Ditɛronɔmi 4 - EBƆRƐ BE KAWƆL

Mosis ka leŋ Israɛlebi to fanɛ b baa kɔ kasonu be asheŋ

¹ Ade kikɛ be kaman, nɛ Mosis kaŋɛ basa na le: “Nɛ menyee wora mbraana nɛ mee ŋini menyi ere kikɛ kasonu, menyeeŋ baa wɔtɔ nseŋ tiŋ n ya chena kasawule nɛ Enyɛnpe Ebɔrɛ nɛ men nananyɛnana shuŋ na, bee ta a sa menyi na so.

² Men sa maŋ ta shɛŋ n ti asheŋ nɛ mee kaŋɛ menyi kenishipere so ere so ŋko n lara shɛŋ ashi amo to n lɛ. Men baa wora Enyɛnpe, menyi be Ebɔrɛ na be mbraana nɛ mee ta a sa menyi ere kasonu.

³ Men gbagba wu kusɔ nɛ Enyɛnpe Ebɔrɛ na wora ashi kebeegboŋ nɛ baa tre Piyɔɔ na ase. E daŋ mur ekama nɛ e daŋ shuŋ kegbir nɛ baa tre Baal na nna ashi ndoŋ.

⁴ Ama menyi bumo nɛ b daa ji kashenteŋ a sa Enyɛnpe, menyi be Ebɔrɛ na, e kraa wɔ ŋkpa to kabre na.

⁵ Mbraana nɛ Enyɛnpe, ma Ebɔrɛ na ta n sa ma na kikɛ nɛ ŋ ŋini menyi na. Men wora amo kasonu ashi kasawule nɛ menyee yɔ nɛ men ya kɔ n sɔ n chena so na so.

⁶ Men ya ta kashenteŋji n wora amo kasonu nɛ efuli pɔtɛ so be basa na e wu kananɛ menyi be kanyiasheŋ du. Nɛ b kaŋ nu mbraana ere be asheŋ, baaŋ kaŋɛ le: ‘Efuligboŋ ere be basa nyi asheŋ nsaa pin asheŋ to pasaa!’ ”

⁷ Efuligboŋ ŋko kefimbi kikɛ maŋ wɔtɔ a kɔ Ebɔrɛ nɛ e mata bumo nsaa nu bumo be kekule fanɛ kananɛ Enyɛnpe, anyi be Ebɔrɛ na du n sa anyi ere kikɛ. Jemanɛ kama nɛ an kule mo kechɛto, e bee nu anyi be kekule nna.

⁸ Efuligboŋ ŋko kefimbi kikɛ maŋ wɔtɔ a kɔ mbraana nɛ a walɛ fanɛ amo nɛ ŋ ŋini menyi kabre ere.

⁹ Amoso, men baa da so nɛ menyi maaŋ teŋ asheŋ nɛ men wu Ebɔrɛ ka wora n sa menyi ere so. Men baa nyiŋi menyi be amu nsaa kaŋɛ menyi be mbia nɛ benanabiana amo be asheŋ.

¹⁰ Menyi alɛ e baa nyiŋi kachɛ nɛ men daŋ yili Enyɛnpe, menyi be Ebɔrɛ na be anishito ashi kebeegboŋ nɛ baa tre Sainai na ase na jemanɛ nɛ e kaŋɛ ma le na: “Gama Israɛl be basa na abar so. Mee sha fanɛ b nu kusɔ nɛ ŋ kɔ nɛ ŋ kaŋɛ bumo nna, saŋɛ na so baaŋ koya kewora ma kasonu bumo be ŋkpa to kikɛ nseŋ ŋini bumo be mbia nɛ bumo alɛ gba e baa wora loŋ.”

¹¹ Men kaŋɛ menyi be mbia kananɛ men daŋ ya yili Sainai be kebeegboŋ nɛ bɔrɛwɔlpa lembir gbitigbiti nɛ edɛ daa nyɛkpɛ amo to a yɔ awɔlpa so daa buu kumo so na ase

¹² nɛ kananɛ Enyɛnpe Ebɔrɛ na bɔla edɛ na to m malga menyi kutɔ be asheŋ. Men daa nu kusɔ nɛ e daa kaŋɛ na nsaa pin to ama menyi alɛ daa maa wu mo kenishiso.

¹³ E daŋ kaŋɛ menyi kusɔ nɛ k daga fanɛ men wora, nɛ menyi nɛ mo be kɔnɔkoŋwule be ŋkre na e yili. Kumo e la fanɛ, a daga fanɛ men baa wora mbra kudu nɛ Enyɛnpe Ebɔrɛ na sibɛ n deŋi ajembu peŋgeleŋ peŋgelembi anyɔ so na kasonu.

¹⁴ Enyɛnpe Ebɔrɛ na daŋ kaŋɛ ma nna fanɛ ŋ ŋini menyi mbraana nɛ menyeeŋ wora kasonu ashi kasawule nɛ menyee yɔ nɛ men ya kɔ n suge ashi Jɔɔdan be lɔr na be epeŋitɔrkpa be kaba so na.

Kefiɛso a laŋɛ kagbirshuŋ be kaplɛa so be asheŋ

¹⁵ Ade be kaman, nɛ Mosis naŋ kaŋɛ Israɛlebi na le: “Enyɛnpe Ebɔrɛ na ka daŋ bɔla edɛ na to m malga menyi kutɔ ashi Sainai be kebee na ase na, men daa maŋ wu mbe kapɔr kikɛ kenishiso. Amoso men baa da so

¹⁶ nɛ menyi maaŋ ya luri kagbirshuŋ be kulubi to. Men sa maŋ kaŋ lɔŋɛ agbir nɛ a duli enyɛn ŋko eche,

¹⁷ ŋko kusɔbɔya ŋko kabuibi,

¹⁸ ŋko kusɔ gbeyeso ŋko kɔrɔtɔ n shuŋ kumo.

¹⁹ Men sa maŋ kaŋ shin nɛ kechɔŋkeni e ba menyi so nɛ men gbir m bunyaŋ epeŋi ŋko kufɔl ŋko achɛkpabi kikɛ. Enyɛnpe, menyi be Ebɔrɛ na nyi fanɛ efuli pɔtɛana so be basa bre beeŋ baa sha amo be kebunyaŋ.

²⁰ Ama menyi ere la basa nɛ Enyɛnpe Ebɔrɛ na kɔ m mɔlga ashi Ijipt, kakpa nɛ kebaawɔtɔ daa du kpakpa ga n sa menyi na nna. E bar menyi nna nɛ men baa kaa la mo gbagba be basa, fanɛ kananɛ men tea la kabre ere.

²¹ Ŋkpal menyi so nɛ Enyɛnpe Ebɔrɛ na nya agbo n wɔtɔ ma, nseŋ bɔ ntaŋ fanɛ m maaŋ dii Jɔɔdan be Lɔr na n yɔ kasawule lela nɛ e ta a sa menyi na so.

²² Ma ere beeŋ wu kasawule ere so nfe nsaa maaŋ nya n dii lɔr na kikɛ, ama menyi ere beeŋ dii kumo n ya sɔ kasawule lela na n chena so.

²³ Amoso, men baa da so nɛ menyi maaŋ teŋ menyi nɛ Enyɛnpe Ebɔrɛ na be kɔnɔkoŋwule be ŋkre na so. Men baa wora mbe mbraana kasonu nsaa maŋ kaŋ shuŋ kegbir be yiri kikɛ,

²⁴ ŋkpal manɛ so, Enyɛnpe, menyi be Ebɔrɛ na beeŋ tiŋ a du fanɛ edɛ nɛ k bee ji a mur. E la Ebɔrɛ nɛ e maa sha kechamana nna.

²⁵ Nɛ men ka ya chena kasawule na so n chɛr nseŋ kurge mbia nɛ benanabi gba, men sa maŋ kaŋ lɔŋɛ kegbir be yiri kikɛ m bɔla kumo so n wora kulubi. K la kulubi nɛ Enyɛnpe Ebɔrɛ na kishi nna nɛ kumo alɛ bee wɔtɔ mo agbo to.

²⁶ Amoso, esoso nɛ kasawule bee ji ma shɛda kabre nna fanɛ nɛ men kaŋ kini kenu n sa ma, k maaŋ chɛr nɛ men mur kasawule na so. Menyi maaŋ chena kasawule nɛ k wɔ Jɔɔdan be kaba ndoŋ na so n chɛr. Menyeeŋ mur cheche.

²⁷ Enyɛnpe Ebɔrɛ na beeŋ tintiŋ menyi n lar kasawule na so nseŋ pesaŋ menyi to n sɔ efuli pɔtɛana so, mboŋ nɛ menyi to be gbrɛbi beeŋ ya ji efute.

²⁸ Menyi alɛ beeŋ ya shuŋ agbir nɛ edimɛdi ta ndibi nɛ ajembu n lɔŋɛ ashi efuli pɔtɛana na so ndoŋ. Amo alɛ maŋ la shɛŋ, a maa wu ŋko a nu ŋko a ji ajibi ŋko a nu efɛa.

^29-30 Ashi menyi be etɔrɔ na kikɛ to, menyeeŋ ba chɛrga a sha kenaŋ n shuŋ Enyɛnpe Ebɔrɛ na nawule. Nɛ menyi alɛ kaŋ bɛta m ba mo kutɔ nseŋ wora mo kasonu kashenteŋto, e beeŋ naa la menyi be Ebɔrɛ.

³¹ Enyɛnpe, menyi be Ebɔrɛ na beeŋ wu menyi kuwɔr nsaa maŋ mur menyi ŋko ŋ kini menyi n lɛ. E beeŋ nyiŋi mbe kɔnɔ naseso nseŋ wora m bɛ mo nɛ men nananyɛnana be kɔnɔkoŋwule be ŋkre so.

³² Men bishi asheŋ to nɛnɛ a laŋɛ dra na be kaplɛa so. Kumo e la fanɛ pɔɛŋ nɛ b kurge menyi na hale n ya fo jemanɛ nɛ Ebɔrɛ to edimɛdi na nseŋ to kenishi ŋ keni durnya ere kikɛ to, kusɔ gboŋgboŋi ko fanɛ kede daŋ wora kikɛ a? Esa daŋ nu le be kesheŋ ere ŋ ku so a?

³³ Basa ko malɛ daŋ nu Ebɔrɛ be ebɔl ka shi edɛ to a malga bumo kutɔ fanɛ kananɛ men nu ere nseŋ kraa wɔ ŋkpa to a?

³⁴ Kegbir ko malɛ daŋ ber kagbene fanɛ k beeŋ ya lara basa ko ashi efuli ko so m ba ki kumo gbagba be basa fanɛ kananɛ Enyɛnpe Ebɔrɛ na wora ashi Ijipt be efuli so na a? Menyi gbagba be anishito nɛ Enyɛnpe Ebɔrɛ na bɔla mbe yukugboŋ nɛ eleŋ so n shin nɛ alɔ mɔso nɛ kena nɛ emamachisheŋ be yiri yiri wora nseŋ naŋ shin nɛ asheŋ nɛ a bee keta kufu wora nɛ men wu amo.

³⁵ Enyɛnpe Ebɔrɛ na daŋ wora ade kikɛ nna ŋ ŋini menyi, saŋɛ na so menyeeŋ pin fanɛ mo nawule e la Ebɔrɛ nɛ ekama maŋ naa wɔtɔ n ti mo so.

³⁶ E daŋ shin nɛ mbe ebɔl shi ebɔrɛso m ba nɛ men nu, saŋɛ na so e beeŋ ŋini menyi asheŋ. Mo alɛ naŋ shin nɛ men wu mbe edɛ cheembi kasawule ere so nna nɛ e bɔla kumo to m malga n sa menyi.

³⁷ Kasha nɛ Enyɛnpe Ebɔrɛ na kɔ n sa men nananyɛnana na so nɛ e lara menyi nɛ men baa la mo gbagba be basa nseŋ bɔla mbe yukugboŋ so n lara menyi ashi Ijipt be efuli so m ba.

³⁸ Men ka lar a ba malɛ, mo e daa ju efuliana nɛ b kɔ eleŋ ga a chɔ menyi na a lar nsaa ta bumo be nsawule a sa menyi fanɛ kananɛ e fara a wora ere.

³⁹ Amoso men nyiŋi kabre fanɛ Enyɛnpe Ebɔrɛ na e la Ebɔrɛ ashi ebɔrɛso nɛ kasawule so kikɛ. Ebɔrɛ kikɛ maŋ naa wɔtɔ n ti mo so.

⁴⁰ Men baa wora mbe mbraana kikɛ nɛ mee sa menyi kabre ere kasonu, nɛ asheŋ a nyalɛ n sa menyi nɛ menyi be kaman to ebi kikɛ. Kumo be kaman nɛ men chena kasawule nɛ Enyɛnpe, menyi be Ebɔrɛ na bee ta a sa menyi na so mbaanaayɔ.”

Nde nɛ esa beeŋ shile kena n yɔ be asheŋ

⁴¹ Ade be kaman nɛ Mosis lara ndegboŋ asa ashi Jɔɔdan be lɔr na be epeŋilarkpa be kaba so na n yili

⁴² fanɛ nɛ esa maŋ kute m mɔ dimɛdi nseŋ shile n yɔ amo be kekama to e beeŋ nya mbe kumu nɛ b maaŋ mɔ mo n tal to.

⁴³ Kade nɛ baa tre Bɛza nɛ k wɔ keshishɛrsawule be kepreŋ so na nɛ e daŋ lara n yili n sa Ruben be yiri to ebi, nseŋ lara kumo nɛ baa tre Ramɔf nɛ k wɔ Giliad be kasawule so na n yili n sa Gad be yiri to ebi, nseŋ naŋ lara kade nɛ baa tre Golan nɛ k wɔ Bashan be kasawule so na n yili n sa Manase be yiri to ebi.

Ebɔrɛ be mbraana be asambuye be asheŋ

⁴⁴ Kananɛ Mosis ta Ebɔrɛ be mbraana nɛ mbe keŋini n sa Israɛl be basa na nde.

^45-46 Israɛl be basa na ka lar Ijipt be efuli so m ba fo ketaŋɛ nɛ k dese Jɔɔdan be lɔr na be epeŋilarkpa be kaba so m mata kakpa nɛ baa tre Bɛf Piyɔɔ na, nɛ Mosis ta mbraana ere n sa bumo. Amɔriebi be ewura Sihɔn nɛ e daŋ chena Hɛshbɔn n ji kuwura na be kasawule e daa la kumo. Mosis nɛ Israɛl be basa na daŋ kɔ m pɔɔ mo

⁴⁷ nɛ Ewura Ɔg so nna n suge bumo be nsawule. Amɔriebi be bewura anyɔ ere e daa ji kuwura nsawule nɛ a dese Jɔɔdan be lɔr na be epeŋilarkpa be kaba so na nna.

⁴⁸ Yili kade nɛ baa tre Arowa nɛ k mata Aanɔn be lɔr na be ketaŋɛ chiŋgeliŋ na n ya fo Hɛɛmɔn be kebeegboŋ nɛ k wɔ kelargato be esoso be kaba so na ase na daa la bumo be kasawule nna.

⁴⁹ Efuli na be kebonfugboŋ nɛ k dese Jɔɔdan be lɔr na be epeŋilarkpa hale ŋ gbelge to n ya fo Teku Wuso na ase ashi kelargato be kaseto na nseŋ naŋ ta epeŋilarkpa n ya fo Pisga be kebeemase na ase kikɛ daŋ ti bumo be nsawule na so nna.