Ezikɛl 10 - EBƆRƐ BE KAWƆL

Enyɛnpe Ebɔrɛ be kemaŋkura ka lar bɔrɛlambu na to be asheŋ

¹ Asheŋ na be kaman nɛ ŋ keni kuwɔlpa nɛ k sha asɔbɔya keniso na be amu so, nseŋ wu kusɔ ko fanɛ kuwurputi nɛ b ta yawu kpakpaso be kejembu lela nɛ baa tre saffai na n lɔŋɛ.

² Nɛ Enyɛnpe Ebɔrɛ na kaŋɛ kanyɛn nɛ e buu piŋi lela na le: “Ya lara ajanwulɛ nɛ a kɔ edɛ ashi asɔ kulkulso nɛ a du fanɛ cheche be aya a wɔ asɔbɔya keniso na be akel to na n ya fari Jerusalɛm be kadegboŋ na kikɛ to.” Ndoŋ nna nɛ mee keni mo nɛ e bee yɔ.

³ Jemanɛ nɛ kanyɛn na bee yɔ na nɛ asɔbɔya keniso na yil a laŋɛ bɔrɛlambu na be kelargato be kaseto na nna, nɛ kuwɔlpa buu bɔrɛlambu na be epunto be kelɔnɛ na kikɛ so.

⁴ Ndoŋ nna nɛ Enyɛnpe Ebɔrɛ na be kemaŋkura shi asɔbɔya keniso na be amu so n yɔ bɔrɛlambu na be kabuna to nɛ kuwɔlpa na sɔ bɔrɛlambu na to kikɛ nɛ Enyɛnpe Ebɔrɛ na be kemaŋkura shin nɛ kelɔnɛ na kikɛ to fulto parr.

⁵ Esa nɛ e daa wɔ bɔrɛlambu na be kowushina be kelɔnɛ na gba so daa nu asɔbɔya keniso na be mbuibi be aba be egbri, ŋkpal manɛ so, a daa gbri nna fanɛ Enyɛnpetale Ebɔrɛ be ebɔl na.

⁶ Enyɛnpe Ebɔrɛ ka kaŋɛ kanyɛn nɛ e daŋ buu piŋi lela na fanɛ e ya lara ajanwulɛ ashi asɔ kulkulso nɛ a du fanɛ cheche be aya m mata asɔbɔya keniso na ase nɛ kanyɛn na ya yili m mata aya kulkulso na be kuko.

⁷ Ndoŋ nna nɛ asɔbɔya keniso na be ekoŋwule teŋi enɔ n shoŋi edɛ nɛ a dese bumo be nferinto na nseŋ lara ako n wɔtɔ kanyɛn na be enɔ to nɛ mo alɛ ta n lar n choŋ.

⁸ Kumo be kaman nɛ n naŋ wu fanɛ asɔbɔya keniso na be kekama daa kɔ kusɔ ko fanɛ dimɛdi be enɔ bumo be mbuibi be aba na be kekama be kaseto.

⁹ Nɛ n naŋ keni n wu fanɛ aya kulkulso ana mata asɔbɔya keniso na nsaa nyɛkpɛ fanɛ yawu kpakpaso be ajembu nyɛkpɛso na.

¹⁰ Aya kulkulso ana na kikɛ duli abar nna nɛ kekama malɛ kɔ keya nyɔsopo nɛ k larga kumo to,

¹¹ saŋɛ na so asɔbɔya keniso na baa yɔ kaplɛkama aya kulkulso na maŋ naa kilgi. Bumo be aya na kikɛ beeŋ tiŋ n yɔ kaplɛkama nɛ a maŋ kilgi.

¹² Anishi daa wɔ asɔbɔya keniso na be eyur so kikɛ nna. Bumo be mman nɛ mbre nɛ mbuibi be aba so nɛ aya kulkulso ana na gba kikɛ so daa kɔ anishi nna.

¹³ Ndoŋ nna nɛ n nu ebɔl ko kaa bee kaŋɛ le: “Aya kulkulso nɛ a bee yili kapa koŋwule a kilgi to nde.”

¹⁴ Asɔbɔya keniso na be ekama daa kɔ anishiakpa ana nna. Bumo be anishito daa la dimɛdi be anishiakpa nna nɛ bumo be jisoso daa la buluŋ be anishiakpa nɛ bumo be bena so la gbolu be anishiakpa nɛ bumo be kaman to daa la kusore be anishiakpa.

¹⁵ Asɔbɔya keniso nɛ n daŋ wu Lɔr nɛ baa tre Kɛba ase na gbagba e daa la bumo. B ka koso n firgi n yɔ awɔlto,

¹⁶ nɛ aya kulkulso na gba bɛ so. Jemanɛ kikɛ nɛ asɔbɔya keniso na baaŋ parga aba to a firgi, aya kulkulso na wɔ bumo be akel to nna.

¹⁷ Nɛ asɔbɔya keniso na baaŋ yili aya na gba bee yili epul na to nna. Nɛ b baŋ naŋ koso malɛ amo alɛ gba bee koso nna, ŋkpal manɛ so, asɔbɔya keniso na e naa keta amo a wora asheŋ.

¹⁸ Ndoŋ nna nɛ Enyɛnpe Ebɔrɛ na be kemaŋkura lar bɔrɛlambu na be kabuna ase n ya buu asɔbɔya keniso na be amu so.

¹⁹ Ŋ ka keni nɛ n wu asɔbɔya keniso na ka parga bumo be aba to ŋ koso kasawule a firgi nɛ aya kulkulso na tu bumo a yɔ. B ka ya fo bɔrɛlambu na be kabuna nɛ k wɔ epeŋilarkpa be kaba so na nɛ b shir n yili gbrɛ, nɛ Israɛl be Ebɔrɛ na be kemaŋkura kraa buu bumo so.

²⁰ Ndoŋ nna nɛ m pin geeŋ fanɛ asɔbɔya keniso ere nɛ n daŋ wu Israɛl be Ebɔrɛ na be kaseto na ashi Kɛba be lɔr ase na.

²¹ Bumo be ekama daa kɔ anishiakpa ana ana nɛ mbuibi be aba ana ana nna, nɛ bumo be aba na be kekama malɛ be kaseto daa kɔ kusɔ ko fanɛ dimɛdi be enɔ.

²² Bumo alɛ be anishiakpa daa du fanɛ amo nɛ n wu Kɛba be lɔr ase na gbagba nna. Ekama malɛ baaŋ niŋi nna a yɔ a maŋ naa kilgi.