Ezikɛl 9 - EBƆRƐ BE KAWƆL

B ka mɔ agbirshumpoana be asheŋ

¹ Ade be kaman nɛ n nu Ebɔrɛ ka ponte ŋ kaŋɛ: “Menyi nɛ b lara fanɛ men gberge kadegboŋ na to be basa kusoe na e ta menyi be akɔsɔ m bɔɔ enɔ m ba Jerusalɛm to.”

² Epul to nɛ benyɛn ashe ko shi bɔrɛlambu na be kabuna nɛ k wɔ kelargato be esoso be kaba so na m ba. Bumo be ekama daa bɔ kekɔsɔ enɔ to nna. Kanyɛn ko nɛ e daŋ buu piŋi lela nsaa kɔ kasibɛ be asɔ enɔ to gba daŋ ti bumo so nna. Bumo kikɛ ba luri bɔrɛlambu na to nna n ya yili danyaŋ be bɔrɛsure na ase.

³ Ndoŋ nna nɛ Israɛl be Ebɔrɛ na be kemaŋkura na lar asɔbɔya keniso nɛ a kɔ mbuibi be aba nɛ baa tre ‘chɛrubim’ na be kumu ase n yɔ bɔrɛlambu na be kabuna to. Nɛ Enyɛnpe Ebɔrɛ na tre kanyɛn nɛ e buu piŋi lela na nsaa kɔ kasibɛ be asɔ enɔ to na

⁴ ŋ kaŋɛ mo le: “Yɔ Jerusalɛm be kadegboŋ na to n ya dulgi bekama nɛ asheŋ bee besa nɛ bumo be ŋgbene jija bumo ŋkpal ekishisheŋ nɛ a bee wora kade na to so na be nsɔto.” Nɛ kanyɛn na lar n yɔ nɛ e ya dulgi bumo.

⁵ Kumo be kaman nɛ n naŋ nu Ebɔrɛ ka kaŋɛ benyɛn nɛ b ka yil na le: “Men bɛ mo so n ya kaa mɔ basa, men sa maŋ kaŋ wu ekama kuwɔr ŋko n shu ekama so.

⁶ Men ya mɔ benyɛnnimu nɛ mbrantiɛ nɛ besuŋgurbi nɛ bechekpar nɛ mbi wurbi kikɛ ama men sa maŋ beta ekama nɛ e kɔ ndulgi mbe kasɔto na. Men fara ma bɔrɛlambu to a mɔ a yɔ.” Nɛ b ta benimuana nɛ b daa wɔ bɔrɛlambu na be anishito na n fara.

⁷ Ndoŋ nna nɛ Ebɔrɛ naŋ kaŋɛ bumo: “Men mɔ basa n lɛ bɔrɛlambu na be kelɔnɛ na so kikɛ n shin nɛ k jija. Men fara a mɔ!” Nɛ b lar n ya fara basa be kemɔ Jerusalɛm be kadegboŋ na kikɛ to.

⁸ B ka fara kamɔ na a yɔ nɛ n nawule ka a yil, nseŋ kurgi kumu n yuu to m boŋ to ŋ kaŋɛ le: “Enyɛnpetale Ebɔrɛ, ŋkpal fo ka nya agbo ga n wora Jerusalɛm to be basa so, fee sha nna nɛ fo mɔ Israɛl be basa nɛ b ka ere kikɛ a?”

⁹ Nɛ Ebɔrɛ kaŋɛ ma le: “Israɛl nɛ Juda be basa be kulubi na shi m baŋ so. Basa be kemɔ e sɔ kasawule na kikɛ so nɛ ekishisheŋ malɛ sɔ Jerusalɛm be kade to kikɛ. Baa kaŋɛ nna fanɛ, ma, Enyɛnpe Ebɔrɛ na kplaŋ efuli na so nna; ma alɛ maa wu asheŋ nɛ baa wora na.

¹⁰ Amoso m maaŋ wu bumo kuwɔr ŋko n shu bumo so kikɛ. Kananɛ b wora beko na nɛ ma alɛ gba beeŋ wora bumo.”

¹¹ Ade kikɛ be kaman nɛ kanyɛn nɛ e daŋ buu piŋi lela na bɛta m ba kaŋɛ Enyɛnpe Ebɔrɛ na le: “N wora kusɔ nɛ fo kaŋɛ na n loge.”