Ezikɛl 6 - EBƆRƐ BE KAWƆL

Kemalga ŋ gbiti Israɛl be abee be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, kilgi fo anishito n shoŋi Israɛl be abee nseŋ malga n sa amo

³ ŋ kaŋɛ: ‘Israɛl be abee, men nu Enyɛnpetale Ebɔrɛ na be kubɔya.’ ” E yɛ: “Ŋ kɔ tokobi nna a ba abee nɛ agoŋgulombi nɛ amantaŋ nɛ ataŋɛ kikɛ so nɛ m ba mur mboŋ nɛ basa bee shuŋ agbirana na.

⁴ Meeŋ bure agbirsure nɛ eduwusure na kikɛ nyam nseŋ mɔ basa nɛ b wɔ ndoŋ na kikɛ n nase bumo be agbirana be anishito.

⁵ Meeŋ pesaŋ Israɛl be basa be bubuni to ashi bumo be agbirana be anishito nseŋ pesaŋ bumo be awibi to ŋ kulti agbirsure na.

⁶ Israɛl be efuli so be nde kikɛ beeŋ mur nɛ bumo be agbirshuŋkpaana kikɛ e bure m bure. Kumo be kaman, nɛ bumo be kusɔ kama e ki fuloŋ.

⁷ Menyi be basa beeŋ wu n dese kaplɛkama, nɛ menyi to be bumo nɛ baaŋ ji efute na e pin fanɛ ma, e la Enyɛnpe Ebɔrɛ na nseŋ shuŋ ma.

⁸ Ama meeŋ shin nɛ beko e ji efute nseŋ pesaŋ to n yɔ efuli pɔtɛana so.

⁹ Saŋɛ na so, bumo nɛ baaŋ ji efute na beeŋ fɛ ma asheŋ nseŋ nyiŋi kananɛ b lar ma kaman nsaa shuŋ agbirana nseŋ ta nyɔmɔ m pɛ ma na ashi efuliana nɛ baaŋ tintiŋ bumo n yɔ na so. Ndoŋ nɛ bumo gbagba be asheŋ beeŋ baa nu bumo gbagba agbo ŋkpal bumo asheŋ lubi lubi nɛ b wora so

¹⁰ nɛ b pin fanɛ ma, e la Enyɛnpe Ebɔrɛ na, ma alɛ maa funti jiga nna a kaŋɛ fanɛ meeŋ mur bumo be asɔ.”

¹¹ Ade kikɛ be kaman, nɛ Enyɛnpetale Ebɔrɛ na naŋ kaŋɛ: “Ezikɛl, ta fo enɔana n deŋi kumu nsaa shu a bri aya ase a boŋ to kagbenejijaso. Ŋkpal Israɛl be basa be aworbi lubi nɛ ŋ kishi ga na so, kena nɛ akoŋ nɛ alɔ mɔso e naŋ mur bumo.

¹² Alɔ beeŋ mɔ bumo nɛ b wɔ kufɔ kufɔ nɛ bumo nɛ b taga to malɛ e wu kena to nɛ bumo nɛ baaŋ nya bumo be amu n ji efute malɛ e wu ŋkpal akoŋ so. Kananɛ ma agbogboŋ beeŋ gbelge bumo so nna na.

¹³ Jemanɛ nɛ bumo be basa beeŋ wu n dese abeebi nɛ abeegboŋ be awɔlto nɛ ndibi gboŋ be yiri nɛ a la bumo be agbirana be eshuŋkpaana nɛ baa chɔɔ duwu a sa bumo be agbirana kikɛ be afito na nɛ baaŋ pin fanɛ ma e la Enyɛnpetale Ebɔrɛ na.

¹⁴ Kashenteŋto, meeŋ yili Keshishɛrsawule nɛ k wɔ kelargato be kaseto na m ba choŋ kade nɛ baa tre Dibla nɛ k wɔ kelargato be esoso be kaba so na m mur efuli na kikɛ,. Meeŋ mur kaplɛkama nɛ Israɛl be basa tase. Ndoŋ nɛ baaŋ pin fanɛ ma e la Enyɛnpe Ebɔrɛ na.”