Jɛnesis 2 - EBƆRƐ BE KAWƆL

¹ To, kananɛ Ebɔrɛ daŋ to esoso nɛ kasawule nɛ kusɔ kama, kebɛso kebɛso loŋ n ya loge nyam nna na.

² Kachɛ shunusopo na ka fo nɛ Ebɔrɛ loge mbe kushuŋ kikɛ, amoso kachɛ shunusopo na e wushi nna ashi ashuŋ nɛ e shuŋ na kikɛ nyam to.

³ Amoso Ebɔrɛ daŋ nɛfa kachɛ shunusopo na nna n yili fanɛ kachɛ cheembi, ŋkpal manɛ so, kumo be kachɛ na nɛ e wushi ashi mbe durnya be keto be ashuŋ to.

Kananɛ Ebɔrɛ to enyɛn nɛ eche be asheŋ

⁴ To, kananɛ Enyɛnpe Ebɔrɛ daŋ to esoso nɛ kasawule nna na. E ka daŋ to amo na,

⁵ kedibi kama nɛ keduuso jiso kama daa maŋ naŋ kɔr kasawule so. Enyɛnpe Ebɔrɛ malɛ daa maŋ naŋ shin nɛ bɔrɛ ba kasawule so. Dimɛdi kikɛ malɛ daa maŋ wɔtɔ a dɔ kasawule so.

⁶ Saŋɛ nɛ bɔrɛ daa maŋ naŋ ba na, nchu daa shi kasawule to nna a bul a wushi kasawule na kikɛ nyam.

⁷ Enyɛnpe Ebɔrɛ ka daa shin nɛ e to dimɛdi na, e daŋ ta shishɛr nna ashi kasawule so m pɔr enyɛn nseŋ fute ŋkpa be efute n wɔtɔ mbe kamuna to nɛ enyɛn na ki kusɔ futeso.

⁸ Enyɛnpe Ebɔrɛ ka pɔr enyɛn na n loge nɛ e wora ndibi sɔrso nɛ aduuso be yiri yiri be kudɔbi ko nɛ k wɔ kakpa lela ko nɛ baa tre Iden na ashi epeŋipetekpa be kaba so nseŋ ta enyɛn na n wɔtɔ ndoŋ.

⁹ Enyɛnpe Ebɔrɛ daŋ shin nna nɛ ndibi lela be yiri yiri kɔr n daŋ ashi ndoŋ. Ndibi na nɛ amo be asɔrso malɛ daa walɛ keji nna. Ama ndibi anyɔ ko malɛ daa yil kudɔbi na be nferinto. Loŋ be ndibi na be kuko be asɔrso daa sa ŋkpa nna nɛ kuko malɛ peya daa sa kanyiasheŋ nɛ k bee shin nɛ esa bee pin kelela nɛ kulubi.

¹⁰ Eboŋ ko daa wɔ Iden be kudɔbi na to nna a sa kumo kayul. K daa shile kudɔbi na to nna n ya bɔl m barga to ayabi ana ŋ ki eboŋ ana.

¹¹ Loŋ be eboŋ ana na be kumo nɛ k juŋkpar be ketre e daa la Pishon. K daa shile nna a kulti Havila be efuli.

¹² Ndoŋ nɛ shuwa lela nɛ a walɛ ga na nɛ kemar ko nɛ a bee dufɛ viim nɛ baa tre amo bedɛliam na nɛ yawu kpakpaso be ajembu lela ko nɛ baa tre ɔniks na kikɛ daa wɔ.

¹³ Eboŋ nyɔsopo na be ketre e daa la Gihɔn. K daa shile nna a kulti Kush be efuli.

¹⁴ Eboŋ sasopo na be ketre e daa la Tigris. K daa wɔ Asiriya be efuli so be epeŋipetekpa be kaba so nna. Eboŋ nasopo na malɛ be ketre e daa la Yufreetes.

¹⁵ To, Enyɛnpe Ebɔrɛ daŋ ta enyɛn na nna n wɔtɔ kudɔbi nɛ baa tre Iden na to fanɛ e baa dɔ ndoŋ nsaa keni kumo so.

¹⁶ Enyɛnpe Ebɔrɛ ka ta mo n wɔtɔ ndoŋ nna nɛ e fiɛ mo so ŋ kaŋɛ mo le: “N sa fo ekpa fanɛ fo baa ji kakpa ere be kedibi kama be asɔrso,

¹⁷ ama sa maŋ kaŋ ji kedibi nɛ k bee sa kelela nɛ kulubi be kanyiasheŋ na bre be asɔrso, ŋkpal manɛ so, kachɛ kama so nɛ fo baŋ ji loŋ be kedibi na be asɔrso, shɛŋ maaŋ mɔlga fo ashi luwu to. Abaanaaworasheŋ feeŋ wu.”

¹⁸ Kede be kaman nɛ Enyɛnpe Ebɔrɛ kaŋɛ: “K maŋ daga fanɛ enyɛn na nawule e baa wɔtɔ. Meeŋ pɔr echɛtopo nɛ e beeŋ kukwe mo n sa mo.”

¹⁹ Kasawule be shishɛr nɛ Enyɛnpe Ebɔrɛ daŋ ta m pɔr asɔbɔya kikɛ nɛ mbuibi kikɛ nseŋ ta bumo kikɛ m ba sa enyɛn na ŋ keni atre nɛ e beeŋ sa bumo. Ketre kama malɛ nɛ enyɛn na daŋ sa asɔ futeso na be kekama, loŋ be ketre na e ki kumo be ketre.

²⁰ Ndoŋ nna nɛ enyɛn na sa n sa asɔyigeso kikɛ nɛ mbuibi kikɛ nɛ kupuŋ to be asɔbɔya kikɛ amo be atre. Ama echɛtopo nɛ e daa beeŋ kukwe mo ere kanyɛn na bre gbagba, daa maŋ wɔ asɔ na to.

²¹ Amoso Enyɛnpe Ebɔrɛ daŋ shin nna nɛ edigboŋ ko pɛ enyɛn na nɛ e di n chul nɛ Ebɔrɛ lara mbe kekentibi ko nseŋ shin nɛ ndoŋ chɛ n ti.

²² Kumo be kaman nɛ Enyɛnpe Ebɔrɛ ta kekentibi nɛ e lara enyɛn na to na n wora eche nseŋ ta mo m ba sa enyɛn na.

²³ Ndoŋ nna nɛ enyɛn na kaŋɛ: “Too, naniere bre esa nɛ mbe awibi shi ma awibi to nɛ mbe eyur malɛ gba shi ma eyur to nde. Baaŋ baa tre mo eche, ŋkpal manɛ so, ma to nɛ e shi.”

²⁴ Amoso nɛ enyɛn baŋ ta eche, a daga fanɛ e yige mo tuto nɛ mo nio nseŋ ya far n chɛ mbe eche nɛ b ki eyur koŋwule.

²⁵ Enyɛn na nɛ mbe eche kikɛ daŋ baa wɔtɔ kayurkpaŋ nna, ama anishinyɔr malɛ daa maŋ kɔ bumo.