Ezikɛl 5 - EBƆRƐ BE KAWƆL

Jerusalɛm ka beeŋ Mur be asheŋ

¹ Asheŋ ere be kaman nɛ Enyɛnpe Ebɔrɛ na kaŋɛ: “Dimɛdi pibi, Ezikɛl, ta bɔrfɔ nɛ k bee ji n she fo kumu nɛ fo katɔl. Kumo be kaman nɛ fo ta kusɔ nɛ b kɔ a karga asɔ be egbɛ na m barga emin na to ntuŋ asa.

² Jemanɛ nɛ fo kre kena ŋ kulti Jerusalɛm be foto nɛ fo wora n deŋi kejembu paŋgelambi na so na kaŋ fo ekar, nɛ fo chɔɔ emin na be katuŋ koŋwule kade nɛ fo wora kumo be foto na to, nseŋ ta bɔrfɔ na ŋ kuya emin na be katuŋ nyɔsopo to ŋ kulti kade na. Kumo be kaman nɛ fo ta katuŋ sasopo na n lɛ esoso nɛ ŋ gbagba e ta ma tokobi ŋ kuya amo to.

³ Ama pɔɛŋ nɛ fo wora loŋ fo lara emin na be gbrɛbi n da fo piŋi be kɔnɔ.

⁴ Nseŋ lara amo be gbrɛbi n chɔɔ edɛ to a ŋini fanɛ edɛ beeŋ shi ndoŋ n suse m mur ekama Israɛl be efuli so.”

⁵ Kumo be kaman nɛ Enyɛnpe Ebɔrɛ na naŋ kaŋɛ: “Jerusalɛm nɛ n ta n yili durnya kikɛ be nferinto nɛ efuliana kulti kumo ŋ wɔtɔ a keni kumo a yɛlga nna na.

⁶ Ama Jerusalɛm to be basa lar ma kaman nseŋ kini kewora m bɛ ma mbraana nɛ ma atande so. B kplaŋ ma mbraana so nsaa wora alubi a chɔ efuliana nɛ a kulti bumo na gba.

⁷ Amoso kusɔ nɛ Enyɛnpe Ebɔrɛ na bee kaŋɛ Jerusalɛm be basa e la fanɛ, men kini kenu m bɛ ma mbraana nɛ ma atande so nseŋ ya ka bɛ efuliana nɛ e kulti menyi na be mbraana so. Men be ŋgbene ki kpakpa a chɔ bumo gba!

⁸ Amoso, ma Enyɛnpetale Ebɔrɛ na e kaŋɛ menyi na fanɛ ŋ ki menyi, Jerusalɛm to be basa, be edoŋ nna na. Meeŋ gberge menyi kusoe nɛ efuliana na kikɛ e wu kumo.

⁹ Ŋkpal menyi be agbirana nɛ ŋ kishi ga ere kikɛ so, meeŋ wora menyi kusɔ nɛ m maŋ naŋ wora kikɛ, ma alɛ m maaŋ naŋ wora kumo kikɛ.

¹⁰ Bekurgepo beeŋ kpal akoŋ so a mɔ bumo be mbia a we nɛ mbia e baa mɔ bumo bekurgepoana a we. Meeŋ gberge menyi kusoe hale nɛ bekama nɛ baaŋ ji efute gba na e pesaŋ to n yɔ mboŋ wɔfɔ.

¹¹ Ma, Enyɛnpetale Ebɔrɛ na, e naa bɔ ntaŋ a kaŋɛ fanɛ, ŋkpal men ka ta menyi be agbirana nɛ aworbi lubiana n shin nɛ ma bɔrɛlambu ki kakpa nɛ esa maaŋ naŋ tiŋ n shuŋ ma ndoŋ so, m maaŋ wu menyi kuwɔr ŋko n shu menyi so ŋko n shin nɛ men nya menyi be amu n ya ji kikɛ.

¹² Menyi to be ntuŋ asa to be katuŋ koŋwule beeŋ wu ŋkpal alɔ nɛ akoŋ so ashi Jerusalɛm to, nɛ katuŋ nyɔsopo e wu kena to. Katuŋ sasopo malɛ beeŋ pesaŋ to n sɔ kaplɛkama a shile nɛ n ta tokobi m bɛ bumo so a mɔ.

¹³ Menyeeŋ ji awurfoŋ ga pɔɛŋ nɛ ma agbo e wushi. Ndoŋ nɛ menyeeŋ pin fanɛ kenishipereso nɛ ma, Enyɛnpe Ebɔrɛ na, daa malga menyi be asheŋ lubi be asheŋ na.

¹⁴ Ma alɛ beeŋ shin nɛ Jerusalɛm e ki kelambure nɛ kemɔmɔshia be kade n sa efuliana nɛ a kulti kumo na nɛ bekama nɛ baaŋ bɔla ndoŋ a choŋ kikɛ.

¹⁵ Menyeeŋ ki kemɔmɔshia nɛ katege be kusɔ nsaa la kefiɛso n sa efuliana nɛ a kulti menyi na nɛ menyi be asheŋ a chinchiŋ bumo.

¹⁶ Ma alɛ beeŋ naŋ shin nɛ akoŋ e mɔ menyi fanɛ b ka to menyi atanyembi m mɔ na. Kashenteŋto, meeŋ mur menyi be adɔjibi nɛ akoŋgboŋ a tɔr menyi so.

¹⁷ Akoŋ nɛ kupuŋ to be asɔbɔya beeŋ ba mur menyi be mbia nɛ men ki begbentepo. Meeŋ bɔla alɔ mɔso so nɛ men doŋana be kemɔ menyi so ŋ gberge menyi kusoe. Ma, Enyɛnpe Ebɔrɛ e kaŋɛ na.”