Jɛnesis 12 - EBƆRƐ BE KAWƆL

Ebɔrɛ ka tre Eebram be asheŋ

¹ Kachako nɛ Enyɛnpetale na kaŋɛ Eebram: “Lar fo efuli so nɛ fo basa to nɛ fo tuto be kowu to nseŋ yɔ kasawule nɛ mee sha keŋini fo ere so.

² Meeŋ shin nɛ fo ki kanaŋgboŋwura nsaa kɔ efuligboŋ. Meeŋ nɛfa fo n shin nɛ fo ketre e dii, nɛ fo ki nɛfa n sa basa kikɛ.

³ Bekama malɛ nɛ b nɛfa fo, ma alɛ gba beeŋ nɛfa bumo. Ama ekama nɛ e sho fo kɔnɔ, ma alɛ gba beeŋ sho amodoŋwura kɔnɔ. Fo so nɛ meeŋ bɔla n nɛfa durnya to ebi kikɛ.”

⁴ Eebram be nfɛ adushunu nɛ anu be saŋɛ nɛ e lar Haran to, fanɛ kananɛ Enyɛnpe Ebɔrɛ kaŋɛ mo fanɛ e wora na. Nɛ Lɔt gba tu mo n yɔ.

⁵ Eebram daŋ keta mbe eche Sɛɛrai nɛ mo sipo pibi Lɔt nna n ta bumo kikɛ be kanya nɛ basa nɛ b daŋ nya ashi Haran be kasawule so na kikɛ nyam m pɛ Keenan be ekpa a yɔ ndoŋ.

⁶ B ka ya fo Keenan nɛ Eebram nite ŋ kulti kasawule na so hale n ya fo More be kedibigboŋ na ase, ashi Shɛkɛm. Kumo be saŋɛ malɛ nɛ Keenanebi kraa tase kasawule na so.

⁷ Ndoŋ nɛ Enyɛnpe na lar Eebram so ŋ kaŋɛ mo: “Meeŋ ta kasawule ere n sa fo kanaŋ to ebi.” Kumo be kaman nɛ Eebram yuu bɔrɛsure ndoŋ n lara sarga n sa Enyɛnpe Ebɔrɛ nɛ e lar mo so ndoŋ na.

⁸ Kumo be kaman nɛ e yɔ abee nɛ a wɔ Bɛtɛl be epeŋipetekpa be kaba so na n ya yuu mbe ewajɛbu Bɛtɛl nɛ Ai be kefɛato. Ndoŋ nɛ Eebram naŋ yuu bɔrɛsure m bunyaŋ Enyɛnpe na pɔɛŋ

⁹ nseŋ naŋ pɛ mbe enite na to be ekpa loŋ a yɔ keshishɛrsawule nɛ baa tre Negɛf na be kaba so.

Eebram ka yɔ Ijipt be asheŋ

¹⁰ Jemanɛ ko nɛ akoŋ tɔr Keenan be kasawule so nɛ Eebram yɔ Ijipt be efuli so nɛ e ya ji nchɛnnyɔ, ŋkpal akoŋ na ka daŋ sɔ Keenan be kasawule so kikɛ na so.

¹¹ Mo nɛ mbe eche Sɛɛrai ka ta loŋ n ya kaa taga to Ijipt nɛ e kaŋɛ mo le: “Sɛɛrai, n nyi fo ka walɛ kebita ga.

¹² Amoso Ijiptebi ere baŋ wu fo, baaŋ kaŋɛ fanɛ ma eche e la fo, nseŋ kpal loŋ so m mɔ ma ŋ ka fo.

¹³ Amoso, an ka yɔ ndoŋ fo kaŋɛ bumo fanɛ fo la n sipoche nna, saŋɛ na so baaŋ kpal fo so n yige ma nseŋ keni ma so nɛnɛ.”

¹⁴ Kashenteŋto malɛ, Eebram nɛ Sɛɛrai ka luri Ijipt nɛ Ijiptebi na wu fanɛ Sɛɛrai walɛ kebita pasaa.

¹⁵ Amoso Ijipt be ewura nɛ baa tre Fɛɛro na be benimu ko ka wu Sɛɛrai nɛ b ya kaŋɛ Fɛɛro mbe kebita be asheŋ. Kumo be kaman nɛ b ba keta Sɛɛrai n yɔ Fɛɛro be laŋ to.

¹⁶ Ŋkpal Sɛɛrai so, ewura Fɛɛro daŋ keni Eebram so nna nɛnɛ nseŋ daŋ sa mo mbolpɔ nɛ ana nɛ ekurma nyɛnso nɛ becheso nɛ anya nyɛnso nɛ becheso n ta enyɔma n ti so.

¹⁷ Ama ŋkpal ewura Fɛɛro ka daŋ sɔ Eebram be eche Sɛɛrai na so, Enyɛnpetale na daŋ shin nna nɛ alɔ lubi tɔr mo nɛ mbe basa nɛ b wɔ mbe laŋ to so.

¹⁸ Ndoŋ nna nɛ ewura na shuŋi nɛ b ya tre Eebram m ba nɛ e bishi mo: “Manɛ e ba nɛ fo wora ma loŋ? Nuso nɛ a ji nɛ fo maŋ kaŋɛ ma fanɛ Sɛɛrai la fo eche nna?

¹⁹ Manɛ so nɛ fo kaŋɛ fanɛ e la fo sipoche nna nseŋ shin nɛ n ta mo fanɛ ma eche? To, fo eche nde. Keta fo kusɔ a yɔ.”

²⁰ Ndoŋ nna nɛ ewura Fɛɛro lara basa ŋ kaŋɛ bumo fanɛ b keta Eebram nɛ mbe eche nɛ asɔ nɛ b kɔ na kikɛ n lar kasawule na so.