Ezikɛl 4 - EBƆRƐ BE KAWƆL

Ezikɛl ka wora epel n ŋini kusɔ nɛ k beeŋ wora Jerusalɛm be asheŋ

¹ Nɛ Ebɔrɛ kaŋɛ le: “Dimɛdi pibi Ezikɛl, ta ebɔ be kuboo paŋgelambi n nase fo anishito nseŋ wora kadegboŋ nɛ baa tre Jerusalɛm na be foto n deŋi kumo so.

² Kumo be kaman nɛ fo wora asɔ ŋ kulti kumo fanɛ b ka kre kena ŋ kulti kumo n wɔtɔ na. Gbare shishɛr n deŋi abar so m mata kumo be egbal nɛ k kulti kumo na fanɛ kananɛ benapo beeŋ wora n dii so n luri kade to na, nseŋ wora ndibi gbɛgbɛso nɛ baaŋ ta n da egbal na n futi na nseŋ wora benapo be keeyi to be efoto m mata ebɔ be kuboo paŋgelambi na.

³ Ade kikɛ be kaman nɛ fo ta kebɛlso paŋgelambi ŋ kuŋ fo nɛ foto nɛ fo wora n deŋi kuboo na so na be nferinto fanɛ kebɛlso be egbal na, nseŋ kilgi fo anishito n shoŋi kebɛlso paŋgelambi na, nɛ k duli fanɛ fo kre kena nna ŋ kulti kade na n wɔtɔ. Kede beeŋ ba la tɔɔnɛ n sa Israɛl be basa na.

^4-5 Ade be kaman nɛ fo dese fo bena so nchɛ alfa asa nɛ adekpanu a ŋini fanɛ Israɛl be basa beeŋ luri kasogberge to nfɛ alfa asa nɛ adekpanu. Kachɛ koŋwule kama yili nna n sa bumo be kafɛ koŋwule be awurfoŋ nɛ baaŋ ji na.

⁶ Kumo be kaman nɛ fo naŋ kilgi n dese fo jisoso malɛ nchɛ adena, a ŋini Juda be basa malɛ be kasogberge nɛ baaŋ nya. Kachɛ koŋwule kama yili n sa kafɛ koŋwule be awurfoŋ nɛ baaŋ ji nna.

⁷ Ade be kaman nɛ fo kilgi fo anishi n shoŋi Jerusalɛm be foto nɛ fo wora na, nseŋ bɔɔ fo enɔ to a malga a teŋi a ŋini kumo a kaŋɛ kusɔ nɛ Ebɔrɛ kaŋɛ fanɛ k beeŋ wora kumo na.

⁸ Ama meeŋ ta efɔl ŋ kre fo nɛ fo maaŋ tiŋ ŋ kilgi kikɛ hale n ya fo jemanɛ nɛ kena nɛ fo kre ŋ kulti kade na ka beeŋ ba ekar.

⁹ Kumo be kaman nɛ Ebɔrɛ naŋ kaŋɛ: ‘Ta aboyu nɛ shiŋkafa nɛ chɛbɛ fuful nɛ a peper nɛ adurbi nɛ atuwe peper n wea abar to n wɔtɔ kusɔ koŋwule to, nsaa jɔ amo a wora fo ajibi. Amo e naaŋ baa la fo kusɔ jiso nchɛ alfa asa nɛ adekpanu nɛ feeŋ baa dese kekilso na.

¹⁰ Feeŋ baa jɔ amo gbrɛgbrɛbi nna a wora ajibi kachɛ kama a ji,

¹¹ nsaa nuu nchu malɛ kawiebi nuunchu be ebɔlɔ anyɔ anyɔ kachɛ kama.

¹² Feeŋ baa ta dimɛdi be ebin wɔlso nna a puga edɛ a daŋɛ ajibi na kelɔnɛ so, kakpa nɛ esa kama beeŋ wu fo.’ ”

¹³ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Kede bee ŋini kananɛ Israɛl be basa beeŋ ji ajibi nɛ baa kishi jemanɛ nɛ meeŋ pesaŋ bumo to n yɔ efuli pɔtɛana so na nna.”

¹⁴ Nɛ ma alɛ kaŋɛ Enyɛnpetale Ebɔrɛ le: “Loŋ maaŋ wora, ŋkpal manɛ so, m maŋ naŋ ji ma ekishi n jija ma kumu kikɛ. Yili ma kebia to kikɛ, m maŋ naŋ ji kusɔ wuso ŋko kusɔ nɛ kusɔbɔya pɛ n ji ŋ ka kikɛ. Ajibi nɛ a maŋ walɛ so maŋ naŋ luri ma kɔnɔ kikɛ.”

¹⁵ Ndoŋ nna nɛ Enyɛnpe Ebɔrɛ na kaŋɛ ma: “K nyalɛ, meeŋ shin nɛ fo ta anabin wɔlso mannɛ dimɛdi be ebin m puga edɛ nna ŋ daŋɛ fo ajibi na.”

¹⁶ Kumo be kaman nɛ e kaŋɛ ma: “Dimɛdi pibi, meeŋ shin nɛ akoŋ a tɔr Jerusalɛm be basa so nɛ ajibi be asheŋ a ki kpakpa ga n sa bumo nɛ b ta kafɔŋ nɛ kagbene jija a karga ajibi nɛ nchu nuuso a sa abar,

¹⁷ ŋkpal manɛ so, ajibi nɛ nchu be asheŋ beeŋ ki kpakpa. Kusɔ nɛ k beeŋ wora na beeŋ chinchiŋ bumo hale nɛ b baa chicha. Ekama beeŋ foe eyur to hale n ya wu ŋkpal bumo be alubi so.”