Jɛnesis 15 - EBƆRƐ BE KAWƆL

Ebɔrɛ nɛ Eebram be kɔnɔkoŋwule be ŋkre be asheŋ

¹ Ade kikɛ be kaman nɛ Eebram ku bɔrɛdare nseŋ nu Enyɛnpe Ebɔrɛ na ka kaŋɛ mo: “Eebram, sa maa lɔ kufu. Ma e la fo ekumpo meeŋ ka fo kukɔ gboŋgboŋi.”

² Nɛ Eebram kaŋɛ: “Enyɛnpe lela, ŋ ka baa maŋ kɔ mbia ere, manɛ be kelela nɛ fo kakɔka ere beeŋ wora ma? Damaskɔs be Eliaza ere e naaŋ ji ma kapetɛ na.

³ Fo maŋ sa ma mbia, amoso ma anya ere be eko e naaŋ ji ma kapetɛ na.”

⁴ Ndoŋ nna nɛ Eebram naŋ nu Enyɛnpe Ebɔrɛ na ka naŋ malga mo kutɔ ŋ kaŋɛ: “Mannɛ fo kenya Eliaza e naaŋ ji fo kapetɛ. Fo gbagba pibinyɛn kurgeso e naaŋ ki fo asɔ be kumuwura.”

⁵ Ndoŋ nna nɛ Enyɛnpe Ebɔrɛ shin nɛ Eebram lar kowu nɛ e kaŋɛ mo: “Keni esoso ŋ keni, feeŋ tiŋ ŋ karga achɛkpabi ere a? To, nɛ fo maaŋ tiŋ ŋ karga amo bre, kumo ere loŋ nɛ fo kanaŋ to ebi beeŋ ba kaa sa na.”

⁶ Nɛ Eebram yirda Enyɛnpe be kamalga na. Nɛ Enyɛnpe na malɛ kpal loŋ so n nase kumo fanɛ e la esa nɛ e niŋi nna ashi mbe anishi to.

⁷ Kede be kaman nɛ Enyɛnpe Ebɔrɛ na naŋ kaŋɛ mo le: “Ma e la Enyɛnpetale Ebɔrɛ nɛ e lara fo ashi Ur nɛ k wɔ Babilɔn be efuli so na nsaa shin nɛ n ta kasawule ere n sa fo nɛ k baa la feya.”

⁸ Ndoŋ nna nɛ Eebram kaŋɛ: “Enyɛnpetale lela, manɛ e naaŋ baa la tɔɔnɛ fanɛ kasawule ere beeŋ baa la meya?”

⁹ Kumo be kaman nɛ Enyɛnpe Ebɔrɛ na kaŋɛ mo: “Bar ma nache fɔlbi nɛ kaboelote nɛ kpakpa, nɛ b fo nfɛ asasa, n ta lepɔ nɛ keli fɔlbi gba n ti so.”

¹⁰ Nɛ Eebram bar loŋ be asɔ na Ebɔrɛ be anishito nseŋ ku ŋ ku asɔbɔya na bre to anyɔnyɔ n ta kaba kama n nase m mata kumo barkasa kasawule. Ama e daa maŋ ku mbuibi na bre to.

¹¹ Ndoŋ nna nɛ ejita ba kaa jɔŋɛ eblaŋ na so nɛ Eebram ju bumo.

¹² Saŋɛ nɛ epeŋi bee sha ketɔr na nɛ Eebram di m mel nɛ tentembiri plɔtɔ ba buu mo so.

¹³ Kumo be kaman nɛ Enyɛnpe Ebɔrɛ kaŋɛ mo: “Eebram, baa nyi geeŋ fanɛ kachako fo kanaŋ to ebi beeŋ ki befɔ ashi kasawule nɛ b maŋ nyi so nseŋ ki anya ndoŋ nɛ b tɔrɔ bumo ga nfɛ alfa ana.

¹⁴ Ama meeŋ gberge loŋ be basa nɛ baaŋ ta bumo ŋ ki anya na kusoe. Kumo be kaman baaŋ lar ndoŋ nɛ kanya damta.

¹⁵ Ama fo ere beeŋ ji kasawule ere so n ya bel n fuli kumu nseŋ wu kagbenewushi be luwu nɛ b puli fo.

¹⁶ Fo kenanagbiramuli be jemanɛ to nɛ baaŋ naŋ bɛta m ba kasawule ere so. Loŋ be saŋɛ na nɛ Amɔriebi be alubi wora keshi ga nseŋ daga kasogberge.”

¹⁷ Ade kikɛ be kaman epeŋi ka tɔr nɛ kaboŋ biri to nɛ kapuliya nɛ edishi bee lar kumo to nɛ kabulpi suseso ko ba choŋ n lar epul na to m ba bɔla eblaŋ na be nfɛato n choŋ.

¹⁸ To, kumo be kachɛ na nɛ Enyɛnpe nɛ Eebram wora kɔnɔkoŋwule be ŋkre nɛ Enyɛnpe kaŋɛ mo: “Kɔnɔ nɛ mee nase a sa fo e la fanɛ meeŋ ta kasawule nɛ k yili lɔr nɛ k wɔ Ijipt be kasawule be ekar n ya fo lɔrgboŋ nɛ baa tre Yufreetes na kikɛ n sa fo kaman to ebi,

¹⁹ n ta Kenebi nɛ Kenizebi nɛ Kadmɔnebi

²⁰ nɛ Hitebi nɛ Pɛrizebi nɛ Refayebi

²¹ nɛ Amɔriebi nɛ Keenanebi nɛ Girgasebi nɛ Jebusiebi be nsawule kikɛ n ti so.”