Jɛnesis 1 - EBƆRƐ BE KAWƆL

Kananɛ Ebɔrɛ to durnya be asheŋ

¹ Durnya be sososo na, esoso nɛ kasawule nɛ Ebɔrɛ to.

² Loŋ be saŋɛ na shɛŋ shɛŋ daa maŋ wɔ kasawule so, amoso k daa du nna le muntuluŋ. Kumo be jemanɛ na so nchu e daa la kaplɛkama nɛ tentembiri daŋ sɔ kakpa kikɛ le mina nɛ Ebɔrɛ be Kiyoyu daa lɛa a lɛa nchuana na so.

³ Ndoŋ nna nɛ Ebɔrɛ kaŋɛ: “Shin nɛ kefulto e lar n fulto.” Epul na to nɛ kaboŋ fulto par.

⁴ Nɛ Ebɔrɛ wu fanɛ kefulto na walɛ, nɛ e barga kefulto na be saŋɛ ashi tentembiri be saŋɛ to.

⁵ E ka wora loŋ na nɛ e nase kefulto be saŋɛ na kapa nseŋ nase tentembiri be saŋɛ na malɛ kanyɛ. Ndoŋ nna nɛ kanyɛ biri nɛ kare chɛ ŋ ki kachɛ lelemu juŋkparso na.

⁶ Kachɛ juŋkparso na be kaman nɛ Ebɔrɛ kaŋɛ: “Shin nɛ kunji e barga nchuana na to nɛ ako e baa wɔ esoso nɛ ako malɛ e baa wɔ kaseto.” Nɛ loŋ wora.

⁷ Loŋ ka wora nɛ Ebɔrɛ barga nchu na to ntunnyɔ, n shin nɛ katuŋ ko wɔ esoso nɛ kuko malɛ wɔ kasawule nɛ kunji wɔ amo be nferinto.

⁸ Nɛ Ebɔrɛ nase kunji na awɔlpa. Ndoŋ nna nɛ kanyɛ biri nɛ kare chɛ ŋ ki kachɛ lelemu nyɔsopo na.

⁹ Kachɛ nyɔsopo na be kaman nɛ Ebɔrɛ naŋ kaŋɛ: “Shin nɛ nchu nɛ a wɔ awɔlpa be kaseto na e gama abar so kaboŋ koŋwule n shin nɛ kasawule malɛ e di efuli.” Nɛ loŋ wora.

¹⁰ Loŋ ka wora na nɛ Ebɔrɛ nase kaboŋ wɔlso nɛ k di efuli na kasawule nseŋ nase nchuana nɛ a ba abar so na eteku. E ka wora loŋ na nɛ e wu fanɛ k walɛ.

¹¹ Kumo be kaman nɛ Ebɔrɛ naŋ kaŋɛ le: “Shin nɛ asɔduuso be yiri yiri to fanɛ ayu be yiri to nɛ ndibi sɔrso be yiri to kikɛ e fara a kɔr kasawule so nseŋ sɔr amo be yiri to be asɔrso.” Nɛ loŋ wora.

¹² Ndoŋ nna nɛ asɔduuso be yiri yiri fanɛ ayu be yiri to nɛ asɔrso be yiri to kikɛ kɔr nɛ kekama sɔr kumo be yiri to be asɔrso be bibi. Nɛ Ebɔrɛ wu fanɛ a walɛ.

¹³ Ndoŋ nna nɛ kanyɛ biri nɛ kare chɛ ŋ ki kachɛ lelemu sasopo na.

¹⁴ Kachɛ sasopo na be kaman nɛ Ebɔrɛ naŋ kaŋɛ: “Shin nɛ kefulto e lar awɔlpa to m barga kapa ashi kanyɛ to nseŋ shin nɛ a baa ŋini jemanɛ nɛ saŋɛ nɛ nchɛ nɛ nfɛ bee fara.

¹⁵ Shin nɛ a baa la afulbi nɛ a wɔ awɔlpa to a nyaŋɛ kefulto a yuu kasawule so.” Nɛ loŋ wora.

¹⁶ Kede be kaman nɛ Ebɔrɛ to asɔ fultoso anyɔ n shin nɛ kegboŋi na bee ji eleŋ kapaso nɛ kekakarbi na malɛ bee ji eleŋ kanyɛso. Loŋ be saŋɛ na nɛ e daŋ to achɛkpabi gba n ti so.

¹⁷ Ndoŋ nna nɛ Ebɔrɛ shin nɛ amo kikɛ wɔ awɔlpa to a nyaŋɛ a yuu kasawule so

¹⁸ a ji kapa nɛ kanyɛ kikɛ so eleŋ nsaa barga kefulto ashi tentembiri to. Loŋ ka wora na nɛ Ebɔrɛ wu fanɛ k walɛ.

¹⁹ Ndoŋ nna nɛ kanyɛ biri nɛ kare chɛ ŋ ki kachɛ lelemu nasopo na.

²⁰ Kede be kaman nɛ Ebɔrɛ naŋ kaŋɛ: “Shin nɛ asɔ futeso be yiri yiri e sɔ nchuana na to nseŋ shin nɛ mbuibiana malɛ e sɔ esoso a firgi.”

²¹ E ka kaŋɛ loŋ na nɛ e to nchu to be asɔ futeso gboŋgboŋiana be yiri yiri kikɛ nɛ kusɔ futeso be yiri kama nyam nɛ k wɔ nchu to nseŋ naŋ to mbuibi be yiri yiriana kikɛ verr. Loŋ ka wora na nɛ Ebɔrɛ wu fanɛ k walɛ.

²² Ndoŋ nna nɛ Ebɔrɛ nɛfa asɔ na kikɛ nyam nseŋ kaŋɛ: “Men baa wɔtɔ a kurge nsaa to a bure bibi n salga to n sɔ nchuana to nɛ mbuibiana na malɛ gba e salga to n sɔ durnya to kikɛ verr.”

²³ Ndoŋ nna nɛ kanyɛ biri nɛ kare chɛ ŋ ki kachɛ lelemu nusopo na.

²⁴ Ndoŋ nna nɛ Ebɔrɛ naŋ kaŋɛ: “Shin nɛ asɔbɔya be yiri yiri e lar a wɔ kasawule so, amo nɛ baa bela nɛ amo nɛ a wɔ kupuŋ to, begboŋi nɛ bewurbi kikɛ nyam.” Nɛ loŋ wora.

²⁵ Ebɔrɛ ka to amo kikɛ na nɛ e wu fanɛ kusɔ kama walɛ.

²⁶ Ade kikɛ be kaman nɛ Ebɔrɛ naŋ kaŋɛ: “Men shin nɛ an to edimɛdi nɛ b baa du fanɛ anyi, nsaa ji eleŋ ashi ekɔrɔtɔ so nɛ mbuibi so nɛ asɔ gbeyesoana so nɛ asɔ belaso na kikɛ so nɛ kasawule kikɛ nyam so.”

²⁷ Kumo be kaman nɛ Ebɔrɛ to dimɛdi fanɛ mo gbagba be kumu nɛ mo gbagba be kaduli. Enyɛn nɛ eche nɛ e daŋ to bumo.

²⁸ Ndoŋ nna nɛ Ebɔrɛ nɛfa bumo nseŋ kaŋɛ bumo le: “Men kurge n wora keshi n salga to n sɔ kasawule so kikɛ nsaa ji eleŋ kumo so. Men baa ji eleŋ ekɔrɔtɔ so nɛ mbuibi so nɛ asɔ gbeyeso kikɛ nyam so.”

²⁹ Kede be kaman nɛ Ebɔrɛ naŋ kaŋɛ bumo le: “Men nu nfe. N ta asɔduuso fanɛ ayu be yiri yiri to nɛ ndibi sɔrso kama nɛ amo be asɔrso kɔ bibi a wɔ kasawule ere kikɛ so n sa menyi nɛ a baa la asɔ jiso n sa menyi.

³⁰ Ama kasawule ere so be asɔbɔya bre kikɛ nɛ mbuibi be yiri yiri kikɛ nɛ asɔ gbeyeso be yiri yiri kikɛ nɛ kusɔ futeso kikɛ nyam bre afitiri nɛ afantaŋ bumbuŋ nɛ n sa amo nɛ a baa la amo be ajibi.” Nɛ loŋ wora.

³¹ Ebɔrɛ ka keni asɔ nɛ e wora na kikɛ nɛ e wu fanɛ amo kikɛ walɛ ga. Ndoŋ nna nɛ kanyɛ biri nɛ kare chɛ ŋ ki kachɛ lelemu shesopo na.