Ezikɛl 3 - EBƆRƐ BE KAWƆL

¹ Ndoŋ nna nɛ Enyɛnpe Ebɔrɛ na naŋ kaŋɛ ma le: “Dimɛdi pibi, Ezikɛl, ta kawɔl sibɛso ere n ji fanɛ ajibi nseŋ yɔ n ya malga Israɛl be basa na kutɔ.”

² Nɛ m bugi kɔnɔ nɛ e ta kawɔl sibɛso na n sa ma fanɛ n ji.

³ Kumo be kaman nɛ e kaŋɛ ma: “Dimɛdi pibi, ta kawɔl sibɛso nɛ n sa fo ere n ji fanɛ ajibi m moɛ.” Nɛ n ta kumo n ji. K daa du belbel ma kɔnɔ to nna fanɛ mushoŋ.

⁴ Ndoŋ nna nɛ Enyɛnpe Ebɔrɛ na naŋ kaŋɛ ma: “Dimɛdi pibi, naniere yɔ Israɛl be basa na kutɔ n ya kaŋɛ bumo kusɔ kama nɛ meeŋ kaŋɛ fo.

⁵ Mannɛ efuli pɔtɛ so be basa nɛ bumo ŋgbar kɔr nsaa du kpakpa n sa fo kutɔ nɛ mee shuŋi fo, ama Israɛl be basa kutɔ.

⁶ N daŋ shuŋi fo efuligboŋ pɔtɛ be basa nɛ baa gbar ŋgbar nɛ a du kpakpa nɛ fo tiŋ m pin amo to gba, baaŋ nu n sa fo.

⁷ Ama Israɛl be basa ere maŋ wora shiriya nɛ b nu n sa fo, ŋkpal manɛ so b maŋ wora shiriya nɛ b nu n sa ma so. Bumo kikɛ la kusoe kpakpaso nɛ kumu kpakpaso be basa nna.

⁸ Ŋkpal loŋ so, meeŋ shin nɛ fo kusoe nɛ kagbene e baa du kpakpa fanɛ bumo peya.

⁹ Ma alɛ beeŋ naŋ shin nɛ fo kumu e ki kpakpa fanɛ kejembu kpakpaso nɛ k du kpakpa a chɔ kewarbi. Amoso, sa maa ŋana bumo ŋko n shin nɛ bumo be asheŋ e baa da fo kufu, ŋkpal b ka la basa nɛ b kini ma nseŋ pal kaman n sa ma so.”

¹⁰ Kede be kaman nɛ Enyɛnpe Ebɔrɛ na naŋ kaŋɛ: “Dimɛdi pibi, kaŋ kusoe n nu kusɔ nɛ mee kaŋɛ fo ere nɛnɛ nseŋ fɛ kumo be nfɛra.

¹¹ To, yɔ fo kurgepoana nɛ b pɛ menyi kikɛ n yɔ Babilɔn be efuli so na kutɔ n ya kaŋɛ bumo kusɔ nɛ ma, Enyɛnpetale Ebɔrɛ na kaŋɛ. Baaŋ nu ŋko b maaŋ nu, fo ere e ya kaŋɛ bumo.”

¹² Ndoŋ nna nɛ Ebɔrɛ be Kiyoyu maŋ ma so n yɔ esoso, nɛ n nu ebɔl ko ka bee ponte awɔrso fanɛ bɔrɛ ka ponte na ma kaman to a kaŋɛ le: “Enyɛnpe Ebɔrɛ na be kemaŋkura e baa nya bunyaŋ ashi ebɔrɛso!”

¹³ Kumo be kaman nɛ n nu asɔbɔya keniso na be mbuibi be aba na ka bee fe abar nɛ asɔ kulkulso fanɛ cheche be aya nɛ a mata bumo na ka bee gbri fanɛ bɔrɛ ka bee ponte na.

¹⁴ Ndoŋ nna nɛ Ebɔrɛ be Kiyoyu na naŋ ta ma, nɛ Enyɛnpe Ebɔrɛ na be eleŋ gbelge ma so ga nɛ ma kagbene kaa nɛ n nya agbo.

¹⁵ Kumo be kaman nɛ m ba kakpa nɛ basa nɛ b pɛ anya n yɔ efuli pɔtɛ so na wɔ na ashi kebeebi nɛ baa tre ‘Tɛl Abib’ nɛ k dese m mata Lɔr nɛ baa tre Kɛba na ase na n ya tu bumo n chena nchɛ ashunu. Kusɔ nɛ n wu nseŋ nu ndoŋ na daŋ chinchiŋ ma nna.

Enyɛnpe Ebɔrɛ ka ta Ezikɛl ŋ ki ekenipo be asheŋ

¹⁶ Nchɛ ashunu na be kaman, nɛ Enyɛnpe Ebɔrɛ na kaŋɛ ma le:

¹⁷ “Dimɛdi pibi, n lara fo nna nɛ fo baa keni Israɛl be basa so. Amoso nu kamalga nɛ ŋ kɔ nɛ n sa bumo ere nseŋ fɛa bumo so.

¹⁸ Nɛ m baŋ kaŋɛ kumu kpakpasowura fanɛ e beeŋ wu ŋkpal mbe be alubi so, nɛ fo maaŋ fɛa mo so ŋko ji mo asoe to nɛ e lar asheŋ lubi na to m mɔlga mbe kumu, e beeŋ wu ŋkpal mbe alubi so, ama mbe luwu na be turju beeŋ baa bɛ fo.

¹⁹ Ama nɛ fo fɛa mo so nɛ e kini kelar mbe asheŋ lubi na to, e beeŋ wu ŋkpal mbe alubi so, ama fo ere beeŋ nya fo kumu.

²⁰ Kede be kaman, nɛ esa nɛ e bee wora alelasheŋ yige alelasheŋ be kewora nsaa wora alubi, nɛ n shin nɛ e luri kebaawɔtɔ kpakpaso ko to, nɛ fo maŋ fɛa mo so, e beeŋ wu ŋkpal mbe alubi so. M maaŋ nyiŋi mbe alelasheŋ nɛ e wora na be kukoŋwule gba. Ma alɛ beeŋ ta mbe luwu na m bɛ fo.

²¹ Ama nɛ fo fɛa mo so nɛ e yige alubi be kewora bre, e beeŋ ji efute ŋkpal e ka nu n sa fo so, nɛ fo alɛ e nya fo kumu.”

Ezikɛl ka maŋ tiŋ m malga be asheŋ

²² Kumo be kaman nɛ Enyɛnpe Ebɔrɛ na be eleŋgboŋ na ba ma so, nɛ e kaŋɛ ma: “Koso n yɔ ketaŋɛ to nɛ n ya kaŋɛ fo kusɔ ko ndoŋ.”

²³ Ndoŋ nna nɛ ŋ koso n yɔ ketaŋɛ na to nseŋ ya wu fanɛ Enyɛnpe Ebɔrɛ na be kemaŋkura sɔ kaplɛkama, fanɛ kumo nɛ n daŋ wu ashi Lɔr nɛ baa tre Kɛba ase na, nɛ n ta enɔ m buu anishi so nseŋ tɔr epun so.

²⁴ Nɛ Enyɛnpe Ebɔrɛ na be Kiyoyu ba pɛ ma to ŋ niŋi to n yili nseŋ kaŋɛ ma le: “Yɔ epe n ya ti fo kumu so n wɔtɔ fo ebu to.

²⁵ Basa beeŋ ta efɔl ŋ kre fo n nase nɛ fo maaŋ nya n lar kowu n yɔ basa to.

²⁶ Ma alɛ beeŋ shin nɛ fo ki neemu a maaŋ naŋ tiŋ m malga n fɛa basa nɛ b kini ma nseŋ pal kaman n sa ma ere so.

²⁷ Ama kachɛ nɛ meeŋ malga fo kutɔ na kaŋ fo, meeŋ bugi fo kɔnɔ nɛ fo malga bumo kutɔ saŋɛ na so feeŋ kaŋɛ bumo kusɔ nɛ ma, Enyɛnpetale Ebɔrɛ na kaŋɛ. Beko beeŋ nu nɛ beko malɛ e kini kenu, ŋkpal manɛ so, b la basa nɛ b kini ma nseŋ pal kaman n sa ma nna.”