Ditɛronɔmi 6 - EBƆRƐ BE KAWƆL

Mbragboŋ na be asheŋ

¹ “Mbraana nɛ Enyɛnpe menyi be Ebɔrɛ na ta n sa ma fanɛ ŋ ŋini menyi nna na. Men ya kaa wora amo kasonu ashi kasawule nɛ menyee dii Jɔɔdan be lɔr na a yɔ nɛ men ya sɔ n chena so na.

² A daga fanɛ menyi nɛ menyi be kamanebi kikɛ ka bee bunyaŋ Enyɛnpe menyi be Ebɔrɛ na nsaa wora mbe mbraana nɛ n ta a sa menyi ere kasonu menyi be kebaawɔtɔ kikɛ to, saŋɛ na so menyeeŋ chena kasawule na so n chɛr.

³ Israɛlebi, men nu amo nɛnɛ nseŋ wora amo kasonu! Aloŋ e naaŋ shin nɛ asheŋ e nyalɛ n sa menyi nɛ men ki efuligboŋ nseŋ naŋ tiŋ n chena kasawule lela nɛ k bee wora adɔjibi ga na so, fanɛ kananɛ Enyɛnpe, an nanaana be Ebɔrɛ na, nase kɔnɔ na.

⁴ Israɛlebi, men nu nfe! Enyɛnpe Ebɔrɛ na nawule e la anyi be Ebɔrɛ.

⁵ Men baa ta menyi be ŋgbene kikɛ nɛ menyi be ayoyu kikɛ nɛ menyi be eleŋ kikɛ a sha Enyɛnpe menyi be Ebɔrɛ na.

⁶ Men sa maŋ kaŋ teŋ mbraana nɛ n ta a sa menyi kabre ere so kikɛ.

⁷ Men baa ŋini menyi be mbia amo. Men baa kute amo to jemanɛ nɛ men wɔ elaŋ to nɛ jemanɛ nɛ men wɔ ekpa so nɛ jemanɛ nɛ menyee wushi nɛ jemanɛ nɛ menyee shuŋ kikɛ.

⁸ Men baa kre amo menyi be mbre so nsaa chɛ amo a mata menyi be nsɔto nɛ e baa la kanyiŋi n sa menyi.

⁹ Men baa sibɛ amo a deŋi menyi be nwu be mbuna so nɛ menyi be nde be mbunagboŋ so.”

Kusoe kpakpaso be kasokpele be asheŋ

¹⁰ Ade be kaman nɛ Mosis naŋ kaŋɛ Israɛlebi na le: “Kananɛ Enyɛnpe Ebɔrɛ nɛ e nase kɔnɔ n sa men nananyɛnana, Eebraham nɛ Aizek nɛ Jeekɔb, fanɛ e beeŋ ta kasawule nɛ nde gboŋgboŋi nɛ a kɔ nwu lela nɛ menyi gbagba maŋ pɔr amo

¹¹ nɛ nwu nɛ asɔ lela bɔlɔ amo to nɛ menyi gbagba maŋ ta amo n wɔtɔ ndoŋ na, n sa menyi. Enyɛnpe Ebɔrɛ na beeŋ sa menyi atirbu nɛ menyi gbagba maŋ kur nɛ ndibi be adɔ nɛ ɔlif be ndibi be adɔ nɛ menyi gbagba maŋ dɔ n duu. Enyɛnpe Ebɔrɛ na kaŋ yɛr menyi kasawule ere so nɛ men ya nya asɔ nɛ menyee sha kikɛ a ji,

¹² men baa da so nɛ men maŋ teŋ so fanɛ Enyɛnpe Ebɔrɛ na e kɔ n suge menyi kenyaya to ashi Ijipt be efuli so.

¹³ Amoso men baa bunyaŋ Enyɛnpe menyi be Ebɔrɛ na nsaa shuŋ mo nawule nseŋ naa nase nnɔ mo nawule be ketre to.

¹⁴ Men sa maŋ kaa shuŋ basa nɛ b kulti menyi na be agbirana kikɛ.

¹⁵ Nɛ men kaŋ shuŋ agbirana, Enyɛnpe Ebɔrɛ na be agbo beeŋ ba menyi so fanɛ edɛ m ba mur menyi cheche ashi durnya ere to. Ŋkpal manɛ so, Enyɛnpe menyi be Ebɔrɛ nɛ e wɔ menyi kutɔ na maa sha kechamana.

¹⁶ Men sa maŋ kaŋ wora Enyɛnpe menyi be Ebɔrɛ na ŋ keni, fanɛ kananɛ men daŋ wora ashi kakpa nɛ baa tre Massa na.

¹⁷ Men baa wora mbraana nɛ Enyɛnpe Ebɔrɛ na sa menyi na kikɛ kasonu.

¹⁸ Men baa wora asɔ nɛ a bee par Enyɛnpe Ebɔrɛ na nɛ asheŋ a nyalɛ n sa menyi. Saŋɛ na so nɛ menyeeŋ tiŋ n ya sɔ kasawule nɛ k bee wora adɔjibi ga, nɛ Enyɛnpe Ebɔrɛ na nase kumo be kɔnɔ n sa men nananyɛnana na,

¹⁹ nseŋ ju men doŋana kikɛ kasawule na so fanɛ kananɛ e nase kɔnɔ na.

²⁰ Kachako menyi be mbia beeŋ ba bishi menyi le: ‘Manɛ nna nɛ Enyɛnpe Ebɔrɛ na sa anyi mbraana nɛ keŋini ere?’

²¹ Ndoŋ nna nɛ men kaŋɛ bumo le: ‘An daa la Ijipt be ewura Fɛɛro be anya nna, ama Enyɛnpe Ebɔrɛ na ta mbe eleŋgboŋ ŋ kɔ n sɔ anyi n yige.

²² Anyi gbagba wu e ka wora emamachisheŋ nseŋ shin nɛ alemaŋkarsheŋ ba Ijiptebi na nɛ bumo be ewura nɛ benimuana kikɛ so.

²³ Enyɛnpe Ebɔrɛ na e daŋ sɔ anyi n yige ashi Ijipt be efuli so nseŋ bar anyi nfe m ba ta kasawule ere n sa anyi, fanɛ kananɛ e nase kumo be kɔnɔ n sa an nananyɛnana na.’

²⁴ Kumo be kaman nɛ Enyɛnpe anyi be Ebɔrɛ na kaŋɛ anyi kenishipere so fanɛ an baa wora mbraana ere kikɛ kasonu nsaa bunyaŋ mo. Nɛ anyee wora loŋ, e beeŋ baa kuŋ anyi nsaa chɛ anyi to nɛ asheŋ e baa nyalɛ a sa anyi.

²⁵ Nɛ fanɛ anyee wora kusɔ kama nɛ Enyɛnpe anyi be Ebɔrɛ na kaŋɛ kasonu kashenteŋto bre, mbe kagbene beeŋ baa fuli anyi so.”