Ezikɛl 1 - EBƆRƐ BE KAWƆL

Ezikɛl ka wu Enyɛnpetale Ebɔrɛ be kemaŋkura be asheŋ

^1-3 Ma ketre e la Ezikɛl nɛ n la bɔrɛmatapo nsaa la kanyɛn nɛ baa tre Buzi na pibinyɛn. B ka pɛ Juda be ewura nɛ baa tre Jehowachin nseŋ tintiŋ mo n yɔ Babilɔn be efuli so na be kafɛ nusopo to nɛ ma nɛ bumo nɛ b pɛ n ti mo so n yɔ na daa wɔ lɔr nɛ baa tre Kɛba na ase. Ma nfɛ adesa to be kufɔl nasopo to be kachɛ nusopo na nɛ Enyɛnpe Ebɔrɛ na be kubɔya ba ma kutɔ nɛ esoso bugi n shin nɛ ŋ ku bɔrɛdare ere.

⁴ Ndoŋ nna nɛ ŋ keni esoso n wu bɔrɛ be afugboŋ ko ka shi kelargato be esoso be kaba so a ba. Bɔrɛ daa nyɛkpɛ kuwɔlpagboŋ ko to nna nɛ esoso kikɛ fulto. Edɛ daa lar kuwɔlpagboŋ na be nferinto a nyɛkpɛ fanɛ danyaŋ nɛ k la kachɔnɔnyifu nɛ b fifɛa kumo so na nna.

⁵ Nɛ n wu asɔbɔya keniso ana ko nɛ b du fanɛ edimɛdi ashi edɛ na be nferinto.

⁶ Bumo be ekama daa kɔ anishito ana nɛ mbuibi be aba ana ana nna.

⁷ Bumo be aya daa maŋ kɔ echɛkpa amo alɛ nsaa kɔ alotobi fanɛ kenabi na. Alotobi na daa kpa edɛ nna fanɛ danyaŋ nɛ b fifɛa so nɛ k bee nyɛkpɛ so na.

⁸ Asɔbɔya keniso na be ekama daa kɔ dimɛdi be enɔ nna ashi mbe aba ana na be kekama be kaseto.

⁹ B daŋ pal kaman nna n sa abar nseŋ parga bumo be aba na be anyɔ anyɔ to nɛ amo be nnɔso pɛ abar. Kaplɛkama malɛ nɛ baa yɔ, b pɛ abar to loŋ nna a yɔ, b maa kilgi bumo be eyurana.

¹⁰ Anishito ana nɛ ekama kɔ na malɛ daa kɔr abar to nna. Bumo be anishito be kaba so daa la dimɛdi be anishito nna, nɛ jisoso be kaba so la buluŋ be anishito, nɛ bena so la gbolu be anishito nɛ kaman malɛ peya na la kusore be anishito.

¹¹ Asɔbɔya keniso na daŋ parga bumo be aba na be anyɔ anyɔ to nna nɛ a beta bumo braana nɛ b wɔ bumo be jisoso nɛ bena so na peya, nseŋ parga anyɔ anyɔ nɛ a ka malɛ to m buu bumo be eyurana so.

¹² Bumo be ekama be anishito daa keni mba ana na kikɛ nna, amoso bumo kikɛ beeŋ tiŋ m pɛ abar to n yɔ kaba kama so nɛ b maŋ kilgi.

¹³ Asɔbɔya keniso na daa du fanɛ mbulpi nɛ a bee suse nna a nite saŋkikɛ, nsaa nyɛrga a kpa edɛ fanɛ bɔrɛ ka bee nyɛkpɛ na.

¹⁴ Bumo alɛ daa yɔ anishito nsaa bɛta kaman manaŋ manaŋ nna fanɛ bɔrɛ ka bee nyɛkpɛ na.

¹⁵ Ŋ ka bee keni asɔbɔya keniso ana na nɛ n wu fanɛ bumo be ekama kɔ kusɔ kulkulso fanɛ cheche be keya nɛ k yil kasawule nna m mata mo.

¹⁶ Aya kulkulso ana na kikɛ daŋ duli abar nna nsaa kpa edɛ fanɛ yawu kpakpaso be ajembu nyɛkpɛso na, nɛ amo be kekama malɛ kɔ keya kulkulso nyɔsopo nɛ k kilgi n larga to ashi kumo be nferinto,

¹⁷ saŋɛ na so aya kulkulso na gba beeŋ tiŋ a yɔ anishito ŋko a bɛta kaman, ŋko a yɔ bena so ŋko jisoso nɛ a maŋ kilgi.

¹⁸ Abɛlso kulkulso nɛ a wɔ asɔbɔya keniso na be aya kulkulso fanɛ cheche be aya na to na daa kɔ anishi ŋ kulti amo be kaplɛkama.

¹⁹ Asɔbɔya keniso ana na baa yɔ kaplɛkama, aya kulkulso nɛ a mata bumo na gba bee yɔ ndoŋ nna, nɛ b baa firgi, aya na gba bee firgi nna.

²⁰ Kaplɛkama nɛ asɔbɔya keniso na daa sha keyɔ baa yɔ nna nɛ bumo be aya kulkulso na e tu bumo a yɔ, ŋkpal manɛ so, asɔbɔya keniso na e naa keta aya na a ashuŋ.

²¹ Ŋkpal loŋ so, jemanɛ kikɛ nɛ asɔbɔya keniso na bee nite ŋko n yili ŋko a firgi gba nna, aya kulkulso na gba bee wora loŋ gbagba nna, ŋkpal manɛ so, asɔbɔya keniso na e naa keta amo a shuŋ.

²² Kede be kaman nɛ n wu kusɔ ko nɛ k bee nyɛkpɛ fanɛ jɛrbi nsaa du le joŋgroŋ ka salga n sɔ awɔlto ashi asɔbɔya keniso ana na be amu so fanɛ kuwɔlpa na.

²³ Asɔbɔya keniso ana na daa yil kuwɔlpa na be kaseto nna nseŋ parga bumo be mbuibi be aba ana na to be anyɔ nyɔ to n ya pɛ bumo braana peya to; nseŋ ta anyɔ anyɔ nɛ a ka malɛ m parga to m buu bumo be eyurana so.

²⁴ Asɔbɔya keniso na ka koso m bri aba to a firgi, nɛ n nu egbri fanɛ teku so be kewawa na, ŋko benapo damta ka na aya so na ŋko Enyɛnpetale Ebɔrɛ be ebɔl na. B ka ya yili nɛ b bra bumo be mbuibi be aba na m buu bumo be eyurana so.

²⁵ Jemanɛ nɛ b maŋ naa firgi nseŋ bela bumo be aba m buu eyurana so a yil na, nɛ n nu egbri ko ka shi kuwɔlpa nɛ k wɔ asɔbɔya keniso ana na be amu so na be awɔlto m ba.

²⁶ Ndoŋ nna nɛ ŋ wu kusɔ ko fanɛ kuwurputi nɛ b ta yawu kpakpaso be kejembu lela nɛ baa tre ‘Saffai’ na n lɔŋɛ, nseŋ naŋ wu esa ko ka duli dimɛdi nɛ e tase kuwurputi na so.

²⁷ Nɛ yili mbe kashɛr ase a yɔ mbe kumu ase du fanɛ danyaŋ nɛ k wɔ edɛ be nferinto na nɛ mbe kashɛr ase a yɔ mbe aya ase malɛ du fanɛ edɛ be adondulombi. Kakpa kikɛ daŋ fulto parr nna ŋ kulti mo

²⁸ fanɛ kananɛ bɔrɛ bee mɔl nɛ kabɔrɛnyaŋgelambi bee lar kuwɔlpa so a fulto na. Ndoŋ nna nɛ m pin fanɛ Enyɛnpe Ebɔrɛ na be kemaŋkura nɛ n wu na nseŋ ta enɔ m buu anishi so epul na to ŋ tɔr epun so. Kumo be kaman nɛ n nu ebɔl ko ka bee malga ma kutɔ.