Ditɛronɔmi 5 - EBƆRƐ BE KAWƆL

Mbra kudu na be asheŋ

¹ Mosis daŋ tre Israɛl be basa na kikɛ nna m ba kaŋɛ bumo le: “Israɛlebi, men kaŋ asoe n nu mbraana nɛ mee ta a sa menyi kabre ere. Men koya amo nseŋ wora amo kasonu.

^2-3 Sainai be kebeegboŋ na ase nɛ anyi nɛ Enyɛnpe, anyi be Ebɔrɛ na wora kɔnɔkoŋwule be ŋkre. Mannɛ an nananyɛnana nɛ mo e daŋ wora ŋkre na, ama anyi nɛ an wɔ ŋkpa to kabre ere gba nɛ mo e wora kumo.

⁴ Enyɛnpe Ebɔrɛ na daŋ bɔla edɛ to nna m malga n sa an nananyɛnana ashi kebeegboŋ na ase nɛ b nu mbe ebɔl.

⁵ N daa yil bumo nɛ Enyɛnpe Ebɔrɛ na be kefɛato nna a kute asheŋ nɛ e daa kaŋɛ na a sa bumo, ŋkpal manɛ so, b daa ŋana edɛ na nna nsaa maŋ shuli n dii kebee na so. Ndoŋ nna nɛ Enyɛnpe Ebɔrɛ na kaŋɛ,

⁶ ‘Ma e la Enyɛnpe, menyi be Ebɔrɛ nɛ e kɔ n suge menyi ashi Ijipt, kakpa nɛ menyi daa la anya na.

⁷ Men sa maŋ kaa shuŋ Ebɔrɛ kikɛ n ti ma so.

⁸ Men sa maŋ lɔŋɛ kusɔ kikɛ nɛ k wɔ ebɔrɛso ŋko kasawule so ŋko nchu to ŋko kasawule be kaseto be kapɔrduli n sa menyi be amu.

⁹ Men sa maŋ kaŋ gbir m bunyaŋ kegbir kikɛ ŋko n shuŋ kumo, ŋkpal manɛ so, ma e la Enyɛnpe, menyi be Ebɔrɛ nɛ m maa sha echamana na. Ma e naa gberge bekama nɛ b kishi ma nɛ bumo be kamanebi kusoe hale n ya fo bumo be kenanafofo nɛ kenana gbiramuli.

¹⁰ Ama mee sha bumo nɛ baa sha ma nsaa wora ma kasonu a bɛ ma mbraana so na nna hale n ya fo bumo be kekurge to be kenana kagboŋ.

¹¹ Men sa maŋ kaŋ ta ma ketre n wora asheŋ lubi kikɛ, ŋkpal manɛ so, ma Enyɛnpe Ebɔrɛ na beeŋ gberge ekama nɛ e beeŋ ta ma ketre n wora kusɔ nɛ k maŋ daga na kusoe.

¹² Men baa sa ma kewushiachɛ na bunyaŋ nsaa ta kumo fanɛ kachɛ cheembi, fanɛ kananɛ ma, Enyɛnpe menyi be Ebɔrɛ na kaŋɛ menyi na.

¹³ Nchɛ ashe nɛ men kɔ nɛ men ta n shuŋ menyi be ashuŋ,

¹⁴ ama bɔkwe to be kachɛ shunusopo na la kewushiachɛ nna nsaa la meya. Esa kama maŋ daga fanɛ e shuŋ loŋ be kachɛ na. Menyi gbagba ŋko menyi be mbia ŋko anya ŋko asɔbɔya ŋko befɔ nɛ b wɔ menyi be efuli so na maŋ daga fanɛ b ka shuŋ. Menyi be anya gba daga fanɛ b wushi nna fanɛ kananɛ menyee wushi na.

¹⁵ Men baa nyiŋi fanɛ men daa la anya nna ashi Ijipt be efuli so nɛ ma, Enyɛnpe menyi be Ebɔrɛ na bɔla ma yukugboŋ nɛ eleŋ so ŋ kɔ n suge menyi. Amoso nɛ mee yili kumo a sa menyi fanɛ men baa sa ma kewushiachɛ na bunyaŋ nsaa ta kumo kachɛ cheembi na.

¹⁶ Men baa bunyaŋ men tutoana nɛ men nioana, fanɛ kananɛ ma, Enyɛnpe, menyi be Ebɔrɛ na yili n sa menyi na; saŋɛ na so, asheŋ beeŋ nyalɛ n sa menyi nɛ menyi alɛ e chena kasawule nɛ n ta a sa menyi ere so n chɛr.

¹⁷ Men sa maŋ kaŋ mɔ.

¹⁸ Men sa maŋ kaŋ ji kubojua.

¹⁹ Men sa maŋ kaŋ yuri.

²⁰ Men sa maŋ kaŋ ku efɛ n deŋi esa kama.

²¹ Men sa maŋ kaa yɛlga esa ko be eche ŋko esa ko mo kul ŋko mbe kowu, ŋko kasawule, ŋko anya, ŋko ana, ŋko ekurma, ŋko kusɔ kama nɛ e kɔ.’ ”

²² Mbraana nɛ Enyɛnpe Ebɔrɛ na daŋ ta n sa Israɛl be basa kikɛ jemanɛ nɛ men daa wɔ kebee na ase na nna na. Jemanɛ nɛ e daŋ bɔla awɔlpa lembir gbitigbiti nɛ edɛ daa lar amo to na to m malga awɔrso na, mbraana ere nɛ e daŋ ta n sa na nɛ mannɛ apɔtɛ ko. Kumo be kaman nɛ e sibɛ amo n deŋi ajembu peŋgeleŋ peŋgelembi anyɔ so nseŋ ta amo n sa ma.

Kufu ka pɛ basa na be asheŋ

²³ Jemanɛ nɛ edɛ na daa suse wuloŋwuloŋ kebee na so nɛ baa nu ebɔl na tentembiri na to na, nɛ bejuŋkparpoana nɛ eyiriana na be benimuana na ba ŋ kutɔ

²⁴ m ba kaŋɛ: “Enyɛnpe, anyi be Ebɔrɛ na lara mbe keshi nɛ kemaŋkura ŋ ŋini kabre. E bɔla edɛ na to m malga nɛ an pin fanɛ Ebɔrɛ beeŋ tiŋ m malga basa kutɔ nɛ b nu nseŋ kraa wɔ ŋkpa to.

²⁵ Ama anyi maa sha kewora ewɔji nɛ edɛ gboŋgboŋi ere e mɔ anyi. An baa nyi geeŋ fanɛ nɛ Enyɛnpe, anyi be Ebɔrɛ na kraa malga anyi kutɔ, anyeeŋ wu.

²⁶ Dimɛdi ko wɔtɔ nɛ e nu Ebɔrɛ, nɛ mo nawule la Ebɔrɛ ere, ka bɔla edɛ to m malga nseŋ ji efute a?

²⁷ Amoso, Mosis, bɛta n yɔ n ya nu kusɔ kama nɛ Enyɛnpe, anyi be Ebɔrɛ na kaŋɛ nseŋ ba kaŋɛ anyi. Anyeeŋ nu nseŋ wora kusɔ kama nɛ e kaŋɛ.”

²⁸ Enyɛnpe Ebɔrɛ na ka nu loŋ nɛ e kaŋɛ ma le: “N nu kusɔ nɛ basa ere kaŋɛ fo, ma alɛ shuli m bɛ bumo so.

²⁹ Nɛ fanɛ baaŋ baa kɔ le be nfɛra nsaa bunyaŋ ma jemanɛ kikɛ nseŋ naa wora ma mbraana kasonu, kumo ere asheŋ beeŋ nyalɛ n sa bumo nɛ bumo be kamanebi hale mbaanaayɔ.

³⁰ To, yɔ n ya kaŋɛ bumo fanɛ b bɛta n yɔ bumo be ewajɛbu to.

³¹ Ama fo ere, Mosis, e shir ma kutɔ nfe nɛ n ta ma mbraana kikɛ n sa fo nɛ fo ta amo n ya ŋini basa na, saŋɛ na so baaŋ baa wora amo kasonu ashi kasawule nɛ mee sa bumo na so.”

³² Amoso, Israɛlebi, a daga men baa wora Enyɛnpe, menyi be Ebɔrɛ na be mbraana na kasonu. Men sa maa wora a da amo be kekama so.

³³ Men baa bɛ amo kikɛ so, saŋɛ na so, asheŋ beeŋ nyalɛ n sa menyi nɛ men tiŋ n chena kasawule nɛ Enyɛnpe, menyi be Ebɔrɛ na bee ta a sa menyi na so n chɛr.