Ezikɛl 7 - EBƆRƐ BE KAWƆL

Lalaloge be saŋɛ na ka taga to be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, kusɔ nɛ ma, Enyɛnpetale Ebɔrɛ na bee kaŋɛ Israɛl be efuli so be basa e la fanɛ, lalaloge be jemanɛ na bee fo nɛ efuli na kikɛ nyam e mur.

³ Israɛl be basa, lalaloge be kachɛ na fo menyi nna na. Meeŋ shin nɛ ma agbo e ba menyi so. Kanaŋkama, lalaloge be kachɛ na beeŋ ba nɛ n ji menyi demu nseŋ gberge menyi kusoe ŋkpal menyi be aworbi lubi nɛ ŋ kishi na so.

⁴ M maaŋ wu menyi kuwɔr ŋko n yige menyi nɛ men ta men be amu n ya ji. Abaanaaworasheŋ meeŋ gberge menyi kusoe ŋkpal men be eda lubi nɛ aworbi lubi nɛ ŋ kishi so. Ndoŋ nɛ menyeeŋ pin fanɛ ma e la Enyɛnpe Ebɔrɛ na.”

⁵ Le nɛ Enyɛnpetale Ebɔrɛ na bee kaŋɛ: “Aleblawu nɛ ekama maŋ naŋ nu kumo be asheŋ bee ba!

⁶ Kemur be saŋɛ na fo! K fo n loge. K beeŋ shin nɛ men mur.

⁷ Menyi nɛ men wɔ Israɛl be kasawule so na beeŋ mur. Saŋɛ na fo, demujiachɛ na taga to. Keyeŋiyeŋi beeŋ tɔr menyi so nɛ men maaŋ naŋ tiŋ n ji eyur kagbenefuliso ashi abee so be kakpa nɛ menyee shuŋ agbirana na.

⁸ Meeŋ shin nɛ ma agbogboŋ e ba menyi so nɛ n ji menyi demu ŋkpal menyi be eda lubi so nseŋ gberge menyi kusoe ŋkpal menyi be aworbi lubi nɛ ŋ kishi na so.

⁹ M maaŋ wu menyi kuwɔr, ma alɛ maaŋ yige menyi nɛ men ta menyi be amu n ya ji. Meeŋ gberge menyi kusoe ŋkpal menyi be eda nɛ aworbi lubi so. Ndoŋ nɛ menyeeŋ pin fanɛ ma Enyɛnpe Ebɔrɛ na e naa gberge menyi kusoe na.”

¹⁰ To, kemur be kachɛ na taga to! K teŋ fo gba! Kebaa maa ji kashenteŋ nɛ mpuchi be kebaawɔtɔ sɔ kaplɛkama.

¹¹ Basa nɛ b ta akɔsɔ a kɔ a fin bumo be kepar tintinso na nya ekpa a wora bumo be kepar nseŋ shin nɛ kumu kpakpaso wora keshi n ti so. Ama bumo be ekama maaŋ ji efute; bumo be kedamaya nɛ b kɔ nsaa keni amo a bɔlɔ kenishi malɛ gba beeŋ mur.

¹² Saŋɛ na bee ba. Kachɛ na taga to. Amoso esa nɛ e bee tɔ asɔ e sa maŋ shin nɛ mbe kagbene e baa fuli mo, esa nɛ e bee fa malɛ gba be kagbene e sa maa jija mo, ŋkpal manɛ so ma agbo bee ba ekama so nna.

¹³ Esa nɛ e fa mbe kasawule maaŋ naŋ tiŋ n sɔ kumo esa nɛ e tɔ kumo na kutɔ kikɛ, ŋkpal manɛ so kewuŋkaŋɛ nɛ k bee laŋɛ ekama b kaplɛa so na maaŋ naŋ chɛrga. Bumo be ekama maaŋ tiŋ m mɔlga mbe kumu ŋkpal bumo be alubi so.

¹⁴ Hale nɛ b foŋ kabel fanɛ ekama e bela ase n yɔ kena to gba esa koŋwule gba maŋ lar n yɔ, ŋkpal manɛ so, ma kagbene kaa ekama so nna.

¹⁵ Kena nɛ alɔ nɛ akoŋ beeŋ sɔ kaplɛkama! Kena e naŋ mɔ ndekarso be basa nɛ akoŋ nɛ alɔ mɔso malɛ e mɔ ndegboŋ to be basa.

¹⁶ Bekama nɛ baaŋ ji efute na malɛ beeŋ shile n yɔ abee so fanɛ kufu ka pɛ elepɔ nɛ a firgi n shi ketaŋɛ to n yɔ kebee so na. Ndoŋ nɛ baaŋ ya shu ŋkpal bumo be alubi so.

¹⁷ Ebruma beeŋ tɔr basa kikɛ so nɛ bumo be mbre maŋ naa kɔ eleŋ nɛ bumo be amuli malɛ e baa chicha.

¹⁸ Baaŋ ta ebɔtɛ ŋ ki asɔbuuso m buu a ŋini fanɛ bumo be ŋgbene jija bumo nna, nɛ kufugboŋ e tɔr bumo so. Anishinyɔr beeŋ pɛ bumo nseŋ shin nɛ ekama e she mbe kumu nɛ k baa la ŋaba n sa mo.

¹⁹ Baaŋ ta bumo be shuwa nɛ gbiti n lɛ agbembi so fanɛ asɔ jiga na, ŋkpal manɛ so, shuwa nɛ gbiti na maaŋ tiŋ m mɔlga bumo jemanɛ nɛ Enyɛnpe Ebɔrɛ na be agbo beeŋ ba bumo so na. B maaŋ naŋ tiŋ n ta amo n tɔ ajibi gba n ji. Ŋkpal manɛ so, shuwa nɛ gbiti na e shin nɛ b tɔr kulubi to.

²⁰ B daa puchi ŋkpal abitasɔ lela nɛ b kɔ so nna nseŋ ta amo ŋ wora agbirana nɛ amo be asheŋ bee nu agbo. Amoso meeŋ shin nɛ abitasɔ na e ki fuloŋ, nsaa maŋ naa kɔ tɔnɔ n sa bumo.

²¹ Meeŋ shin nɛ befɔ e kɔ n suge bumo be asɔ tintiŋ so nɛ basa nɛ b kɔ kumu kpakpaso malɛ e ba jija bumo be asɔ nɛ a ka kikɛ.

²² Jemanɛ nɛ basa lubi beeŋ ba bure n luri ma bɔrɛlambu nɛ mee sha ga na to a jija kumo na, meeŋ kpele ma anishi fanɛ ŋ ka maŋ wu bumo na. Beyu ba luri n ya kaa yuri kumo to be asɔ gba, m maaŋ tuge bumo.

²³ “Basa be kamɔ nɛ keta akɔsɔ a kɔ a fin kusɔ nɛ esa bee sha tintiŋ so sɔ efuli na be kaplɛkama nna.

²⁴ Ma alɛ beeŋ shin nɛ efuliana nɛ b lubi a chɔ bekama na e ba sɔ bumo be nwu kikɛ. Kumo be kaman, nɛ n shin nɛ benapo lempo nɛ baa puchi so na e pɔ aba, ŋkpal efuliana ka beeŋ jija bumo be kabɔrɛshuŋ be mboŋ so.

²⁵ Kufugboŋ kaŋ ba bumo so na nɛ baaŋ pere kenishi n fin kayurwushi, ama bumo alɛ maaŋ nya kumo.

²⁶ Aleblawu bee ba nɛ ebaru lubi be abɔya a sɔ kaplɛkama. Basa beeŋ baa kule anebiana fanɛ b nu Ebɔrɛ be ebɔl ŋ kaŋɛ bumo kusɔ ko, nɛ b maaŋ nya. B maaŋ naŋ nya mbraana nɛ bɔrɛmatapoana daa ŋini na nɛ kasotoji nɛ benimuana na daa sa bumo na kikɛ.

²⁷ Ewura beeŋ shu nɛ benimuana na e paŋ tama nɛ kufu e tɔr basa na kikɛ so nɛ b baa chicha. Bumo be aworbi so nɛ meeŋ gberge bumo kusoe nseŋ wora bumo kusɔ nɛ b ta n wora beko na. Ndoŋ nɛ baaŋ pin fanɛ ma, e la Enyɛnpe Ebɔrɛ na.”