge mbia n sa ma, saŋɛ na so ma alɛ beeŋ bɔla mo so ŋ ki ebinio.”

⁴ Kamalga ere be kaman nɛ Reechel ta mbe kebita Bilha n sa mo kul Jeekɔb fanɛ e ta mo ŋ ki mbe eche.

⁵ Nɛ Bilha di kedampo ŋ kurge ebinyɛn n sa Jeekɔb.

⁶ Ndoŋ nna nɛ Reechel kaŋɛ: “Naniere bre, Ebɔrɛ ji n chɛ ma to n nu ma kabɔrɛkule nseŋ sa ma ebinyɛn.” Amoso ketre nɛ e daŋ sa mo e daa la Dan.

⁷ Dan be kaman nɛ Reechel be kebita Bilha naŋ di kedampo ŋ kurge ebinyɛn nyɔsopo n sa Jeekɔb.

⁸ Nɛ Reechel naŋ kaŋɛ: “Ma nɛ n da Lia gberge abar to n chɛr ga, ama naniere bre m pɔɔ mo so.” Amoso ketre nɛ e daŋ sa kebia na e daa la Naftali.

⁹ Lia malɛ ka wu fanɛ e maŋ naa kurge nɛ mo alɛ gba ta mbe kebita Zilpa n sa mo kul fanɛ e ta mo ŋ ki mbe eche.

¹⁰ Ndoŋ nna nɛ Lia be kebita Zilpa gba di kedampo ŋ kurge ebinyɛn n sa Jeekɔb.

¹¹ Nɛ Lia kaŋɛ: “Kumulela nde pasaa!” Amoso ketre nɛ e daŋ sa kebia na e daa la Gad.

¹² Gad be kaman nɛ Lia be kebita Zilpa naŋ di kedampo ŋ kurge ebinyɛn nyɔsopo n sa Jeekɔb.

¹³ Nɛ Lia kaŋɛ: “Ma kagbene fuli ma paa. Kede to bre, nfe be beche kikɛ beeŋ fara a tre ma kagbenefuliwura.” Amoso ketre nɛ e sa kebia na e la Ashɛr.

¹⁴ Kachako kasɔteŋi be jemanɛ so nɛ Ruben yɔ kupuŋ to n ya wu asɔ duuso ko nɛ baa tre amo mandreek na nɛ e tia amo m ba sa mo nio Lia. Ndoŋ nna nɛ Reechel kaŋɛ Lia: “Jande, sa ma fo pibi be mandreek ere be ako.”

¹⁵ Nɛ Lia bishi Reechel le: “Ama fo ka suge ŋ kul ŋ ka ma ere bre maŋ kukwe fo a? Nɛ fo naa sha kesɔ ma kebia be emandreek gba n ti so a?” Nɛ Reechel kaŋɛ mo: “To, kumo ere sa ma fo pibinyɛn be emandreek ere be ako nɛ n shin nɛ fo nɛ mo e di kanyɛ ere.”

¹⁶ Kamɔnchɛ be kaaseso Jeekɔb ka shi ndɔ to m ba nɛ Lia ya kaŋɛ mo le: “Kanyɛ ere ma nɛ fo e wɔ kedi ŋkpal manɛ so, n ta ma kebia be emandreek nna n chɛr kedi ashi fo eche kutɔ.” Amoso Lia nɛ Jeekɔb e daŋ di kumo be kanyɛ na.

¹⁷ Kedi na be kaman nɛ Ebɔrɛ nu Lia be kekule n naŋ shin nɛ e di kedampo ŋ kurge ebinyɛn nusopo n sa Jeekɔb.

¹⁸ Lia ka kurge nɛ kaŋɛ: “Ebɔrɛ ka ma kukɔ ŋkpal ŋ ka ta ma kebita n sa ŋ kul so.” Amoso ketre nɛ e daŋ sa kebia na e daa la Isakar.

¹⁹ Isakar be kaman nɛ Lia naŋ di kedampo ŋ kurge ebinyɛn shesopo n sa Jeekɔb.

²⁰ Kede to nɛ Lia kaŋɛ: “Kashenteŋto, Ebɔrɛ kɛ ma kakɛ lela, amoso m baa nyi fanɛ kede to ŋ kul beeŋ bunyaŋ ma ŋkpal ŋ ka kurge bibinyɛn ashe n sa mo so.” Amoso ketre nɛ e daŋ sa kebia na e daa la Zɛbyulɔn.

²¹ Zɛbyulɔn be kaman nɛ Lia kurge ebiche n nase mo Daina.

²² B wɔtɔ loŋ nɛ Ebɔrɛ ba nyiŋi Reechel n nu mbe kekule nseŋ bugi mbe kakurgesha

²³ nɛ e di kedampo ŋ kurge ebinyɛn nseŋ kaŋɛ: “Naniere bre, Ebɔrɛ lara ma anishinyɔr to.”

²⁴ Amoso ketre nɛ e daŋ sa kebia na e daa la Josɛf, ŋkpal manɛ so, le nɛ e daŋ kaŋɛ: “Ebɔrɛ naaŋ sa ma ebinyɛn ko n ti so.”

Jeekɔb nɛ Leeban be asɔbɔya be asheŋ

²⁵ Reechel ka kurge Josɛf na be kaman nɛ Jeekɔb kaŋɛ Leeban: “Sa ma ekpa nɛ m bɛta n yɔ ma efuli so.

²⁶ Ta ma, ma beche nɛ mbia nɛ n shuŋ fo n nya na n sa ma nɛ n ta a yɔ. Fo alɛ gba nyi kushuŋ mo nɛ n shuŋ n sa fo.”

²⁷ Nɛ Leeban kaŋɛ mo: “Jande, nɛ ma asheŋ bɔlɔ fo kenishi bre, fo baa kraa wɔtɔ, ŋkpal manɛ so, n wu fanɛ fo so nɛ Enyɛnpe na bee nɛfa ma.

²⁸ Fee sha, fo kaŋɛ ma kananɛ feeŋ sɔ ma nɛ ŋ ka fo.”

²⁹ Nɛ Jeekɔb kaŋɛ mo: “Fo gbagba baa nyi kananɛ n shuŋ n sa fo. Fo alɛ nseŋ naa nyi kananɛ fo asɔbɔya salga ashi ma enɔ to.

³⁰ Asɔbɔya gbrɛbi nɛ fo daa kɔ pɔɛŋ nɛ m ba, ama naniere b salga n sɔ kakpa, nɛ Enyɛnpe na bɔla ma so n nɛfa fo ekpa kama so. To saŋɛ mo nɛ ma alɛ beeŋ wora kusɔ ko n sa ŋ gbagba be laŋ to ebi?”

³¹ Ndoŋ nna nɛ Leeban bishi mo: “To, nɛ manɛ nɛ meeŋ ta ŋ ka fo kukɔ?” Nɛ Jeekɔb kaŋɛ mo: “Sa maŋ ka ma shɛŋ. Nɛ feeŋ shuli n wora kusɔ nɛ meeŋ kaŋɛ fo ere bre, meeŋ baa kraa keni fo asɔbɔya na so.

³² Shin nɛ n luri fo asɔbɔya to kabre n lara mbolpɔ muchɛr muchɛr ŋko bechɛchɛrɛ na kikɛ nɛ bumo be befɔlbi nɛ b biri na kikɛ nɛ mboe chɛchɛrɛ ŋko bemuchɛr muchɛr na kikɛ ŋ ki ma kakɔka.

³³ Nɛ fo shin nɛ n wora loŋ, kumo ere echefoso feeŋ tiŋ m pin fanɛ mee ji kashenteŋ ŋko m maa ji kashenteŋ. Saŋɛ na so saŋkikɛ nɛ fee sha kekeni ma kakɔka be asheŋ to nseŋ wu kaboe kama nɛ e maŋ du muchɛr muchɛr ŋko chɛchɛrɛ ŋko kubolpɔbi kama nɛ e maŋ biri, kumo ere feeŋ tiŋ ŋ kaŋɛ fanɛ n yuri kumo nna.”

³⁴ Ndoŋ nna nɛ Leeban kaŋɛ: “To, n shuli loŋ. An ta kumo n yili kananɛ fo kaŋɛ na.”

³⁵ Ama kumo be kamɔnchɛ kikɛ Leeban ya lara mboe nyɛnsoana nɛ b daa du muchɛr muchɛr ŋko chɛchɛrɛ na kikɛ nɛ mboe chesoana nɛ b daa du muchɛr muchɛr ŋko chɛchɛrɛ na nɛ mbolpɔfɔlbi lembirana na kikɛ n ta bumo n sa mbe mbia fanɛ b baa keni so.

³⁶ Kumo be kaman nɛ e shin nɛ b ta loŋ be asɔbɔya na m barga Jeekɔb n nite nchɛ asa n ya chena, saŋɛ na so Jeekɔb malɛ beeŋ baa keni asɔbɔya nɛ b ka na so.

³⁷ Kede be kaman nɛ Jeekɔb ku kedibi ko nɛ baa tre pɔpla na nɛ kedibi nɛ baa tre amand na be ayabi nɛ kedibi nɛ baa tre pleen na be ayabi nseŋ marga m marga amo be afɔfɔ na be ako nɛ a fuli n weato.

³⁸ Kumo be kaman nɛ e ta loŋ be ayabi na n nase asɔbɔyaana na be asɔnuunchu akpa, saŋɛ na so asɔbɔya na ya kaa nuu nchu nsaa dii abar baaŋ baa wu ndibi weato na.

³⁹ Ŋkpal asɔbɔya na ka bee wu ndibi weatoana na nsaa dii na so nɛ b fara a kurge bibi weato nɛ bemuchɛr muchɛr nɛ bechɛchɛrɛ nɛ bumo nɛ b chaŋɛ eyur so fanɛ chakplaŋ.

⁴⁰ Ade be kaman nɛ Jeekɔb barga asɔbɔya fɔlbiana na ashi begboŋi na to nseŋ shin nɛ begboŋi na bee keni Leeban be asɔbɔya weatoana na nɛ belembirana na be kaba so. Loŋ nɛ e daŋ wora n nya mo gbagba be asɔbɔya nseŋ barga bumo ashi Leeban peya to.

⁴¹ Saŋkama nɛ asɔbɔya cheso lempoana na ya kaa dii, Jeekɔb daa ta ndibi chɛchɛrɛ na nna n yuu n yuu asɔbɔyaana na be anishito ashi bumo be asɔ nuunchu akpaana na, saŋɛ na so baaŋ baa dii abar amo ase.

⁴² Ama asɔbɔya kama nɛ b daa maŋ kɔ eleŋ na bre baa dii e daa maa wora loŋ. Amoso asɔbɔya pɔsoana na e ki Leeban peya nɛ belempoana na malɛ ki Jeekɔb peya.

⁴³ Ŋkpal loŋ so Jeekɔb daŋ ba ki damawura gboŋgboŋi nna a kɔ asɔbɔya damta nɛ nyɛrbi nɛ mbita nɛ enyɔma nɛ ekurma ga.