Jɛnesis 28 - EBƆRƐ BE KAWƆL

¹ Ndoŋ nna nɛ Aizek tre Jeekɔb n nɛfa mo nseŋ fiɛ mo so ŋ kaŋɛ: “Sa maŋ kaŋ ta Keenan be efuli so nfe be eche kikɛ.

² Kusɔ nɛ k daga fanɛ fo wora e la fanɛ fo yɔ fo nananyɛn Bɛtuwɛl pe ashi Mɛsopoteemia epul ere to n ya fin fo wɔpa Leeban be mbichebiana na be eko n ta ŋ ki fo eche.

³ Ebɔrɛ Enyɛnpetale na e nɛfa fo nseŋ sa fo mbia be kanya nɛ fo ba ki basa damta bumo tuto.

⁴ Ebɔrɛ koŋwule na e sa fo nɛ fo kaman to ebi nɛfa mo nɛ e daŋ sa Eebraham na saŋɛ na so kasawule mo nɛ fo wɔ kumo so fanɛ efɔ naniere ere beeŋ ki feya. Kumo e la kasawule nɛ Ebɔrɛ ta n sa Eebraham na.”

⁵ Aizek be kamalga na be kaman nɛ Jeekɔb pɛ Mɛsopoteemia be efuli so be ekpa nɛ e yɔ Bɛtuwɛl nɛ e la Mɛsopoteemia be esa na pibinyɛn Leeban kutɔ. Leeban daa la Jeekɔb nɛ Isɔɔ bumo wɔpa nna.

Isɔɔ ka naŋ ta eche ko be asheŋ

⁶ Isɔɔ daŋ ba nu fanɛ mo tuto daŋ nɛfa Jeekɔb nna nseŋ fiɛ mo so ŋ kaŋɛ mo fanɛ e sa maŋ kaŋ ta Keenanche kikɛ, nseŋ shin nɛ e yɔ Mɛsopoteemia nɛ e ya ta eche ndoŋ.

⁷ Mo alɛ daŋ naŋ nu fanɛ Jeekɔb daŋ wora mo tuto nɛ mo nio kasonu nna nseŋ yɔ Mɛsopoteemia.

⁸ Loŋ be asheŋ na kikɛ e daŋ shin nɛ Isɔɔ pin mo tuto Aizek ka daa maa sha Keenancheana na be keta be asheŋ.

⁹ Nɛ e kpal loŋ so n yɔ Eebraham pibinyɛn Ishmaɛl pe n ya ta mo pibiche Mahalat nɛ e daa la Nabaiɔt mo sipoche na n ti mbe beche so.

Jeekɔb ka daŋ ku edare ashi Bɛtɛl be asheŋ

¹⁰ Jeekɔb daŋ lar Bɛshiba nna m pɛ Haran be ekpa.

¹¹ E nite loŋ m ba fo kakpa ko nɛ epeŋi tɔr mo nɛ e ta kejembu ko ndoŋ n nase ŋ ŋele kumo a dese a di.

¹² Edi na to nɛ e ku edare n wu kasakpar ka yili kasawule n ya fo ebɔrɛso nɛ Ebɔrɛ be emalaika wɔtɔ a dii kumo a gbelge.

¹³ E daŋ wu fanɛ Enyɛnpe na e daa yil kumo be kumu so gbagba na. Ndoŋ nɛ Enyɛnpe na daa yil nseŋ kaŋɛ mo le: “Ma e la Enyɛnpetale, fo nananyɛn Eebraham be Ebɔrɛ nɛ Aizek be Ebɔrɛ na. Meeŋ ta kasawule mo nɛ fo dese so ere n sa fo nɛ fo kaman to ebi.

¹⁴ Fo kaman to ebi beeŋ ba kaa shi fanɛ kasawule so be shishɛr nseŋ sɔ durnya be abonfu ana ere kikɛ so nɛ m bɔla fo nɛ fo kanaŋ to ebi so n nɛfa durnya ere be efuli kama so ebi.

¹⁵ Amoso kaplɛkama nɛ fo yɔ, meeŋ baa wɔ fo kutɔ a keni fo so nseŋ bɛta fo m ba kasawule ere so. M maaŋ yige fo kikɛ ama m baŋ wora kusɔ nɛ n nase kɔnɔ fanɛ meeŋ wora ere nna.”

¹⁶ Jeekɔb ka tiŋi mbe edi na to nɛ e fɛ mbe kumu to le: “Kajaa, Enyɛnpe Ebɔrɛ na wɔ kaboŋ ere nna nɛ n daa maŋ nyi!”

¹⁷ Ndoŋ nna nɛ kufu pɛ mo nɛ e kaŋɛ: “Cha, daŋga be kakpa e la kaboŋ ere pasaa! K baŋ fuli nna fanɛ kaboŋ ere la Enyɛnpe na pe nna. Kumo alɛ nseŋ naa la kakpa nɛ kabuna mo nɛ k bee bugi a yɔ ebɔrɛso na gba wɔ!”

¹⁸ Kare ka chɛ chipurdidi nɛ Jeekɔb ta kejembu nɛ e daŋ ŋele na n yuu fanɛ kanyiŋi be kejembu na nseŋ duga ŋku n wurge kumo be kumu so.

¹⁹ Kumo be kaman nɛ e nase kakpa na ketre Bɛtɛl. Kade nɛ k daa wɔ ndoŋ na nɛ b daa tre Luz pɔɛŋ nɛ e nase kumo Bɛtɛl na.

²⁰ Asheŋ ere be kaman nɛ Jeekɔb nase kɔnɔ ŋ kaŋɛ le: “Nɛ Ebɔrɛ beeŋ baa wɔ ma kutɔ nsaa keni ma so ashi ma enite ere to nsaa sa ma ajibi nɛ asɔbuuso loŋ

²¹ nɛ n ya bɛta n yɔ n tuto pe nɛ eyur be alenfia, kumo ere Enyɛnpe na e naaŋ baa la ma Ebɔrɛ.

²² Amoso nɛ n yuu kejembu ere n dulgi ndoŋ nɛ k baa la fo Ebɔrɛ pe na. Kusɔ kama malɛ nɛ fo sa ma, meeŋ lara kumo be kudusopo n sa fo.”