Jɛnesis 17 - EBƆRƐ BE KAWƆL

Kɔnɔkoŋwule be ŋkre be katutuku

¹ Eebram be nfɛ adekpanu nɛ akpanu be saŋɛ nɛ Enyɛnpe lar mo so ŋ kaŋɛ mo le: “Ma e la Enyɛnpetale na. Wora ma kasonu a bɛ ma ekpaana so nsaa la esa nɛ e maŋ kɔ amoso basa be anishito.

² Saŋɛ na so ma nɛ fo be kɔnɔkoŋwule be ŋkre fanɛ meeŋ shin nɛ fo kanaŋ to ebi e wora keshi ga na, beeŋ bɔlɔ so.”

³ Ndoŋ nna nɛ Eebram gbir ŋ kurgi kumu n yuu. E ka wora loŋ na nɛ Ebɔrɛ kaŋɛ le:

⁴ “Ma kɔnɔkoŋwule be ŋkre nɛ k wɔ ma nɛ fo be kefɛato e la fanɛ, feeŋ ki efuli damtaana be basa bumo tuto.

⁵ Fo ketre malɛ maŋ naa la Eebram. K beeŋ ki Eebraham, ŋkpal manɛ so, n ta fo ŋ ki efuli damtaana be basa bumo tuto nna.

⁶ Meeŋ shin nɛ fo mbia e wora keshi nɛ efuli damtaana nɛ bewuraana e shi bumo to n lar.

⁷ Meeŋ nase ma kɔnɔkoŋwule be ŋkre n sa fo nɛ fo kaman to ebi nɛ bumo alɛ be kaman to ebi mbaanaayɔ. Meeŋ baa la fo nɛ fo kaman to ebi kikɛ be Ebɔrɛ.

⁸ Ade kikɛ be kaman, meeŋ ta Keenan be kasawule mo nɛ men la befɔ ashi kumo so naniere ere n sa fo nɛ k ki fo nɛ fo kaman to ebi be kapetɛ mbaanaayɔ nɛ ma alɛ e baa la bumo be Ebɔrɛ.”

⁹ Kumo be kaman nɛ Ebɔrɛ naŋ kaŋɛ Eebraham le: “A daga fanɛ fo ere nɛ fo kaman to ebi nɛ bumo alɛ be kaman to ebi kikɛ ka bɛ ma nɛ fo be kɔnɔkoŋwule be ŋkre ere so.

¹⁰ K daga fanɛ fo nɛ fo echefoso be kaman to ebi kikɛ e baa ku menyi to be benyɛn kikɛ atutu.

¹¹ Men be katutuku na e naaŋ ki kɔnɔkoŋwule be ŋkre na be tɔɔnɛ a wɔ ma nɛ menyi be kefɛato.

¹² K daga fanɛ menyi to be ebinyɛn kama nɛ e ji nchɛmburwa ka ku kututu. Enyɛn kikɛ nɛ e shi menyi be kanaŋ to daga e ka ku kututu.

¹³ Ekama nɛ b kurge ashi menyi pe nɛ emo nɛ men ta menyi be amansherbi n tɔ efɔ kikɛ kutɔ gba daga fanɛ b ku mo kututu. Saŋɛ na so ma kɔnɔkoŋwule be ŋkre na be tɔɔnɛ beeŋ baa wɔ menyi be eyur so mbaanaayɔ.

¹⁴ Amoso enyɛn kama nɛ e maŋ ku kututu daga b ka lara mo ashi ma basa to, ŋkpal manɛ so, e maŋ bɛ ma kɔnɔkoŋwule be ŋkre be kɔnɔ naseso na so nna na.”

¹⁵ Kede be kaman nɛ Ebɔrɛ naŋ kaŋɛ Eebraham le: “Sa maŋ kaŋ naa tre fo eche Sɛɛrai kikɛ. Yili kabre a yɔ mbe ketre beeŋ baa la Sɛɛra.

¹⁶ Meeŋ nɛfa mo nseŋ shin nɛ e kurge ebinyɛn n sa fo. Meeŋ nɛfa mo n shin nɛ mbe mbia e ki efuli damta be bewura.”

¹⁷ Ndoŋ nna nɛ Eebraham gbir ŋ kurgi kumu n yuu nseŋ fara a mushe a fɛ le: “Enyɛn beeŋ tiŋ n fo nfɛ kalfa nseŋ naŋ tiŋ n nya mbia a? Sɛɛra malɛ beeŋ naŋ tiŋ ŋ kurge kebia saŋɛ nɛ e fo nfɛ adekpanu ere a?”

¹⁸ Le be nfɛra ere be kaman nɛ e kaŋɛ Ebɔrɛ le: “Manɛ nna nɛ fo maaŋ nɛfa Ishmaɛl nseŋ ta asɔ nɛ fo nase kɔnɔ fanɛ feeŋ sa ma na n sa mo.”

¹⁹ Nɛ Ebɔrɛ kaŋɛ: “Ayai, loŋ maaŋ wora, fo eche Sɛɛra e naaŋ kurge ebinyɛn n sa fo nɛ fo nase mo ketre Aizek. Meeŋ shin nɛ ma kɔnɔkoŋwule be ŋkre na e baa wɔ mo ere nɛ mbe kaman to ebi so mbaanaayɔ.

²⁰ N nu kusɔ nɛ fo kule a yɔ Ishmaɛl be kaplɛa so na, amoso meeŋ nɛfa mo alɛ gba nseŋ sa mo mbia damta nɛ kaman to ebi damta. Ade kikɛ be kaman e beeŋ ki bewurbi kuduanyɔ bumo tuto nɛ n shin nɛ mbe efuli e ki efuli lempo gboŋgboŋi.

²¹ Ama meeŋ shin nɛ ma kɔnɔkoŋwule be ŋkre na bre e baa wɔ fo pibinyɛn Aizek nɛ Sɛɛra beeŋ kurge kafɛ a ba saŋɛ ere so na so.”

²² Ebɔrɛ ka malga Eebraham kutɔ n loge nɛ e yɔ ŋ ka mo.

²³ Kumo be kachɛ na malɛ gbagba nɛ Eebraham wora kasonu n sa Ebɔrɛ nseŋ ku mo pibinyɛn Ishmaɛl nɛ benyɛn kama nɛ b kurge mbe laŋ to na kikɛ atutu n ta anya nɛ b daŋ kurge ashi mbe laŋ to nɛ bumo nɛ e tɔ n ti so.

²⁴ Eebraham gba daŋ fo nfɛ adekpanu nɛ akpanu nna pɔɛŋ nseŋ ku kututu.

²⁵ Nɛ mo pibinyɛn Ishmaɛl malɛ daa la nfɛ kuduasa.

²⁶ Eebraham nɛ mo pibi Ishmaɛl kikɛ, kachɛ koŋwule nɛ b daŋ ku bumo.

²⁷ Loŋ be kachɛ na gbagba nɛ b daŋ ku Eebraham be laŋ to be enyɛn kama, bumo nɛ b kurge mbe laŋ to nɛ bumo nɛ b daŋ tɔ na kikɛ.