Jɛnesis 27 - EBƆRƐ BE KAWƆL

Aizek ka nɛfa Jeekɔb be asheŋ

¹ Aizek ka bel nsaa maŋ naa wu nɛnɛ nɛ e tre mo pibinyɛn nimuso Isɔɔ kachako ŋ kaŋɛ mo: “M pibi.” Nɛ Isɔɔ shuli ŋ kaŋɛ: “Ma nde.”

² Nɛ Aizek kaŋɛ mo: “To, naniere ŋ ki enyɛn nimu nna na a maŋ nyi kachɛ nɛ meeŋ wu.

³ Amoso koso n ta fo akpansɔ, fo keta nɛ kumo be atanyembi n yɔ kupuŋ to n ya mɔ eblaŋ ko m bar ma.

⁴ Fo kaŋ bar loŋ be eblaŋ na fo ta kumo n daŋɛ ajibi belbelso mo nɛ mee sha ga na m ba sa ma nɛ n ji n nɛfa fo pɔɛŋ nseŋ wu.”

⁵ Aizek ka daa malga asheŋ ere kikɛ a sa mo pibinyɛn na nɛ Isɔɔ mo nio Rebɛka yil nseŋ nu amo kikɛ nyam. Isɔɔ ka baŋ ta n choŋ kupuŋ to

^6-7 nɛ Rebɛka kaŋɛ mo pibinyɛn Jeekɔb le: “Keni, n nu fo tuto ka bee kaŋɛ fo da Isɔɔ fanɛ e ya mɔ eblaŋ ko m ba wora ajibi belbelso ko n sa mo nɛ e ji nseŋ nɛfa mo Enyɛnpe na be anishito pɔɛŋ nseŋ wu.

⁸ Amoso, m pibi, bugi asoe n nu nfe nseŋ ya wora kusɔ nɛ mee shin nɛ ŋ kaŋɛ fo ere:

⁹ Lar ketaman n yɔ asɔbɔya na to n ya pɛ mboefɔlbi lelabi anyɔ m bar ma nɛ n wora ajibi belbelso nɛ fo tuto bee sha ga na,

¹⁰ ŋseŋ ta amo n ya sa mo nɛ e ji n nɛfa fo pɔɛŋ nseŋ wu.”

¹¹ Ndoŋ nna nɛ Jeekɔb bishi mo nio Rebɛka le: “Nɛ n da Isɔɔ be eyur so kikɛ ka kɔ afuibi nɛ ma alɛ peya maŋ kɔ ere a?

¹² Nɛ ŋ kaŋ wora loŋ nɛ n tuto beta ma a? Nɛ k ba loŋ k beeŋ wora fanɛ mee fule mo nna nɛ nɛfa na e ki kɔnɔsho n sa ma.”

¹³ Nɛ mo nio kaŋɛ mo: “M pibi, shin nɛ loŋ be kɔnɔsho na e baa la meya. Fo ere e wora kusɔ nɛ mee kaŋɛ ere de. Ya pɛ kaboe na m bar ma.”

¹⁴ Ndoŋ nna nɛ Jeekɔb ya pɛ mboe na m ba sa mo nio nɛ e wora ajibi belbelso mo nɛ Jeekɔb mo tuto bee sha ga n yili

¹⁵ nseŋ ya ta mo pibinyɛn nimuso Isɔɔ be asɔbuuso lela ga nɛ a daa wɔ mo ere Rebɛka be ebu to na m ba buu mo pibinyɛn kekarkarso Jeekɔb.

¹⁶ Kumo be kaman nɛ e ta mboe na be nwɔl na m mɛa m mɛa Jeekɔb be enɔana nɛ mbe kubɔ be kakpa nɛ afuibi daa maŋ wɔtɔ na so.

¹⁷ E ka loge ade kikɛ na nɛ e ta ajibi belbelso na nɛ bodobodo nɛ e wora na n sa Jeekɔb.

¹⁸ Nɛ Jeekɔb ta ajibi na n yɔ mo tuto kutɔ n ya tre mo ŋ kaŋɛ: “N tuto.” Nɛ mo tuto shuli nseŋ bishi: “M pibi mo nna?”

¹⁹ Nɛ Jeekɔb kaŋɛ mo tuto le: “Ma, fo wurkoŋ Isɔɔ nna. N wora kusɔ nɛ fo yɛ n ya wora na nna. Amoso jande, niŋi to n chena n ji kusɔ nɛ n ya nya kekpaŋ to m ba ere pɔɛŋ nseŋ nɛfa ma.”

²⁰ Ndoŋ nna nɛ Aizek bishi mo: “Nuso nɛ fo wora n ya nya eblaŋ na m ba manaŋ loŋ?” Nɛ Jeekɔb kaŋɛ mo: “Enyɛnpe fo Ebɔrɛ na e chɛ ma to.”

²¹ Nɛ Aizek kaŋɛ mo: “Firgi n taga to nfe, m pibi nɛ m beta fo ŋ keni m pibi Isɔɔ gbagba e la fo ŋko mannɛ mo nna.”

²² Ndoŋ nna nɛ Jeekɔb yɔ mo tuto Aizek kutɔ nɛ e beta mo ŋ keni nseŋ kaŋɛ: “To, ebɔl ere la Jeekɔb be ebɔl nna, ama fo enɔana ere bre la Isɔɔ peya nna.”

²³ Aizek daa maŋ pin fanɛ Jeekɔb nna ŋkpal mbe enɔana ka daa kɔ afuibi fanɛ Isɔɔ peya na so so, amoso e daa shin nna nɛ e nɛfa mo.

²⁴ Ama pɔɛŋ nɛ e nɛfa mo na e daŋ bishi mo le nna: “Fo m pibi Isɔɔ gbagba nna ere a?” Nɛ Jeekɔb shuli ŋ kaŋɛ: “Mm, ma nna.”

²⁵ Kumo be kaman nɛ Aizek kaŋɛ mo: “Kumo ere m pibi, ta kusɔ nɛ fo ya nya ashi fo kekpaŋ to m ba daŋɛ na m bar ma nɛ n ji nseŋ nɛfa fo.” Ndoŋ nna nɛ Jeekɔb ta ajibi na n sa mo nɛ e ji. Kumo be kaman nɛ e sa mo yabra belbelso nɛ e nuu.

²⁶ Ade kikɛ be kaman nɛ mo tuto Aizek kaŋɛ mo le: “M pibi ba nfe nɛ n lala fo so.”

²⁷ Ndoŋ nna nɛ Jeekɔb yɔ nɛ mo tuto e lala mo so. Aizek ka nu mbe asɔbuuso na be efɛa nɛ e nɛfa mo nseŋ kaŋɛ le: “Cha, ma kebia ere be efɛa baa du fanɛ kasawule mo nɛ Enyɛnpe nɛfa nna.

²⁸ Ebɔrɛ e shin nɛ bunyaŋ e shi ebɔrɛso m ba sa fo nsawule kayul nseŋ shin nɛ fo kasawule e baa walɛ a wora ajibi damta. Kumo e la fanɛ adɔjibi kama nɛ a shi ayu be yiri to be adamta n ta yabra belbelso n ti so.

²⁹ Ebɔrɛ e shin nɛ efuli pɔtɛana be basa e ba kaa bunyaŋ fo nɛ basa be nnanto e baa gbir fo kumuli. Baa la fo sipoana kikɛ be ewura n shin nɛ fo nio be bibinyɛn kikɛ e ba kaa gbir fo kumuli. Ebɔrɛ e shin nɛ bekama nɛ baaŋ sho fo kɔnɔ e nya kɔnɔsho nɛ bekama malɛ nɛ b nɛfa fo e nya nɛfa.”

³⁰ Aizek ka baŋ nɛfa Jeekɔb n loge nɛ e baa lar mo kutɔ nɛ mo da Isɔɔ malɛ shi mbe kekpaŋ na to m ba kaa luri.

³¹ Ndoŋ nna nɛ Isɔɔ gba ya wora ajibi m bar mo tuto m ba kaŋɛ le: “N tuto, niŋi to n chena n ji kusɔ nɛ n ya nya kekpaŋ to m ba ere pɔɛŋ nseŋ nɛfa ma.”

³² Ndoŋ nna nɛ mo tuto Aizek bishi mo: “Fo wanɛ nna?” Nɛ Isɔɔ kaŋɛ mo: “Ma, fo wurkoŋ nna.”

³³ Nɛ Aizek be eyur kikɛ chicha mo nɛ e bishi: “To, nɛ wanɛ malɛ e ya ji kekpaŋ n daŋɛ m bar ma na? M baŋ ji kumo nna pɔɛŋ nɛ fo ba na. Ma alɛ teŋ nɛfa amodoŋwura. Kashenteŋto malɛ, m maaŋ naŋ tiŋ n laŋɛ nɛfa na.”

³⁴ Isɔɔ ka nu mo tuto be mmalga na nɛ e boŋ to awɔrso kagbenejijaso ŋ kaŋɛ: “Kumo ere fo nɛfa ma alɛ gba. N tuto, jande nɛfa ma alɛ gba!”

³⁵ Nɛ Aizek kaŋɛ mo: “Keni, fo sipo teŋ ba m ba fule ma n sɔ fo nɛfa na.”

³⁶ Nɛ Isɔɔ kaŋɛ mo tuto: “Mbe kela nyɔsopo nna na e ka puni ma. E daŋ kesɔ ma kekurge to be kenimu nseŋ naŋ sɔ ma nɛfa ere na. Alawude e ka bee ji Jeekɔb.” Kamalga ere be kaman nɛ Isɔɔ bishi mo tuto: “Ama fo maŋ yige nɛfa kaman yili ma a?”

³⁷ Nɛ Aizek kaŋɛ mo pibi Isɔɔ: “N teŋ ta mo ŋ ki fo nyɛnpe nseŋ ta mo niopibiana kikɛ ŋ ki mbe nyɛrbi. N ta ayu be yiri to be asɔ duuso kikɛ be kanya nɛ yabra belbelso kikɛ be kanya n sa mo. Amoso m pibi shɛŋ maŋ naa wɔtɔ nɛ meeŋ naŋ tiŋ n wora n sa fo.”

³⁸ Ndoŋ nna nɛ Isɔɔ bishi mo tuto: “N tuto nɛfa koŋwule nɛ fo kɔ a? Jande nɛfa ma alɛ gba.” Kumo be kaman nɛ e fara a shu awɔrso.

³⁹ Nɛ mo tuto Aizek kaŋɛ mo: “Bunyaŋ maaŋ shi ebɔrɛso m ba wushi fo kasawule; fo echenakpa nɛ kasawule lela malɛ beeŋ baa wɔ kufɔ.

⁴⁰ Fo tokobi so nɛ feeŋ baa bɔla a ji; fo alɛ beeŋ baa la fo sipo be kayɛrbi nna. Ama kachɛ nɛ fo ba diewu bre, feeŋ sɔ fo kumu ashi mbe enɔ to.”

Jeekɔb ka shile n yɔ Leeban kutɔ be asheŋ

⁴¹ Ndoŋ nna nɛ Isɔɔ fara a kishi Jeekɔb ŋkpal nɛfa nɛ mo tuto daŋ sa mo na so nseŋ fɛ mbe kumu to le: “K maaŋ naŋ chɛr nɛ n tuto e wu nɛ an shu mbe keeli. Keeli na be kaman meeŋ mɔ n sipo Jeekɔb.”

⁴² Rebɛka ka pin kesheŋ nɛ Isɔɔ kre na nɛ e shuŋi n tre mo pibinyɛn kekarkarso Jeekɔb ŋ kaŋɛ mo le: “Keni, fo da Isɔɔ bee kre kemɔ fo nna m bishi kuwule.

⁴³ Amoso, m pibi, nu nfe nseŋ wora kusɔ nɛ mee sha kekaŋɛ fo ere. Lar nfe manaŋ n shile n yɔ n siponyɛn Leeban kutɔ ashi Haran.

⁴⁴ Ya kaa wɔ mo kutɔ gbrɛ nɛ fo da be agbo e yɔɔ nɛ mbe kagbene e wushi

⁴⁵ nɛ e teŋ kusɔ nɛ fo wora mo ere so pɔɛŋ nɛ n shuŋi n tre fo. Ŋkpal manɛ so m maa sha fanɛ m paŋ menyi benyɔ kikɛ kachɛ koŋwule.”

⁴⁶ Rebɛka ka malga le ere be kaman nɛ e naŋ kaŋɛ Aizek le: “Ma ere, Hitebi to be mbichebi nɛ Isɔɔ ta ere be asheŋ baŋ lar ma ebɔl nna. Nɛ Jeekɔb malɛ naŋ ta Hitebi ere to be eche ko, kumo ere ŋ ka wu bɔ.”