Jɛnesis 13 - EBƆRƐ BE KAWƆL

Eebram nɛ Lɔt ka barga abar be asheŋ

¹ B ka lar Ijipt na be kaman nɛ Eebram ta mbe eche nɛ mbe asɔ nɛ e kɔ kikɛ m bɛta n yɔ keshishɛrsawule nɛ baa tre Negɛf na so nɛ Lɔt naŋ tu mo n yɔ ndoŋ gba.

² Eebram daa la damawura nna kashenteŋto nseŋ daa kɔ mbolpɔ nɛ mboe nɛ ana nɛ shuwa nɛ gbiti.

³ K maŋ chɛr nɛ Eebram naŋ lar ndoŋ a na a kilgi to hale n ya kaa taga to Bɛtɛl. E ka fo Ai nɛ Bɛtɛl be kefɛato, kakpa nɛ e daŋ yuu mbe ewajɛbu na

⁴ nɛ kakpa nɛ e daŋ yuu bɔrɛsure na, nɛ e naŋ bunyaŋ Enyɛnpe Ebɔrɛ be ketre.

⁵ Lɔt gba daŋ keta mbe mbolpɔ nɛ mboe nɛ ana nɛ mbe kanaŋ nna n tu Eebram n yɔ.

⁶ Kasawule na malɛ be asɔbɔya be ejikpa daa maŋ shi nɛ bumo benyɔ kikɛ e tiŋ n chena abar so kaboŋ koŋwule, ŋkpal manɛ so, bumo be asɔbɔya daa shi ga.

⁷ Kumo be kaman Keenanebi na nɛ Pɛrizebi na gba daa wɔ kasawule na so nna n ti so. Amoso kolu daŋ tɔr Eebram nɛ Lɔt be asɔbɔyakpapoana so nna ŋkpal asɔbɔya be ejikpa so.

⁸ Ndoŋ nna nɛ Eebram kaŋɛ Lɔt le: “An la basa koŋwule nna, k maŋ daga kamalga ka wɔ ma nɛ fo be nferinto ŋko fo basa nɛ ma basa ka bee bile ŋkpal kasawule so.

⁹ Mannɛ kasawule e dese ere a? Amoso shin nɛ an barga to n chena. Nɛ fo yɔ benaso, ma alɛ beeŋ yɔ jisoso nɛ fo alɛ naŋ yɔ jiso so, ma alɛ beeŋ yɔ benaso.”

¹⁰ Nɛ Lɔt maŋ mbe kumu so ŋ keni n wu Jɔɔdan be ketaŋɛ ka dese n ya fo Zowar, a kɔ nchu nseŋ daa du fanɛ Enyɛnpe Ebɔrɛ be kudɔbi nɛ baa tre Iden na, ŋko Ijipt be kasawule. [Ade kikɛ daŋ wora nna pɔɛŋ nɛ Enyɛnpe mur Sodɔm nɛ Gomɔra be ndegboŋ na.]

¹¹ Eebram ka daŋ kaŋɛ loŋ na nɛ Lɔt lara Jɔɔdan be ketaŋɛ na be kaba so kikɛ n sa mbe kumu nseŋ barga n ya chena epeŋipetekpa be kaba so. To, kananɛ bumo benyɔ na daŋ barga abar nna na:

¹² Eebram daŋ chena Keenan be kasawule so nna nɛ Lɔt malɛ daŋ chena nde nɛ a wɔ Jɔɔdan be ketaŋɛ na be nferinto nseŋ yuu mbe ewajɛbu m mata Sodɔm.

¹³ Sodɔmebi malɛ daa la dalubiwuraana nna nseŋ daa wora alubi ga a gbiti Enyɛnpe Ebɔrɛ na.

Eebram ka yɔ Hibrɔn be asheŋ

¹⁴ Eebram nɛ Lɔt ka daŋ barga abar na be kaman nɛ Enyɛnpe Ebɔrɛ na kaŋɛ Eebram le: “Yili kaboŋ nɛ fo wɔ ere m maŋ fo kumu so ŋ keni ŋ kulti kakpa nɛ fo wɔ ere kikɛ.

¹⁵ Meeŋ ta kasawule nɛ fo wu ere kikɛ n sa fo nɛ fo kaman to ebi nɛ k baa la menyeya nna hale mbaanaayɔ.

¹⁶ Kumo be kaman, meeŋ shin nɛ fo kaman to ebi e wora keshi fanɛ kasawule so be shishɛr. Amoso nɛ esa baŋ tiŋ ŋ karga kasawule so be shishɛr, kumo ere e beeŋ tiŋ ŋ karga fo kaman to ebi gba.

¹⁷ Koso n nite kasawule na be nteŋ to nɛ mparto kikɛ, ŋkpal manɛ so, fo nɛ meeŋ ta kumo n sa.”

¹⁸ Ndoŋ nna nɛ Eebram tia mbe wajɛbu ŋ kaa n ya chena m mata Mamre be ndibigboŋ na ashi Hibrɔn nseŋ yuu bɔrɛsure a bunyaŋ Enyɛnpe Ebɔrɛ.