Jɛnesis 14 - EBƆRƐ BE KAWƆL

Eebram ka mɔlga Lɔt be asheŋ

¹ Jemanɛ nɛ Lɔt nɛ Eebram barga to nna nɛ Babilɔn be efuli so be ewura Amrafɛl nɛ Ɛlasa be ewura Ariɔk nɛ Ilam be ewura Kedɔrlawomer nɛ Goyiim be ewura Taidal kre kena m ba kɔ

² Sodɔm be ewura Bɛra nɛ Gomɔra be ewura Birsha nɛ Adnab be ewura Shinab nɛ Zeboyim be ewura Shemeber nɛ Bela nɛ baa tre Zowar na be ewura na.

³ Bewura anu nɛ b ti bumo be atre kaman to ere daŋ wora kɔnɔkoŋwule nna m ba abar so ashi Sidim be ketaŋɛ to. [Ndoŋ nɛ baa tre nfɔl be teku na.]

⁴ Nfɛ kuduanyɔ nɛ b daŋ shuŋ ewura Kedɔrlawomer, ama kafɛ kuduasasopo to, nɛ b nyaŋɛ to ŋ kini fanɛ b maaŋ naŋ shuŋ mo.

⁵ Kafɛ kuduanasopo na to nɛ ewura Kedɔrlawomer nɛ bewura asa nɛ b daŋ ti mo so na nɛ bumo be benapo yɔ n ya kɔ m pɔɔ Refayebi nɛ b wɔ Ashterɔf Karnaya na nɛ Zuzebi ashi Ham nɛ Emiebi ashi Shaivaa Kiryatayim be kepreŋ so

⁶ nɛ Horebi ashi Edɔm be efuli so be abee to na so nseŋ bɛ bumo so n yɔ kufɔ n ya fo Ɛl Paran be kiyi na be ekar.

⁷ Kede be kaman nɛ b bɛta kaman m ba Ɛn Mishpat. (Kumo e la Kadɛsh na) Ndoŋ nna nɛ b naŋ ya kɔ n sɔ Amalɛkebi be nsawule kikɛ nseŋ naŋ kɔ m pɔɔ so Amɔriebi nɛ b daa wɔ Hazazɔn Tamaa na malɛ so.

⁸ Ndoŋ nna nɛ Sodɔm nɛ Gomɔra nɛ Adma nɛ Zeboyim nɛ Bela, bumo e la Zowar na, be bewura malɛ keta bumo be benapo n lar m ba Sidim be ketaŋɛ na to

⁹ m ba kaa kɔ Ilam be bewura nɛ baa tre Kedɔrlawomer na nɛ Goyiim be ewura nɛ baa tre Taidal na nɛ Babilɔn be ewura nɛ baa tre Amrafɛl na nɛ Ɛlasa be ewura nɛ baa tre Ariɔk na kena nɛ k ki fanɛ bewura anu e daŋ kɔ bewura ana na. Bewura ana na be atre e daa la Kedɔrlawomer nɛ Taidal nɛ Amrafɛl nɛ Ariɔk.

¹⁰ Sidim be ketaŋɛ na malɛ to daa kɔ kootal be amaŋ chiŋgeliŋ nna, amoso Sodɔm nɛ Gomɔra be bewura na nɛ bumo be benapo ka daŋ shile a lar kena na to na nɛ bumo be beko tɔr amaŋ na be ako to nɛ bumo nɛ b ka na malɛ shile n yɔ abee ko to n ya ŋana.

¹¹ Ndoŋ nna nɛ bewura ana na ya bela Sodɔm nɛ Gomɔra be asɔ nɛ ajibi kikɛ kuraa n choŋ.

¹² Eebram mo sipo pibi Lɔt malɛ daa wɔ Sodɔm nna, amoso b daŋ ta mo alɛ gba nɛ mbe asɔ nɛ e kɔ kikɛ nna n ti so n yɔ.

¹³ Ama kanyɛn ko bre daŋ nya mbe kumu n shile nseŋ ya kaŋɛ Eebram, Hibruw be esa na, asheŋ nɛ a daŋ wora na kikɛ. Eebram malɛ daŋ chena m mata ndibigboŋ ko nɛ a daa la Amɔriebi be esa ko nɛ baa tre Mamre na peya. Mamre nɛ mo sipoana Ɛshkɔl nɛ Anɛr nɛ Eebram daŋ yili kumo nna fanɛ baaŋ baa chɛ abar to.

¹⁴ Eebram ka nu fanɛ b pɛ mo sipo pibi na nɛ e tre benapo nɛ b kurge mbe laŋ to kikɛ m ba shɛr. Bumo kikɛ daa wɔ basa alfa asa nɛ kuduaburwa, nɛ b ju m buu bewura ana na so hale n ya fo kade nɛ baa tre Dan na.

¹⁵ Ndoŋ nɛ e ya barga mbe benapo to ntuŋ ntuŋ so nɛ b kɔ bumo doŋana na kena kanyɛso m pɔɔ bumo so cheche nseŋ ju m bɛ bumo so loŋ n ya fo Hobab nɛ k daa wɔ Damaskɔs be kelargato be esoso be kaba so na.

¹⁶ Ndoŋ nɛ Eebram ya suge asɔ nɛ b daŋ ta na nseŋ bɛta mo sipo pibi Lɔt nɛ mbe asɔ nɛ ana nɛ beche nɛ basa pɔtɛ nɛ b daŋ ti so na kikɛ nyam m ba.

Mɛlkizedɛk ka nɛfa Eebram be asheŋ

¹⁷ Eebram ka daŋ ya kɔ m pɔɔ Kedɔrlawomer nɛ bewura nɛ b daŋ chɛ mo to a kɔ na so, nseŋ bɛta a ba na, nɛ Sodɔm be ewura daŋ ya shɛr mo to ashi Shave be Ketaŋɛ nɛ baa tre Bewura be Ketaŋɛ na to.

¹⁸ Ndoŋ nna nɛ Mɛlkizedɛk nɛ e daa la Salɛm be ewura nseŋ naa la Ebɔrɛ Ewurgboŋ na be bɔrɛmatapo na, ta bodobodo nɛ nsa ko m bar Eebram

¹⁹ nseŋ nɛfa mo ŋ kaŋɛ: “Ebɔrɛ Ewurgboŋ nɛ e to esoso nɛ kasawule na e nɛfa fo Eebram.

²⁰ Kemaŋkura e baa la Ebɔrɛ Ewurgboŋ nɛ e sa fo eleŋ nɛ fo kɔ m pɔɔ fo doŋana so na peya.” Nɛ Eebram sa Mɛlkizedɛk asɔ nɛ e ya nya kena na to na kikɛ be kudukudusopo.

²¹ Ndoŋ nna nɛ Sodɔm be ewura malɛ kaŋɛ Eebram: “Ta asɔ na bre nseŋ laŋɛ ma basa kikɛ n sa ma.”

²² Nɛ Eebram kaŋɛ: “M bɔ ntaŋ Enyɛnpe Ebɔrɛ Ewurgboŋ nɛ e to esoso nɛ kasawule na be anishito

²³ fanɛ m maaŋ ta fo kusɔ kama, hale kajesebi ŋko kesebeta be kawɔlbi gba, saŋɛ na so fo maaŋ nya ŋ kaŋɛ le: ‘Ma e shin nɛ Eebram ki damawura.’

²⁴ Ŋ gbagba maaŋ ta fo shɛŋ ama kusɔ nɛ mbrantiɛ na ji kena na to na nawule. Ama shin nɛ n teriana Anɛr nɛ Eshkɔl nɛ Mamre e ta asɔ nɛ an bar na be ako.”