Ditɛronɔmi 7 - EBƆRƐ BE KAWƆL

Enyɛnpe Ebɔrɛ na be basa gbagba be asheŋ

¹ Ndoŋ nna nɛ Mosis naŋ kaŋɛ: “Israɛlebi, Enyɛnpe menyi be Ebɔrɛ na beeŋ chɛ menyi to nɛ men suge Hitebi nɛ Giigashebi nɛ Amɔriebi nɛ Keenanebi nɛ Pɛrizebi nɛ Hivebi nɛ Jebusiebi be nsawule. Efuli ashunu ere be kekama be basa shibi nsaa kɔ eleŋ a chɔ menyi Israɛlebi, ama nɛ men kre kena n ya tu bumo,

² Enyɛnpe Ebɔrɛ na beeŋ tintiŋ bumo n lar kasawule na so, nɛ menyi alɛ e mur bumo cheche nsaa maŋ wu bumo kuwɔr. Menyi alɛ nɛ bumo e sa maŋ kaa wora kayurwushi be kɔnɔkoŋwule be ŋkre kikɛ.

³ Menyi nɛ menyi be mbia nɛ bumo be ekama e sa maŋ kaa luri kakil to.

⁴ Nɛ mannɛ aloŋ baaŋ lara menyi be mbia ashi kushuŋ Enyɛnpe Ebɔrɛ na to n ya wɔtɔ agbir be kushuŋ to. Kumo loŋ malɛ beeŋ shin nɛ Enyɛnpe Ebɔrɛ na e nya agbo ga n wɔtɔ menyi nseŋ mur menyi epul to.

⁵ Amoso nɛ men kaŋ kɔ m pɔɔ efuliana na so, men bure m bure bumo be agbirsure nɛ agbirjembu nseŋ ku kegbir cheso nɛ baa tre Ashira na be ndibi nɛ b yuu a shuŋ mo na n lɛ. Kumo be kaman nɛ men chɔɔ bumo be agbirana na m mur.

⁶ A daga fanɛ men wora loŋ ŋkpal manɛ so, men la Enyɛnpe menyi be Ebɔrɛ na be basa gbagba nna. Efuli damtaana e wɔ durnya ere to, ama menyi Israɛl be basa nɛ e lara fanɛ men baa la mo gbagba be basa.

⁷ Enyɛnpe Ebɔrɛ na daŋ maŋ sha menyi nseŋ lara menyi nna ŋkpal men ka shi a chɔ basa kikɛ so. Menyi e daa la efuli nɛ k maŋ shibi n fo efuli kama so ashi durnya ere kikɛ to.

⁸ Ama Enyɛnpe Ebɔrɛ na lara menyi ŋkpal e ka bee sha menyi so nɛ ŋkpal e ka bee sha kewora m bɔlɔ mbe kɔnɔ naseso nɛ e nase n sa men nananyɛnana na so. Amoso nɛ e bɔla mbe eleŋgboŋ so n sɔ menyi n yige kenyaya to ashi Ijipt be efuli so na.

⁹ Ŋkpal loŋ so, men baa nyiŋi fanɛ Enyɛnpe menyi be Ebɔrɛ na nawule e la Kashenteŋ be Ebɔrɛ nsaa la Kashenteŋjipo. E beeŋ wora m bɛ mbe kɔnɔkoŋwule be ŋkre so nseŋ lara mbe kasha nɛ k maa loge na ŋ ŋini basa nɛ baa sha mo nsaa wora mbe mbraana kasonu na, yili kenana ko n ya fo kenana ko loŋ be kagboŋ so.

¹⁰ Ama e maa chɛr kegberge bumo nɛ b kishi mo na kusoe.

¹¹ Amoso men baa wora mbe mbraana nɛ keŋini nɛ n ta a sa menyi kabre ere kasonu.

Kasonu be enɛfa be asheŋ

¹² Nɛ men nu nseŋ wora mbraana ere kasonu kashenteŋto, Enyɛnpe menyi be Ebɔrɛ na beeŋ baa bɛ menyi nɛ mo be kɔnɔkoŋwule be ŋkre na so nseŋ ŋini menyi mbe kasha nɛ k maa loge na fanɛ kananɛ e nase men nananyɛnana kɔnɔ na.

¹³ Enyɛnpe menyi be Ebɔrɛ na beeŋ baa sha menyi nseŋ nɛfa menyi, saŋɛ na so menyeeŋ kurge mbia damta n salga to. Mo alɛ beeŋ naŋ nɛfa menyi be adɔsawule, saŋɛ na so, menyeeŋ nya ajibi damta nɛ yabra belbelso nɛ ɔlif be ŋku, nɛ menyi be ana nɛ mbolpɔ e kurge ga. Kasawule nɛ e nase kumo kɔnɔ n sa men nananyɛnana na so nɛ e beeŋ sa menyi enɛfa ere na.

¹⁴ Enyɛnpe Ebɔrɛ na beeŋ nɛfa menyi a chɔ efuli kama so be basa ashi durnya ere to. Menyi to be enyɛn ŋko eche kama maaŋ ki egbentepo. Menyi be kusɔbɔya kama malɛ maaŋ fir.

¹⁵ Enyɛnpe Ebɔrɛ na e naaŋ baa kuŋ menyi ashi alɔ kikɛ to nsaa maŋ shin nɛ alɔ lubi nɛ a daa tɔrɔ menyi ashi Ijipt be efuli so na e ba menyi so, ama e beeŋ shin nɛ a pɛ men doŋana kikɛ.

¹⁶ A daga fanɛ men mur efuli kama nɛ Enyɛnpe Ebɔrɛ na shin nɛ men pɔɔ kumo be basa so na cheche nsaa maŋ wu bumo kuwɔr. Men sa maŋ kaa shuŋ bumo be agbirana, ŋkpal manɛ so, loŋ beeŋ tiŋ m bar menyi luwu.

¹⁷ Men sa maŋ kaa fɛ fanɛ basa na shibi a chɔ menyi so menyi maaŋ tiŋ n ju bumo n lar kasawule na so.

¹⁸ Men sa maa ŋana bumo, ama men baa nyiŋi kusɔ nɛ Enyɛnpe menyi be Ebɔrɛ na wora Ijipt be ewura nɛ mbe basa na.

¹⁹ Men baa nyiŋi alɔ lubi nɛ menyi gbagba wu anishi so nɛ emamachisheŋ nɛ yukugboŋ nɛ eleŋ nɛ Enyɛnpe menyi be Ebɔrɛ na ta n sɔ menyi n yige na. Kananɛ e baŋ mur Ijiptebi na nɛ e beeŋ mur basa nɛ menyee ŋana naniere na gba.

²⁰ E beeŋ shin nɛ keyeŋiyeŋi e tɔr bumo so nɛ e mur bumo nɛ baaŋ nya n shile n ya ŋana na gba.

²¹ Amoso men sa maa ŋana basa ere jemanɛ nɛ menyi nɛ bumo beeŋ tu abar kena to. Menyi nɛ Enyɛnpe menyi be Ebɔrɛ na e wɔtɔ. E la Ebɔrɛ gboŋgboŋi nɛ mbe asheŋ kɔ kufu nna.

²² Saŋɛ nɛ menyee kɔ a yɔ anishito na, Enyɛnpe Ebɔrɛ na malɛ beeŋ baa tintiŋ efuliana na be basa a lar kasawule na so gbrɛgbrɛbi. E maaŋ shin nɛ men mur bumo kikɛ kela koŋwule, ŋkpal manɛ so, nɛ men mur bumo kikɛ epul to, kupuŋ to be asɔbɔya lubi beeŋ wora keshi ŋ ki kabɔlar n sa menyi.

²³ Enyɛnpe menyi be Ebɔrɛ na beeŋ sa menyi yuku men doŋana so nseŋ shin nɛ keyeŋiyeŋi e tɔr bumo so n ya fo fanɛ b ka beeŋ mur.

²⁴ Mo alɛ beeŋ naŋ sa menyi yuku bumo be bewura so nɛ men mɔ bumo nɛ esa maaŋ naa nyiŋi bumo be asheŋ gba kuraa. Esa kama maaŋ tiŋ ŋ kuŋ menyi be kemur bumo akpa.

²⁵ Nɛ men kaŋ pɔɔ efuli kama so, men chɔɔ bumo be agbirana. Men sa maŋ kaa yɛlga shuwa ŋko gbiti nɛ a beeŋ baa deŋ agbirana na so na. Menyi alɛ e sa maŋ ta amo ŋ ki menyeya. Nɛ men wora loŋ, k beeŋ tiŋ a la luwu n sa menyi, ŋkpal manɛ so, Enyɛnpe Ebɔrɛ na kishi kagbirshuŋ nna.

²⁶ Men sa maŋ kaŋ bar agbirana ere be kekama menyi peana. Nɛ men wora loŋ, kɔnɔsho nɛ k wɔ basa na so na beeŋ ba menyi alɛ gba so. A daga fanɛ men kishi amo be asheŋ nsaa gelge amo kenishipere so, ŋkpal manɛ so, Enyɛnpe Ebɔrɛ na shoduu amo nna.”