Ezikɛl 2 - EBƆRƐ BE KAWƆL

Enyɛnpe Ebɔrɛ ka tre Ezikɛl be asheŋ

¹ Ndoŋ nna nɛ ebɔl na kaŋɛ ma le: “Dimɛdi pibi, Ezikɛl, koso n yili. Mee sha kemalga fo kutɔ nna.”

² Ebɔl na ka bee malga na nɛ Ebɔrɛ be Kiyoyu ba ma so n shin nɛ ŋ koso n yili nɛ k kaŋɛ le:

³ “Dimɛdi pibi, mee shuŋi fo Israɛl be basa kutɔ nna. Ŋkpal manɛ so, kananɛ bumo tutoana kikɛ daŋ pal kaman n sa ma nseŋ kini kenu n sa ma na nɛ bumo alɛ gba bee wora hale nɛ mbre na.

⁴ Basa nɛ mee shuŋi fo bumo kutɔ ere la ŋgbene kpakpaso nɛ kusoe kpakpa be basa nɛ b maa sa ma bunyaŋ nna. Ya kaŋɛ bumo kusɔ nɛ ma, Enyɛnpetale Ebɔrɛ na kaŋɛ.

⁵ B kaŋ nu n sa fo ŋko ŋ kini kenu n sa fo ŋkpal b ka la ŋgbene kpakpaso be basa so gba baaŋ pin fanɛ anebi ko ba bumo kutɔ m ba malga bre.

⁶ Ama fo ere, dimɛdi pibi, sa maa ŋana bumo ŋko bumo be mmalga. Sa maa lɔ kufu ŋkpal b ka beeŋ kplaŋ fo so nseŋ wora fo yɛryɛrbi so. K beeŋ baa du fanɛ fo ka wɔ ewi to ŋko nna to nna. Ama sa maa ŋana basa nɛ b kini ma nseŋ pal kaman n sa ma na ŋko n shin nɛ b baa ta kufu a da fo.

⁷ Ma mmalga a daga fanɛ fo malga n sa bumo. Baaŋ nu ŋko b maaŋ nu, fo ere e malga n sa bumo. Baa nyiŋi fanɛ b la basa nɛ b kini ma nseŋ pal kaman n sa ma nna.

⁸ Ama fo ere, dimɛdi pibi, nu kusɔ nɛ mee kaŋɛ fo ere, nsaa maŋ kini ma m pal kaman n sa ma fanɛ bumo. Amoso bugi kɔnɔ n sɔ kusɔ nɛ mee sa fo ere n ji fanɛ ajibi.”

⁹ Ndoŋ nna nɛ ŋ keni nseŋ wu enɔ nɛ kawɔl sibɛso ko bɔɔ to a wɔ enɔ na to nɛ k teŋi n shoŋi ma.

¹⁰ Ndoŋ nna nɛ enɔ na bugi kawɔl sibɛso na to nɛ n wu fanɛ kushu nɛ kagbene jija be yiri kikɛ be asheŋ nɛ b sibɛ n deŋi kumo be mba anyɔ na kikɛ so.